پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ حالىقتىڭ شەكتەن تىس كرەديت الۋىن ازايتۋ جۇمىستارى اياسىندا «قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭ قابىلدانعانىن مالىمدەدى.
ونىڭ اياسىندا حالىقارالىق تاجىريبەنى ەسكەرە وتىرىپ, بىرقاتار ءتيىستى ءراسىم قاراستىرىلعان. ماسەلەن, سوتتان تىس بانكروتتىقتى تەك بانكتەر, ميكروقارجى ۇيىمدارى جانە كوللەكتورلىق اگەنتتىكتەر الدىنداعى قارىزدار بويىنشا قولدانۋعا بولادى. بۇل ورايدا بورىش 5,5 ملن تەڭگەدەن اسپاۋى ءتيىس.
ەكىنشى ءراسىم – سوت بانكروتتىعى, ونىڭ ماقساتى بانكروتتىڭ م ۇلىكتىك ماسساسى ەسەبىنەن كرەديتورلاردىڭ تالاپتارىن بارىنشا قاناعاتتاندىرۋ. ءۇشىنشى ءراسىم – تولەم قابىلەتتىلىگىن قالپىنا كەلتىرۋ, وندا سوت ارقىلى بورىشتى ءبولىپ-ءبولىپ تولەۋ (5 جىلعا دەيىن) مۇمكىندىگى كوزدەلەدى.
بانكروتتىقتىڭ سالدارى: 5 جىل ىشىندە قارىزدار مەن كرەديتتەر الۋعا شەكتەۋ (لومباردتاردىڭ ميكروكرەديتتەرىن الۋدان باسقا); بانكروتتىقتى 7 جىلدان كەيىن عانا قايتا قولدانۋ مۇمكىندىگى; 3 جىل بويى قارجى جاعدايىنىڭ مونيتورينگى.
سونىمەن قاتار وسى ماسەلە بويىنشا قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا بايانداما جاسادى.
پرەمەر-مينيستر «قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىق تۋرالى» زاڭ بيىلعى ناۋرىز ايىنان باستاپ قولدانىسقا ەنەتىنىن اتاپ ءوتتى.
«بۇل قۇجات كرەديتىن تولەي الماي, قيىندىققا تاپ بولعان جەكە تۇلعالاردىڭ قۇقىقتارىن قورعاۋعا باعىتتالعان. جوعارىدا ايتىلعانداي, زاڭدا راسىمدەردىڭ ءۇش ءتۇرى قاراستىرىلعان – سوتتان تىس بانكروتتىق, سوت ارقىلى بانكروتتىق جانە تولەم قابىلەتتىلىگىن قالپىنا كەلتىرۋ. مۇنداي راسىمدەرگە قارىز الۋشىنىڭ ءوزى عانا باستاماشى بولا الادى», دەدى ءاليحان سمايىلوۆ.
ۇكىمەت باسشىسىنىڭ ايتۋنىشا, سونداي-اق ازاماتتاردىڭ مىندەتتى تۇردە قارجىلىق ساۋاتتىلىقتى ارتتىرۋ كۋرستارىنان ءوتۋى كوزدەلىپ وتىر. بۇل ورايدا وسى زاڭ كۇشىنە ەنگەننەن كەيىن ازاماتتاردىڭ دا جاۋاپكەرشىلىگى ارتادى.
«الداعى ۋاقىتتا جىلدام قارىز الۋ ءۇشىن كرەديتتىك تاريحىنىڭ دۇرىس بولۋىنا ازاماتتاردىڭ وزدەرى مۇددەلى بولۋى ءتيىس. بانكروت دەپ مويىنداۋ قارىزداردى تولەمەي كەتۋ ەمەس, تەك شاراسىز جاعدايداعى كومەك ەكەنىن اركىم ءبىلۋى كەرەك», دەدى پرەمەر-مينيستر.
ءاليحان سمايىلوۆ ءتيىستى زاڭعا تاۋەلدى اكتىلەردىڭ ءبارىن جەدەل ازىرلەپ, قابىلداۋدى, سونداي-اق ونلاين-رەجيمدە قاداعالاپ وتىرۋعا مۇمكىندىك بەرۋ ءۇشىن ازاماتتاردىڭ ءوتىنىش بەرۋ جانە ولاردى ەلەكتروندىق تۇردە وڭدەۋ پروتسەسىن اۆتوماتتاندىرۋدى قامتاماسىز ەتۋدى تاپسىردى.
ودان بولەك, پرەمەر-مينيستر قارجى نارىعىن رەتتەۋ جانە دامىتۋ اگەنتتىگى ەكىنشى دەڭگەيدەگى بانكتەرمەن بىرگە جەكە تۇلعالارعا كرەديت بەرگەن كەزىندە قازىرگى تالاپتاردىڭ ساقتالۋىن قامتاماسىز ەتۋى قاجەت ەكەنىن ايتىپ ءوتتى.
«تۇتىنۋشىلىق كرەديت الۋداعى تاۋەكەلدەردى ازايتۋ جانە حالىقتىڭ شامادان تىس كرەديت الۋىن تومەندەتۋ ءۇشىن شارالار قابىلداۋ قاجەت», دەدى ءاليحان سمايىلوۆ.
ءسوز سوڭىندا ۇكىمەت باسشىسى حالىق اراسىندا زاڭ نورمالارى مەن زاڭعا تاۋەلدى اكتىلەر بويىنشا كەڭ اۋقىمدى ءتۇسىندىرۋ جۇمىسىن قامتاماسىز ەتۋدىڭ ماڭىزدى ەكەنىن ايتتى.
«قاجەتتى اقپارات بارلىق پلاتفورمالاردا جانە الەۋمەتتىك جەلىلەردە قولجەتىمدى ءارى اشىق بولۋى ءتيىس», دەپ تۇيىندەدى ول.
