تايجاقى دەپ تاي تەرىسىنەن تىگىلگەن قاپتال توندى ايتادى. بۇل تۇركى حالىقتارىنىڭ ەجەلدەن كەلە جاتقان سىرت كيىمى سانالادى. مىرجاقىپ اتامىز بۇل تايجاقىنى 1925 جىلى ورىنبوردان قىزىلورداعا كوشىپ كەلگەندە ۇلتى ەۆرەي تىگىنشىگە تاپسىرىس بەرىپ تىككىزگەن. سودان ونى 1928 جىلى ءبىر توپ قازاق زيالىلارىمەن قاماۋعا الىنعانعا دەيىن ۇستىنەن تاستاماي كيىپ ءجۇرىپتى. ودان كەيىن باعالى توندى الاش ارىسىنىڭ جارى عاينيجامال دۋلاتوۆا 1940 جىلعا دەيىن ەشكىمگە كورسەتپەي, كوزىنىڭ قاراشىعىنداي ساقتاپ, قىزى گۇلنارعا امانات ەتىپ قالدىرعان. ال بۇگىنگى ۇرپاققا ونى تەكتىنىڭ تۇياعى, مارقۇم گۇلنار مىرجاقىپقىزى جەتكىزدى.
– اكەم قاماۋعا الىنعان 1928 جىلدان باستاپ ساناساق, ءبىزدىڭ شاڭىراعىمىزدا بۇل تايجاقى سەكسەن جىل ساقتالدى. وسى اسىل كيىمنىڭ قادىرىن جاس كەزىمىزدە ونشا بىلگەن جوقپىن. قازىر اكەمنىڭ ءيسى سىڭگەن, رۋحى ايالاعان وتباسىلىق جادىگەرىمىزدى قيماي, ءبىر جاعىنان, مۇڭايىپ تا تۇرعان جايىم بار. بىراق حالقىنىڭ ارداقتىسى مىرجاقىپتىڭ تايجاقىسى ەندى ەل يگىلىگىنە اينالىپ, ءوزى ارمانداعان تاۋەلسىز مەملەكەتىنىڭ ەڭ مارتەبەلى مۇراجايىنىڭ تورىنەن ورىن الاتىنىنا قۋانىشتىمىن, – دەپ اكەسىنىڭ قىمبات دۇنيەسىن مۋزەيگە تاپسىراردا گۇلنار اپا كوزىنە جاس الىپتى.
بىرەگەي جادىگەردى سول كەزدەگى پرەزيدەنت مادەنيەت ورتالىعىنىڭ باس قور ساقتاۋشىسى ءبيبىنۇر ساناقۇلوۆا قابىلداپ الىپ, گۇلنار اپاعا ورتالىق ديرەكتورى, بەلگىلى عالىم مىرزاتاي جولداسبەكوۆتىڭ العىسحاتى مەن ارنايى سوقتىرعان كۇمىس بىلەزىگىن سىيلاعان. سونداي-اق كورنەكتى قايراتكەردىڭ قىزى مۋزەيگە اكەسىنىڭ ءاليحان بوكەيحان, احمەت بايتۇرسىن ۇلى, جۇماعالي تىلەۋلين جانە مۇحتار مۋرزينمەن جازىسقان حاتتارى مەن قۇجاتتارىن, سۋرەتتەرىن تاپسىرعان.
گۇلنار اپامىزعا اكەسىنىڭ قادىرلەپ كيگەن سىرت كيىمىن مۋزەيگە وتكىزۋ وڭاي بولماعانىن مىنا ءبىر حاتتان بايقايمىز. 2010 جىلى الماتىداعى «مەكتەپ» باسپاسىنان جارىق كورگەن «الاشتىڭ سونبەس جۇلدىزدارى» اتتى كىتابىندا ول كىسى قازاقستاننىڭ حالىق جازۋشىسى مۇحتار ماعاۋينگە جولداعان حاتىندا سول ساتتەگى كوڭىلى مەن تولقىنىسىن اسەرلى بايانداپتى.
«اسا قىمباتتى باۋىرىم مۇحتار!
ار ما؟
22.04.09. پراگادان جولداعان ماقالاڭ قولىما تيىسىمەن باس كوتەرمەستەن ءبىر دەممەن وقىپ شىقتىم. قاتتى قۋانعان ءحالىمدى ايتىپ جەتكىزە المايمىن. شىن جۇرەكتەن ريزامىن ساعان.
...بيىل 23.04.09 كۇنى وتكەن جاڭالىققا كوڭىل بولەيىن: قادىرلى اكەم مىرجاقىپتىڭ كيگەن, قولىمدا 80 جىل ساقتاپ كەلگەن تايجاقىسىن مىرزاتاي جولداسبەكوۆ باسشىلىق ەتەتىن استاناداعى پرەزيدەنتتىك مادەني ورتالىققا سىيلىققا بەرگەنىم. بۇل ۇلكەن سەنساتسيا بولدى. راديودان بەرىلدى, تەلەديدارعا ءتۇسىرىلدى, «ەگەمەن قازاقستان» گازەتىنىڭ ءتىلشىسى كەلدى, جۋرناليستەر توبى جينالدى. بەرەتىن سىيلىعىمدى قابىلداۋ ميسسياسىمەن كەلگەن مۋزەيدىڭ باس قور ساقتاۋشىسى ب.ساناقۇلوۆانىڭ تولتىرعان اكتىسىنە قولىمدى قويىپ, م.دۋلاتوۆ اكەمنىڭ تايجاقىسىن تابىس ەتتىم. ول مينۋتتاعى كەشكەن ءحالىمدى ايتپاي-اق قويايىن, جەڭىل تيگەن جوق. بىراق مەنى جۇباتارلىق اسەر ەتكەن, م.جولداسبەكوۆتىڭ ماعان جازعان العىسحاتى ەدى. وندا بىلاي دەگەن سوزدەرىن قىسقارتىپ كەلتىرەيىن: «ابىلاي حاننىڭ التىن زەرلى قامقا تونى, بالۋان شولاقتىڭ كەمەر بەلدىگى سەكىلدى قۇندى مۇرالارمەن بىرگە ورتالىق تورىنەن ورىن الىپ, ۇلتتىق مادەنيەتىمىزدى بايىتىپ تۇراتىن بولادى!...» الداعى ۋاقىتتا مىرجاقىپتىڭ تايجاقىسى ابىلاي حاننىڭ قامقا تونىمەن قاتار مۋزەيدىڭ تورىندە ءىلۋلى تۇرسا, بۇدان ارتىق قانداي قۇرمەت-سىي بولۋشى ەدى؟! قۋانام. ماقتانام...قۇشاقتاپ ءسۇيدىم, گۇلنار مىرجاقىپقىزى دۋلاتوۆا».
قىسقاسى, ۇلتتىق مۋزەيدەگى باعالى جادىگەرلەر قاتارىنان ورىن العان مىرجاقىپ دۋلات ۇلىنىڭ تايجاقىسى – الاش ارىسىنىڭ كوزى عانا ەمەس, تاۋەلسىزدىك مۇراتى جولىندا باسىن بايگەگە تىككەن ارداقتىلارىمىز ءومىر سۇرگەن داۋىردەن سىر شەرتىپ تۇر.
