سەنات دەپۋتاتتارى نۇرتورە ءجۇسىپ, سۇلتانبەك ماكەجانوۆ, باقىتجان جۇماعۇلوۆ, دينار نوكەتاەۆا جانە ءلاززات قالتاەۆا «نيكولاي وستروۆسكي اتىنداعى زاعيپ جانە ناشار كورەتىن بالالارعا ارنالعان №4 ارنايى مەكتەپ-ينتەرناتىندا» بولدى.
مۇعالىمدەر وزدەرىنىڭ نەگىزگى مىندەتى – كورۋ قابىلەتى ناشار بالالاردى وقىتۋ جانە تاربيەلەۋ ەكەنىن سەناتورلارعا ايتىپ بەردى. ول ءۇشىن ورتالىق جۇيكە جۇيەسىنىڭ سىرقاتى مەن باسقا دا اۋرۋلارعا بايلانىستى دامۋداعى قايتالاما اۋىتقۋدى جەڭۋگە جانە ءجۇرۋدى قالىپقا كەلتىرۋگە باعىتتالعان تۇزەتۋ-تاربيە جانە ەمدەۋ-قالپىنا كەلتىرۋ جۇمىستارى جۇرگىزىلىپ وتىر.
«مۇمكىندىگى شەكتەۋلى جانداردى قولداۋ اسا ماڭىزدى. مەملەكەت جەكە-دارا ءبىلىم بەرۋ, كەدەرگىسىز ورتا قۇرۋ, ينفراقۇرىلىمدىق قولجەتىمدىلىكتى قامتاماسىز ەتۋ, وسىنداي تۇلعالار ءۇشىن جۇمىسقا ورنالاسۋ مۇمكىندىكتەرىن كەڭەيتۋ ماسەلەلەرىنە كوپ كوڭىل بولە باستادى», دەپ اتاپ ءوتتى ءلاززات قالتاەۆا.
كەزدەسۋ بارىسىندا وقۋشىلاردىڭ وقۋى مەن دەمالۋىنا ارنالعان ءۇي-جايلاردىڭ جەتىسپەۋى مەن ەكسكۋرسياعا قولايلى جاعداي جاساۋ قاجەتتىگى تۋرالى ماسەلەلەرى دە تالقىلاندى.
ء«بىز مۇمكىندىگى شەكتەۋلى جانداردىڭ قاجەتتىكتەرىن قاناعاتتاندىرۋ ءۇشىن بارلىق جاعدايدى جاساۋىمىز كەرەك. بۇل نەعۇرلىم جۇيەلى, دايەكتى جۇمىستى تالاپ ەتەدى. ۇكىمەت پەن اكىمدەر ەرەكشە قاجەتتىلىكتى تالاپ ەتەتىن ادامداردىڭ تىنىس-تىرشىلىگىن ۇيىمداستىرۋعا كاسىپورىنداردىڭ قاتىسۋىن مەملەكەتتىك ىنتالاندىرۋ نورمالارىن قاراستىرۋى كەرەك», دەدى سۇلتانبەك ماكەجانوۆ.
دەپۋتاتتار ناۋرىزباي اۋدانىنداعى وقۋشىلارعا ارنالعان يننوۆاتسيالىق شىعارماشىلىق ورتالىعى مەن بالاباقشا قۇرىلىسىنىڭ جاعدايىمەن تانىستى.
«بارلىق ۇسىنىستار مەن ەسكەرتۋلەر سەنات دەپۋتاتتارىنىڭ نازارىنا الىنادى جانە ءتيىستى مەملەكەتتىك قۇرىلىمدارمەن تالقىلاناتىن بولادى», دەدى سەناتور نۇرتورە ءجۇسىپ.
