ءبىر ايدا ۆاليۋتا نارىعى سۇرانىس پەن ۇسىنىس تۇرعىسىنان تەڭگەرىمدى بولىپ, ايىرباستاۋ باعامى نارىق تالاپتارىنا ساي قالىپتاسقان.
ۇلتتىق بانك مالىمەتى بويىنشا, كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى وتكەن ايدىڭ ىشىندە شامامەن 328,7 ملن دوللاردى قۇرادى. كۆازيمەملەكەتتىك سەكتور كومپانيالارى ۆاليۋتا نارىعىندا ساتۋدى ەكىنشى دەڭگەيلى بانكتەر ارقىلى ءوز بەتىنشە جۇزەگە اسىرادى.
«جەلتوقساندا ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن 461 ملن دوللارعا ۆاليۋتا ساتىلدى. ۇلتتىق قوردان ساتۋ كولەمى ساۋدا-ساتتىقتىڭ جالپى كولەمىنەن 16 پايىز بولدى نەمەسە ءبىر كۇندە 31 ملن دوللاردان اسپادى. ۇلتتىق قوردىڭ قاراجاتىمەن وپەراتسيالار جۇرگىزۋ كەزىندە ۇلتتىق بانك نارىقتىڭ بەيتاراپ قاعيداتىن ساقتايدى. بۇل شەتەل ۆاليۋتاسىن تۇراقتى ءارى بىركەلكى ساتۋ دەگەندى بىلدىرەدى. بۇل تاجىريبە ۇلتتىق قور وپەراتسيالارىنىڭ ۆاليۋتا نارىعىنا اسەرىن مەيلىنشە ازايتۋعا مۇمكىندىك بەرەدى», دەلىنگەن حابارلامادا.
زەينەتاقى اكتيۆتەرىنىڭ ۆاليۋتالىق ۇلەسىن قولداۋ ماقساتىندا ۇلتتىق بانك بىلتىر جەلتوقساندا بيرجالىق ساۋدا-ساتتىقتا شەتەل ۆاليۋتاسىن ساتىپ الدى, ونىڭ جالپى سوماسى 43,2 ملن دوللاردى نەمەسە نارىقتىڭ جالپى كولەمىنىڭ شامامەن 1,5 پايىزدى قۇراعان.
بىلتىرعى جەلتوقسان ايىندا ۇلتتىق بانك ۆاليۋتالىق ينتەرۆەنتسيالار جۇرگىزگەن جوق.
«ترانسپارەنتتىلىك قاعيداتى اياسىندا ۇلتتىق بانك ۆاليۋتا نارىعىندا جۇرگىزىلەتىن بارلىق وپەراتسيا تۋرالى تولىق اقپاراتتى ۇزدىكسىز جاريالايدى. قىسقا مەرزىمدى پەرسپەكتيۆادا تەڭگە ديناميكاسى گەوساياسي جاعدايدىڭ وزگەرۋىنە, ىشكى قاتىسۋشىلاردىڭ كۇتۋلەرىنە جانە الەمدىك نارىقتارداعى جاعدايعا بايلانىستى بولادى. ۇلتتىق بانك تەڭگەرىمسىزدىكتەردىڭ جيناقتالۋىنا جول بەرمەيتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجىمىن ۇستانۋدى جالعاستىرادى», دەلىنگەن حابارلامادا.
