ء«بىر جىل بۇرىن ەلىمىزدە قايعىلى قاڭتار وقيعالارى ورىن الدى. سول كۇندەرى بەيبىت نارازىلىق اكتسيالارى جاپپاي تارتىپسىزدىكتەرگە ۇلاستى, مەملەكەتتىك توڭكەرىس جاساۋعا تىرىسقان رەاكتسيالىق كۇشتەر بۇنى ۇتىمدى پايدالاندى. ولاردىڭ باستى ماقساتى - ەلدە جۇرگىزىلىپ جاتقان جاڭاشىلدىقتارعا توسقاۋىل بولىپ, ەسكىرگەن ساياساتتى ساقتاپ قالۋ», دەپ جازدى ەرلان قارين ءوزىنىڭ Telegram ارناسىندا.
ەرلان قاريننىڭ ايتۋىنشا, ەلىمىز حاوس پەن انارحياعا ءتۇسۋ قاۋپىنە تاپ بولدى. بۇل جەردەگى باستى ماسەلە - ءبىزدىڭ مەملەكەتتىلىگىمىزدى ساقتاۋ.
«مەملەكەتتىك توڭكەرىس ۇيىمداستىرعان قىلمىسكەرلەردىڭ ارەكەتى ازاماتتاردىڭ بىرلىگى مەن پرەزيدەنتتىڭ شەشۋشى ارەكەتتەرىنىڭ ارقاسىندا عانا ءساتسىز اياقتالدى. ناتيجەسىندە, ءبىز جاعدايدى تۇراقتاندىرا الدىق. مۇنداي داعدارىستاردان وتكەن مەملەكەتتەردىڭ بيلىگى ەلدەگى ساياسي جاعدايدى جابىق ۇستاۋعا تىرىسادى. ال ءبىزدىڭ ەلدە ليبەراليزاتسيا مەن دەموكراتيا باعىتىنداعى قوزعالىس توقتاماي, كەرىسىنشە جەدەلدەدى. پرەزيدەنتتىڭ باستاماسىمەن ەلىمىزدە جاڭعىرتۋدىڭ سەرپىندى جانە جان-جاقتى پروتسەسى باستالدى», دەپ قوستى مەملەكەتتىك كەڭەسشى.
بۇل رەتتە ەرلان قارين مەملەكەت باسشىسىنىڭ ستراتەگيالىق باعىتى كونستيتۋتسيالىق رەفەرەندۋم مەن كەزەكتەن تىس پرەزيدەنت سايلاۋىنىڭ ناتيجەلەرىمەن دالەلدەنگەن كەڭ قوعامدىق قولداۋعا يە بولعانىن اتاپ ءوتتى.
«قازىر ءبىزدىڭ الدىمىزدا قوعامنىڭ بىرلىگىن ساقتاي وتىرىپ, جوسپارلانعان رەفورمالاردى تولىق ىسكە اسىرۋ مىندەتى تۇر», دەپ قورىتىندىلادى ەرلان قارين.
