عىلىم جانە جوعارى ءبىلىم ءمينيسترى ساياسات نۇربەك قازىرگى ۋاقىتتا ستۋدەنتتەر ءۇشىن جاتاقحانالارمەن قامتاماسىز ەتۋ جۇمىستارى ءجۇرىپ جاتقانىن باياندادى. بۇل رەتتە وڭىرلەردە, اتاپ ايتقاندا استانا, الماتى, قاراعاندى جانە تۇركىستان وبلىستارىندا جاڭا جاتاقحانالار سالۋ ءۇشىن قۇرىلىس سالۋشىلارمەن جانە الەۋەتتى ينۆەستورلارمەن جۇمىستى كۇشەيتۋ, سونداي-اق مەملەكەتتىك-جەكەمەنشىك ارىپتەستىك تەتىگىن جەتىلدىرۋدى جالعاستىرۋ جوسپارلانۋدا.
بۇدان باسقا, جەكەلەگەن الەۋمەتتىك وسال توپتاردىڭ اراسىنان اۋىلدىق جەرلەردەن كەلگەن ستۋدەنتتەردى جاتىن ورىندارمەن قامتاماسىز ەتۋ ءۇشىن جاڭا تەتىكتى قولدانۋ, اتاپ ايتقاندا, جاتاقحانا يەلەرىنە وپەراتسيالىق شىعىنداردى وتەۋ ۇسىنىلادى.
پرەمەر-مينيستر وسى تاسىلدەردى قولداپ, بۇل مەحانيزمدى كوللەدج ستۋدەنتتەرىنە دە قولدانۋدى ماقۇلدادى.
سونداي-اق كەڭەستە جوعارى وقۋ ورىندارىنىڭ ينفراقۇرىلىمىن دامىتۋ, اتاپ ايتقاندا, ەۇۋ جانە قازۇۋ قالاشىقتارىن سالۋ ماسەلەسى قارالدى. بۇل باعىتتا بارلىق قاجەتتى كوممۋنيكاتسيالاردى جەتكىزە وتىرىپ, جەر ۋچاسكەلەرىن ءبولۋ پىسىقتالاتىنى اتاپ ءوتىلدى.
«بۇل – ەڭ ماڭىزدى ماسەلەلەردىڭ ءبىرى. قازاقستاننىڭ جەتەكشى جوعارى وقۋ ورىندارىندا ءبىلىم الۋعا دەگەن سۇرانىس تۇراقتى ارتىپ كەلەدى, سوندىقتان قوسىمشا كورپۋستار مەن جاتاقحانالار سالۋ مۇمكىندىكتەرىن تابۋ قاجەت. بۇل ماسەلەلەردى استانا جانە الماتى اكىمدىكتەرىمەن بىرلەسىپ پىسىقتاۋ كەرەك», دەدى ءاليحان سمايىلوۆ.
سونداي-اق پرەمەر-مينيستر 2023 جىلى ءۇش وتاندىق جوعارى وقۋ ورنىنىڭ بازاسىندا اكادەميالىق ارتىقشىلىق ورتالىقتارىن قۇرۋ جونىندەگى پيلوتتىق جوبانىڭ ىسكە قوسىلۋىن قولدادى. ونىڭ اياسىندا تاڭدالىپ الىنعان وقۋ ورىندارىندا قوسىمشا قۇرال-جابدىقتار پايدا بولادى, زەرتتەۋ ۋنيۆەرسيتەتىنىڭ مودەلىنە كوشۋ جانە جاڭا وقۋ باعدارلامالارىن ىسكە قوسۋ باستالادى.
«ادامي كاپيتالدى دامىتۋ, جاستارعا ءبىلىم بەرۋ ءۇشىن ينۆەستيتسيالار تارتۋ ءبىزدىڭ الدىمىزداعى ەڭ باسىم باعىتتاردىڭ ءبىرى بولىپ تابىلادى. سوندىقتان جوبانى رەسپۋبليكانىڭ باسقا جوعارى وقۋ ورىندارىنا ودان ءارى كەڭەيتۋ مۇمكىندىگىن پىسىقتاي وتىرىپ, ىسكە اسىرۋ قاجەت», دەپ اتاپ ءوتتى ءاليحان سمايىلوۆ.
سونىمەن قاتار پرەمەر-مينيستر وڭىرلىك ەكونوميكانىڭ نەگىزگى پروبلەمالارىن شەشۋ ءۇشىن وبلىس اكىمدىكتەرىنە عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى (عزتكج) قارجىلاندىرۋ بويىنشا قوسىمشا بيۋدجەتتىك مۇمكىندىكتەر بەرۋدى ماقۇلدادى. بۇل جەرگىلىكتى جەرلەردە يننوۆاتسيالىق بەلسەندىلىكتى ىنتالاندىرۋعا مۇمكىندىك بەرەدى. بۇل رەتتە ول جەر قويناۋىن پايدالانۋشىلار عزتكج جۇرگىزۋگە ءوتىنىم قالدىرا الاتىن بىرىڭعاي تسيفرلىق پورتال قۇرۋدى باقىلاۋدا ۇستاۋ قاجەت ەكەنىن ايتتى.
سونداي-اق كەڭەستە مەملەكەت باسشىسىنىڭ سايلاۋالدى باعدارلاماسى, قازاقستان حالقىنا جولداۋى جانە ۇكىمەتتىڭ كەڭەيتىلگەن وتىرىستارى شەڭبەرىندە قويعان مىندەتتەرىن ەسكەرە وتىرىپ, عىلىم جانە جوعارى ءبىلىم مينيسترلىگىنىڭ سالالىق تۇجىرىمدامالارى مەن دامۋ جوسپارىن ازىرلەۋ ماسەلەلەرى قارالدى.
سونىمەن قاتار سالالىق جوعارى وقۋ ورىندارى مەن عزي-ءدى باسقارۋ ىسىنە عىلىم جانە جوعارى ءبىلىم مينيسترلىگىنىڭ قاتىسۋ دەڭگەيىن ارتتىرۋ, جوعارى عىلىمي-تەحنيكالىق كوميسسيانىڭ قىزمەتى, «قر كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەۋ جانە تاعى باسقا ماسەلەلەر تالقىلاندى. كەڭەس قورىتىندىسى بويىنشا قابىلدانعان شەشىمدەر كادرلاردى دايارلاۋ, جوعارى ءبىلىم بەرۋدى جاڭعىرتۋ سالاسىن دامىتۋعا, جالپى قازاقستاندىق عىلىمنىڭ تانىمالدىعى, تارتىمدىلىعى مەن بەدەلىنە جاقسى سەرپىن بەرەدى.
