«بارشاڭىزعا ءمالىم, ءوتىپ بارا جاتقان جىل وڭاي بولعان جوق, وتە كۇردەلى بولدى دەسەك ارتىق ەمەس. ەلىمىزدە بولعان قاسىرەتتى وقيعالار جونىندە وزدەرىڭىز بىلەسىزدەر. ءبىز ءبارىمىز ءبىر ەل, ءبىر ۇلت, ءبىر حالىق بولىپ, وتانىمىزدى بىرلەسىپ ساقتاپ قالدىق دەپ ەش كۇمانسىز ايتۋعا بولادى. الدىمىزدا تۇرعان نەگىزگى ماقسات – ەلىمىزدەگى تۇراقتىلىقتى, قاۋىپسىزدىكتى ساقتاپ قالۋ, قازاقستاننىڭ جارقىن بولاشاققا قاراي قارقىندى دامۋىنا جول اشىپ بەرۋ. ارينە, بۇل جولدىڭ وڭاي بولمايتىنى انىق. بىراق دانا حالقىمىز بارلىق قيىندىقتى, توسقاۋىلدار مەن كەدەرگىلەردى جەڭىپ شىعاتىنىنا مەن كامىل سەنەمىن», دەدى پرەزيدەنت.
بۇدان سوڭ, ول كوروناۆيرۋس پەن گەوساياسي احۋالدىڭ ۋشىعۋى حالىقارالىق داعدارىستى كۇشەيتكەنىن ايتتى.
«مۇنىڭ ءبارى الەم ەكونوميكاسىن تىعىرىققا تىرەدى. ءبىز وسى كۇردەلى جاعدايدا ەكونوميكانىڭ قۇلدىراۋىنا جول بەرگەن جوقپىز. وتكەن 11 ايدىڭ قورىتىندىسى بويىنشا ەكونوميكامىز 3 پايىزعا ءوستى. نەگىزگى كاپيتالعا سالىناتىن ينۆەستيتسيا كولەمى 6,5 پايىزعا ارتتى. بۇل جامان كورسەتكىش ەمەس. بىراق جايباراقات وتىرۋعا بولمايدى», دەدى مەملەكەت باسشىسى.
