پرەزيدەنت قاسىم-جومارت توقاەۆتىڭ تاپسىرماسى بويىنشا 2023 جىلدىڭ 1 قاڭتارىنان باستاپ بالاباقشا تاربيەشىلەرىنىڭ, مەكتەپتەر مەن كوللەدجدەر پەداگوگتەرىنىڭ, سونداي-اق قوسىمشا ءبىلىم بەرۋ جۇيەسى ماماندارىنىڭ جالاقىسى تاعى 25%-عا ارتادى.
«بۇگىن ءبىز «پەداگوگ مارتەبەسى تۋرالى» زاڭنىڭ وڭ اسەرىن كورىپ وتىرمىز. 2023 جىلدىڭ قاڭتارىنان باستاپ پەداگوگتەردىڭ جالاقىسى تاعى 25%-عا ۇلعايادى», دەدى وقۋ-اعارتۋ ءمينيسترى اسحات ايماعامبەتوۆ.
ايتا كەتسەك, مۇعالىمدەر الاتىن جالاقىعا قوسىمشا تولەمدەر دە بەلگىلەنەدى. بۇل بىلىكتىلىك ساناتى (لاۋازىمدىق جالاقىنىڭ 30%-دان 50%-نا دەيىن), ماگيستر دارەجەسى, اعىلشىن تىلىندەگى پاندەردى جۇرگىزۋ, داپتەرلەردى تەكسەرۋ, سىنىپ جەتەكشىلىگى جانە تالىمگەرلىك ءۇشىن قوسىمشا تولەمدەر.
ءمينيستردىڭ ايتۋىنشا, 2022 جىلدىڭ ەكىنشى توقسانىندا ورتا ءبىلىم بەرۋ ماماندارىنىڭ ورتاشا جالاقىسى 343 مىڭ تەڭگەنى قۇرادى.
مەملەكەت باسشىسىنىڭ تاپسىرماسى بويىنشا پەداگوگتەردىڭ جالاقىسى 2020 جىلعى قاڭتاردان باستاپ جىل سايىن 25%-عا كوتەرىلىپ كەلەدى.
