ءىس-شارا بارىسىندا ادىلەتتى قازاقستان قۇرۋ جولىنداعى ماڭىزدى مىندەتتەر تالقىلاندى.
پالاتا توراعاسى ءوتىپ بارا جاتقان 2022 جىل ەلىمىز ءۇشىن تاريحي وقيعالارعا تولى بولعانىن ايتتى.
«قازاقستان دامۋدىڭ جاڭا كەزەڭىنە نىق قادام باستى. مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن كەشەندى رەفورمالار قارقىندى تۇردە جۇرگىزىلىپ جاتىر. بيىل ەلىمىز ءۇشىن وتە ماڭىزدى ساياسي وقيعا – پرەزيدەنت سايلاۋى ءوتتى. سونداي-اق پارلامەنت كونستيتۋتسيالىق رەفورمانى زاڭنامالىق تۇرعىدان قامتاماسىز ەتۋ ءۇشىن بىرقاتار زاڭ قابىلدادى», دەدى ماۋلەن اشىمباەۆ.
سەنات سپيكەرى قازاقستاندىقتار ءۇشىن پرەزيدەنت سايلاۋى ماڭىزدى وقيعا بولعانىن اتاپ ءوتتى. سونداي-اق ول مەملەكەت باسشىسى ءوز جولداۋىندا پارلامەنتتىڭ ءرولىن ارتتىرۋدى مىندەت ەتىپ بەلگىلەگەنىن, وسىعان وراي جالپىحالىقتىق رەفەرەندۋمدا كونستيتۋتسياعا ءتيىستى وزگەرىستەر ەنگىزىلگەنىن تىلگە تيەك ەتتى.
«پرەزيدەنتىمىز ەلىمىزدىڭ ساياسي, ەكونوميكالىق جانە الەۋمەتتىك دامۋ باسىمدىقتارىن بەلگىلەپ بەردى. ونىڭ ءبارى مەملەكەت باسشىسىنىڭ سايلاۋ الدىنداعى باعدارلاماسىندا ناقتى كورسەتىلگەن. ەڭ باستى ماقسات – زاڭ ۇستەمدىگى سالتانات قۇرعان ادىلەتتى مەملەكەت قۇرۋ. وسى جولدا بۇكىل قوعام بولىپ جۇمىلىپ, بىرلەسىپ جۇمىس ىستەۋ اسا ماڭىزدى», دەدى ماۋلەن اشىمباەۆ.
سونىمەن قاتار سەنات توراعاسى قاسىرەتتى قاڭتار وقيعاسىنا توقتالىپ, جىل باسىندا تاۋەلسىزدىك العالى بۇرىن-سوڭدى بولماعان سىناقپەن بەتپە-بەت كەلگەنىمىزدى ايتتى. مەملەكەت باسشىسىنىڭ باتىل ءارى ۋاقتىلى قابىلداعان شەشىمدەرىنىڭ جانە حالىقتىڭ قولداۋىنىڭ ارقاسىندا ەلىمىز ول قيىندىقتاردى ەڭسەرە ءبىلدى.
«ەلىمىزدە جۇرگىزىلگەن كونستيتۋتسيالىق رەفورمانىڭ ماڭىزى زور. بيلىك تارماقتارى اراسىنداعى تەپە-تەڭدىك كۇشەيە ءتۇستى. مەملەكەتتىك باسقارۋ جۇيەسىنىڭ اشىقتىعى مەن تيىمدىلىگىن قامتاماسىز ەتۋگە باسا ءمان بەرىلۋدە. كونستيتۋتسيالىق رەفورمانى ىسكە اسىرۋ ماقساتىمەن ءتيىستى كونستيتۋتسيالىق زاڭدار قابىلداندى. بۇل رەتتە ادام قۇقىقتارىن قورعاۋ ينستيتۋتتارىن جەتىلدىرۋگە ۇلكەن كوڭىل بولىنگەنىن اتاپ وتكەن ءجون», دەدى ماۋلەن اشىمباەۆ.
وتىرىس بارىسىندا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ بايانداما جاسادى. ول ءوز سوزىندە قۇقىق سالاسىن جاڭعىرتۋ ماسەلەلەرىنە جانە پارلامەنت جۇمىسىنىڭ رەگلامەنتىنە ەنگىزىلگەن وزگەرىستەرگە كەڭىنەن توقتالدى.
سونداي-اق ءىس-شارادا كەڭەس مۇشەلەرى قۋانىش سۇلتانوۆ, مۇحامبەت كوپەەۆ, بەكتاس بەكنازاروۆ, سۆەتلانا جالماعامبەتوۆا, راشيت احمەتوۆ, سەرىك جاقسىبەكوۆ, سارسەنباي ەڭسەگەنوۆ, بىرعانىم ءايتىموۆا, ومىرزاق وزعانباەۆ, سەرگەي پلوتنيكوۆ جانە تاعى باسقالارى ءسوز سويلەپ, كونستيتۋتسيالىق رەفورمانى ىسكە اسىرۋ بارىسى جونىندە ءوز پىكىرلەرىن ءبىلدىردى.
