يندۋستريالىق دامۋ كوميتەتىنىڭ قۇرىلىس يندۋسترياسى جانە اعاش وڭدەۋ ونەركاسىبى باسقارماسىنىڭ باسشىسى مۇحامەد انداكوۆتىڭ ايتۋىنشا, اتالعان شارا قازاقستاندىق وندىرۋشىلەردى قولداپ, ەلىمىزدەگى ەكولوگيالىق احۋالدى جاقسارتۋ ءۇشىن قولعا الىنعان. بۇل شەكتەۋ 2019 جىلدان باستاپ ەنگىزىلىپ, ءار 6 اي سايىن ۇزارتىلىپ كەلە جاتىر.
«وسى تىيىم وتاندىق تاۋار وندىرۋشىلەردى, اعاش وڭدەۋشىلەردى جانە جيھاز ونەركاسىبىمەن اينالىساتىن كاسىپورىنداردى قولداۋ مەن رەسپۋبليكاداعى ورمان قورىن ساقتاۋ ماقساتىندا ەنگىزىلىپ وتىر. ەگەر دە ورمان قورى قازاقستان اۋماعىنىڭ شامامەن 15%-ىن الىپ جاتقانىن ەسكەرسەك, وندا وڭدەۋگە تەك 4-5%-ى عانا بەرىلەتىنىن ۇمىتپاۋ قاجەت. بۇل ورايدا قورشاعان ورتانى قورعاپ, ورماندى القاپتى ۇلعايتۋ ءۇشىن ەلىمىزدەن اعاش ماتەريالدارىن اكەتۋگە تىيىم سالىناتىنىن ەسكەرتكىمىز كەلەدى. رەسمي ستاتيستيكا بويىنشا بيىل ەلىمىزدەن شەت مەملەكەتتەرگە ورمان اعاشتارى شىعارىلعان جوق», دەدى م.انداكوۆ.
اتالعان بۇيرىق ەاەو سەق تن 4406910000 كودىنا سايكەس «تەمىرجول نەمەسە ترامۆاي جولدارىنا ارنالىپ, قىلقان جاپىراقتى تۇقىمداردان جاسالعان سىڭىرىلگەن اعاش شپالدارىن» ەسەپكە الماعاندا, اعاش ماتەريالدارىنىڭ جەكەلەگەن تۇرلەرىن (ەاەو سەق تن كودى 4401, 4403, 4404, 4406 جانە 4407) قازاقستان اۋماعىنان اكەتۋگە تىيىم سالۋدى كوزدەيدى.
