كوللاجدى جاساعان قونىسباي شەجىمباي, «EQ»
قازاقستاندىقتار اراسىندا Xiaomi-دان بولەك تاعى بىرنەشە قىتايلىق سمارتفون ەرەكشە تانىمالدىلىققا يە. بۇلار – Oppo (9,4 پايىز), Huawei (4,6 پايىز), Vivo (3,9 پايىز), Realme (1 پايىز) جانە OnePlus (0,4 پايىز). كەزىندە ەرەكشە اتاققا يە بولعان LG ونىمدەرى نەبارى 0,2 پايىزدىق مەجەنى باعىندىرا العان.
2021 جىلدىڭ قورىتىندىسى بويىنشا ەلىمىزدە 1 مىڭ ادامعا 767 ءموبيلدى تەلەفوننان كەلەدى. سالىستىرار بولساق, 2012 جىلى 1000 ادامعا 579 تەلەفوننان كەلگەن ەكەن. ۇيالى بايلانىستىڭ ماڭىزدى ارتىقشىلىعى – قالالىق جانە اۋىلدىق تۇرعىندار اراسىنداعى شەكارانى بۇزىپ, اقپاراتقا, قىزمەتتەرگە, سونىڭ ىشىندە مەملەكەتتىك قىزمەتتەرگە تەڭ قولجەتكىزۋگە مۇمكىندىك بەرەدى. اتاپ ايتقاندا, 2021 جىلى قالالىق جەرلەردە 1000 ادامعا شاققاندا 795 ۇيالى تەلەفون, اۋىلدىق جەرلەردە 726 تەلەفون بولعان.
تسيفرلىق تەڭدىككە قولجەتكىزۋدە ءموبيلدى ينتەرنەتتىڭ قولجەتىمدىلىگى مەن قامتۋ دەڭگەيى ماڭىزدى ءرول اتقارادى. قازاقستاننىڭ جەر كولەمى وتە ۇلكەن بولعاندىقتان ونىڭ ءاربىر تۇكپىرىن ينتەرنەتپەن قامتۋ دا وڭايعا سوقپايدى. International telecommunication Union مالىمەتتەرى بويىنشا, 2020 جىلى حالىقتى ءموبيلدى ينتەرنەتپەن قامتۋ 98 پايىزدى قۇراسا, سونىڭ 81 پايىزى – 4G جەلىسىنە تيەسىلى. 2014 جىلى 4G ءموبيلدى ينتەرنەتپەن حالىقتى قامتۋ 43 پايىزدى قۇراعان.
بىلتىردان بەرى 5G تاقىرىبى ءجيى ءسوز بولا باستادى. تسيفرلىق دامۋ ءمينيسترى 5G شىمىلدىعىن تۇركىستاندا اشىپ, ەندى استانا, الماتى, شىمكەنت بۇل يگىلىككە جىل سوڭىنا دەيىن قول جەتكىزەدى دەگەن ەدى. 2023-2025 جىلدارى وبلىس ورتالىقتارىن اتالعان ءموبيلدى ينتەرنەت جۇيەسىنە قوسۋ جوسپارلانعان. ساراپشىلاردىڭ ايتۋىنشا, 5G كەلگەن سوڭ وعان سمارتفون دا ساي بولۋعا ءتيىس. 5G جۇيەسىن كوتەرە الاتىن قىتايلىق سمارتفونداردىڭ باعاسى 100 مىڭ تەڭگەدەن باستالسا, Samsung پەن Apple ونىمدەرى 250 مىڭ تەڭگەدەن جوعارى ساۋدالانادى. فلاگماندىق مودەلدەر ءتىپتى قىمبات.
Beeline Kazakhstan دەرەگىنە سۇيەنەر بولساق, بۇل كومپانيا ابونەنتتەرىنىڭ نەبارى 6 پايىزىندا 5G-عا ساي كەلەتىن سمارتفون بار. برەند بولىنىسىندە, 5G-دى قولداي الاتىن تەلەفونداردىڭ 57 پايىزى – Apple, 22 پايىزى – Samsung فلاگماندىق مودەلدەرىنە, 10 پايىزى – Xiaomi-عا, 11 پايىزى وزگە برەندتەرگە تيەسىلى ەكەن. تاعى ءبىر ماڭىزدى جايت, تۇتىنۋشىلار تەلەفون ساتىپ الار كەزدە نەگىزىنەن سمارتفوننىڭ قۋات كۇشىنە, جادىنىڭ كولەمىنە, كامەرا ساپاسىنا, پايدالانۋ قاراپايىمدىلىعىنا, قۋاتتى ءارى جەدەل پروتسەسسورىنا, ديسپلەي كولەمىنە جانە برەند اتاۋىنا ءمان بەرەدى. ەندى بىرتىندەپ سمارتفوننىڭ 5G-عا ساي نەمەسە ساي ەمەستىگى دە باستى كريتەريلەردىڭ بىرىنە اينالارى ءسوزسىز. ەگەر مەملەكەت ەل اۋماعىن 5G جۇيەسىمەن لايىقتى دەڭگەيدە جابدىقتاي السا, ارينە.
ەسكە سالايىق, 5G جەلىسى الەمدە 2019 جىلى ىسكە قوسىلدى. قازىر ءموبيلدى بايلانىستىڭ بەسىنشى بۋىنىن 83 ەلدە 209 وپەراتور ۇسىنىپ وتىر. تسيفرلىق دامۋ ءمينيسترى باعدات ءمۋسيننىڭ ايتۋىنشا, 5G-عا ءوتۋ ءبىزدى باسقا دەڭگەيگە شىعارادى.
«4G پايدا بولعان كەزدە ينستاگرامدا Reels-ءتىڭ, TikTok بولارىن ەشكىم تۇسىنگەن جوق. بۇل تسيفرلىق الەمنىڭ جاڭا كەزەڭى بولادى دەپ ەشكىم كۇتە قويماپ ەدى. ەندى ءبىز مەتاالەم كەزەڭىنە وتەمىز. قازاقستان جاھاندىق تەندەنتسيالاردان كەشىگىپ قالماۋعا ءتيىس», دەدى مينيستر.
5G ماسەلەسىنە وراي ۆەدومستۆو قازاقستاندا اتالعان ستاندارتتى ەنگىزۋ ءۇشىن بايلانىس وپەراتورلارى اراسىندا جيىلىكتى ۇلەستىرۋدىڭ ەلەكتروندى ساۋداسىن ۇيىمداستىردى. مينيسترلىك 2 لوت ويناتىپ وتىر. ءاربىرىنىڭ قۇنى – 1 ملرد 761 ملن 225 مىڭ تەڭگە. جەڭىمپاز بولعان كومپانيا العاشقى جىل ىشىندە استانا, الماتى جانە شىمكەنت قالالارىندا 5G جەلىسىنىڭ 391 بازالىق ستانساسىن ورناتۋعا ءتيىس. ودان كەيىنگى ءتورت جىلدا وبلىس ورتالىقتارىندا 784 بازالىق ستانسا سالۋعا مىندەتتى. ەكى اۋكتسيون وتكىزىلەتىنىن ەسكەرسەك, الداعى بەس جىلدا ەلىمىزدە 3600-3800 مگتس راديوجيىلىك دياپازونىندا 7 054 بازالىق ستانسا سالىنۋى كەرەك.
