ەل ابىرويىن اسقاقتاتقاندار قانداي قۇرمەتكە دە لايىقتى

ەگەمەن ەل بولعاننان بەرى بوكس­شىلارىمىز ەرماحان ىبرايىموۆ, بەكزات ساتتارحانوۆ, سەرىك ساپيەۆ, دانيار ەلەۋسىنوۆ, جەڭىل اتلەت ولگا شيشيگينا, ۆەلوشاباندوز الەكساندر ۆينوكۋروۆ, جۇزۋدەن دميتري بالاندين سىندى ساڭلاقتارىمىز وليمپيادا تاريحىنا التىن ارىپتەرمەن جازىلدى. بۇل جەڭىستىڭ بارلىعى ەل تاۋەلسىزدىگىنىڭ جانە مەملەكەتتىڭ سپورتقا ەرەكشە كوڭىل بولگەن سىندارلى ساياساتىنىڭ ارقاسىندا كەلگەنى انىق. وسىنداي تولاعاي تابىستاردىڭ ار جاعىندا شاكىرت­تەرىن قىرانداي باپتاپ, الامانعا قوسقان جۇزدەگەن باپكەردىڭ ەڭبەگى جاتقانى ءcوزسىز. سپورتشىلاردىڭ شەبەرلىگىن جوعارى دەڭگەيگە كوتەرگەن جات­تىق­تىرۋشىلاردىڭ ارقاسىندا حالىق­ارالىق جارىستاردا ەلدىڭ ءانۇرانى سان رەت ورىندالىپ, كوك تۋى جەلبىرەدى. تاۋەلسىزدىكتىڭ العاشقى جىلدارى ەكونوميكالىق جاعداي مىقتى بولماعانىمەن, قازاقستاندى تورتكۇل دۇنيەگە تانىتاتىن سپورتتىڭ دامۋىنا, سپورتشىلاردىڭ ءدۇبىرلى جارىس­تاردا اتوي سالۋىنا مەملەكەتىمىز بارىنشا قولداۋ كورسەتە ءبىلدى.

جاقىندا وليمپيادا, پارا­لي­مپيادا, سۋردليمپيادا ويىن­دارىنىڭ جەڭىمپازدارى مەن جۇل­دەگەرلەرى جانە وليم­پيا­دالىق سپورت تۇرلەرى بويىنشا الەم چەمپيوناتتارىنىڭ جەڭىم­پازدارى, سونداي-اق ەڭبەگى سىڭگەن جات­تىقتىرۋشىلاردىڭ ءومىر بويى الاتىن اي سايىنعى تولەماقى مول­شەرى ۇلعايدى. ەندى جەڭىمپاز سپورتشىلار مەن ولاردىڭ جات­تىق­تىرۋشىلارى اي سايىن 318 مىڭ تەڭگەگە دەيىن تولەم الا الادى. 2022-2024 جىلدارعا ارنالعان اۋقىمدى جوباعا مەملەكەتتەن 1,3 ملرد تەڭگە ءبولىندى. سپورتشىلار مەن جاتتىق­تى­رۋ­شىلارعا ءومىر بويى اي سايىنعى ماتەريالدىق قولداۋ تولەمدەرى – رەسپۋبليكانىڭ زاڭىمەن ارنايى بەكىتىلگەن تۇڭعىش جوبا.

مادەنيەت جانە سپورت ءمينيسترى داۋرەن اباەۆتىڭ ايتۋىنشا, تولەمدى ارتتىرۋ سپورتشىلار مەن جاتتىقتىرۋشىلاردى سپورتتا جوعارى ناتيجەلەرگە قول جەتكىزۋگە ىنتالاندىرادى.

«قازاقستاندا وليمپيادا, پاراليمپيادا, سۋردليمپيادا ويىندارىنىڭ چەمپيوندارى مەن جۇلدەگەرلەرىن, وليمپيادالىق سپورت تۇرلەرى بويىنشا الەم چەمپيوندارى اتاعىنا يە بولعان سپورتشىلارعا جانە ولاردىڭ جاتتىقتىرۋشىلارىن قوسقاندا بارلىعى 150-گە جۋىق ادام وسىن­داي تولەم الادى. ولاردىڭ قاتارىنا ەرماحان ىبرايىموۆ, ولگا رىپاكوۆا, گەننادي گولوۆ­كين, يۋليا گالىشەۆا جانە تاعى باسقا اتاقتى سپورتشىلار مەن باپكەرلەر ەنەدى», دەيدى مينيستر.

ءمينيستردىڭ ايتۋىنشا, بۇل تولەم باستاپقىدا 24 اەك (76 380 تەڭگە) شاماسىندا بولىپ, جىلدار بويى وزگەرىسسىز قالعان. «بيىل ۇكىمەتتە مادەنيەت جانە سپورت مينيسترلىگىنىڭ ۇسىنىسى قولداۋ تاۋىپ, اي سايىنعى قامتاماسىز ەتۋ كولەمى 100 اەك-كە (318 000 تەڭگە) دەيىن ءوستى. بۇل تولەمدى الۋ ءۇشىن سپورتشىلار مەن جاتتىقتىرۋشىلاردىڭ سپورت سالاسىندا كەم دەگەندە 20 جىلدىق جۇمىس ءوتىلى بولۋعا ءتيىس», دەدى ول.

بوكستان قازاقستاننىڭ ەڭبەك سىڭىرگەن جاتتىقتىرۋشىسى, سيدنەي وليمپياداسىنىڭ جەڭىمپازى ەرماحان ىبرايىموۆ بەرىلەتىن سومانىڭ ءۇش-ءتورت ەسە كوبەيۋى ەل نامىسىن ابىرويمەن قورعاعان ساڭلاقتارعا كورسەتىلگەن قۇرمەت دەپ ەسەپتەيدى.

«مادەنيەت جانە سپورت مينيسترلىگىنىڭ بۇل باستاماسى وتە دەر كەزىندە قولعا العان دۇنيە. مۇنداي قاراجاتتى الىپ وتىرعان سپورتشىلار, وسى سالادا جۇرگەن قىزمەتكەرلەر نەمەسە شاكىرت تاربيەلەپ وتىرعان باپكەرلەر ەندى ءوز جۇمىسىن الاڭسىز اتقارادى. مۇنداي قادام ءبىزدىڭ جاس سپورتشىلارىمىزدى دا جىگەرلەندىرەدى. اسىرەسە, جاتتىقتىرۋشىلار ءۇشىن ۇلكەن قولداۋ بولدى», دەدى وليمپيادا جەڭىمپازى.

وليمپيادا چەمپيونى ولگا شيشيگينانىڭ ايتۋىنشا, كەزىندە ول ءماجىلىس دەپۋتاتى رەتىندە وسى ماسەلەنى بىرنەشە رەت كوتەرگەن.

ء«بىز بۇعان دەيىن اتالعان ماسە­لەنى كوتەرگەنىمىزبەن, ەش ناتيجە شىقپادى. ەندى مادەنيەت جانە سپورت مينيسترلىگىنىڭ باستاماسى­مەن وليمپيا ويىندارىنىڭ جە­ڭىمپازدارى مەن جۇلدەگەرلەرىن اي سايىنعى قامتاماسىز ەتۋ كولەمىن 100 اەك-كە دەيىن ارتتىردى. بۇل – سپورتشىلار ءۇشىن ۇلكەن قولداۋ. ەڭبەكتى باعالاعانى ءۇشىن ەلىمىزگە العىس ايتامىز», دەدى ول.

ال گرەك-ريم كۇرەسىنەن بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزباەۆ بولسا, مۇنداي قولداۋ باپكەرلەرگە عانا ەمەس, سپورتشىلار ءۇشىن دە ءتيىمدى دەيدى.

ء«ار ەل سپورتشىلارىن ءوز دەڭگەيىندە قولدايدى. مۇنداي تاجىريبە رەسەي, اقش, قىتاي, ءتىپتى قىرعىزستاندا دا بار. مادەنيەت جانە سپورت ءمينيسترى داۋرەن اسكەربەك ۇلىنىڭ باستاماسىمەن جۇزەگە اسقان بۇل باعدارلاما ومىرشەڭ بولسا دەيمىن. بۇل تەك باپكەرلەرگە عانا ەمەس, سپورتشىلار ءۇشىن دە ءتيىمدى. سەبەبى بۇگىنگى سپورتشى – ەرتەڭگى باپكەر, سپورت فۋنكتسيونەرى. ولار ەندى الەم چەمپيوناتى مەن وليمپيادادا ولجا سالسا, كەلەشەكتە مەملەكەتتىڭ قولداۋىنا يە بولاتىنىن بىلەدى», دەيدى كۇمىس جۇلدەگەر.

سپورتشىلارعا ستيپەنديا تاعايىنداۋ تاجىريبەسى ءار ەلدە ءارتۇرلى. رەسەيدە وليمپيادا چەم­پيوندارى كارەراسىن اياقتا­عاننان كەيىن ايىنا 52 مىڭ رۋبل الادى. بۇل شامامەن – 385 000 تەڭگە. كۇمىس جانە قولا جۇلدەگەرلەردىڭ جالاقىسى – 39 جانە 30 مىڭ رۋبل. ال يندونەزيادا وليمپيادا چەمپيونىنا ءبىر رەتتىك سىياقى – 346 000 دوللاردى قۇراسا, ءارى قاراي ءومىرىنىڭ سوڭىنا دەيىن سپورتشى 1400 دوللار ستيپەنديا الىپ وتىرادى. اقش-تا جاعداي تىم بولەك. ولاردا NHL, MLS, NBA سەكىلدى ليگا چەمپيوناتتارى ءوز ارداگەرلەرىنە جىلىنا 65 000 دوللاردان جوعارى زەينەتاقى تولەيدى.

مىنا جەردە ءبىر دەرەكتى كەلتىرە كەتسەك. ەلىمىز وليمپيادا چەمپيو­نى مەن جۇلدەگەرلەرىنە تولەيتىن سىياقى مولشەرلەمەسى جاعىنان الەمدە ۇزدىكتەر قاتارىنا كىرەدى. بۇگىندە وليمپيادا چەمپيونى اتانعاندار – 250 000 كۇمىس جۇلدەگەر – 150 000, قولا جۇلدەگەر 75 000 دوللاردى يەمدەنەدى. وعان وبلىس­تان بەرىلەتىن پاتەر كىلتى مەن اۆتو­كو­لىكتى قوسىڭىز. ال وليمپيادا چەمپيونىنا ەڭ كوپ تولەيتىن ەل گونكونگ – 642 000 اقش دوللارى.

الەمدىك دودادا قازاقستاننىڭ كوك بايراعىن بيىك تۇعىردان جەلبىرەتكەن سايىپقىراندارىمىز قازاق سپورتى تاريحىندا التىن ارىپپەن جازىلارى ءسوزسىز. سون­دىقتان ەلىمىزدىڭ اتىن اسقاق بيىككە كوتەرگەن وسىنداي چەمپيوندارعا قانداي قۇرمەت پەن قوشەمەت كور­سەتسە دە جاراسادى.