قازاقستاننىڭ قاۋىپسىزدىگىنە اسەر ەتەتىن ىشكى جانە سىرتقى فاكتورلارعا بايلانىستى اسكەري پوليتسيانىڭ وكىلەتتىكتەرىن كەڭەيتۋ جوسپارلانۋدا.
جالپى وتىرىستا زاڭ جوباسىن قورعانىس ءمينيسترىنىڭ ورىنباسارى سۇلتان كامالەتدينوۆ تانىستىردى.
«بىرىڭعاي قولدانۋ جانە ءتۇسىندىرۋ ءۇشىن «قىزمەتكەر» تەرمينى «اسكەري قىزمەتشى» تەرمينىمەن اۋىستىرىلدى. اسكەري پوليتسيانىڭ ساياسي پارتيالاردىڭ قىزمەتىنە تاۋەلسىزدىك ءپرينتسيپى قوسىلدى. قارۋ مەن ارنايى فيزيكالىق اسەر ەتۋ قۇرالدارىن قولدانۋ رەتتەلدى», دەدى سۇلتان كامالەتدينوۆ.
زاڭ جوباسى قازاقستان رەسپۋبليكاسى قارۋلى كۇشتەرىنىڭ, ۇلتتىق قاۋىپسىزدىك كوميتەتىنىڭ جانە ۇلتتىق ۇلاننىڭ اسكەري پوليتسيا ورگاندارىنىڭ مارتەبەسىن, قۇزىرەتىن, قىزمەتىن ۇيىمداستىرۋدى جانە ءتارتىبىن ايقىنداۋعا باعىتتالعان. زاڭ جوباسىندا اسكەري پوليتسياعا اسكەري قىزمەت قاۋىپسىزدىگىن قامتاماسىز ەتۋدى ۇيىمداستىرۋدى ۆەدومستۆولىق باقىلاۋ فۋنكتسياسىن بەرۋ دە قاراستىرىلعان. اسكەري پوليتسيا قىزمەتكەرلەرىن الەۋمەتتىك-قۇقىقتىق قورعاۋ جانە كادر ماسەلەسى بويىنشا تولىقتىرۋلار ەنگىزىلۋدە, اسكەري پوليتسيا ورگاندارىنىڭ مەملەكەتتىك ورگاندارمەن جانە ۇيىمدارمەن, لاۋازىمدى تۇلعالارمەن ءوزارا ءىس-قيمىلى جانە ىنتىماقتاستىعى تاراۋى كەڭەيتىلدى.
قازاقستان رەسپۋبليكاسىنىڭ كەيبىر زاڭنامالىق اكتىلەرىنە اسكەري پوليتسيا ورگاندارىنىڭ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسىمەن قازاقستان رەسپۋبليكاسىنىڭ قىلمىستىق كودەكسىنە جانە بىرقاتار زاڭدارعا وزگەرىستەر مەن تولىقتىرۋلار ەنگىزىلەدى. «قورعانىس جانە قارۋلى كۇشتەر تۋرالى» زاڭعا قازاقستان رەسپۋبليكاسىنىڭ پرەزيدەنتى مەن قازاقستان رەسپۋبليكاسى قورعانىس مينيسترلىگىنە اسكەري جوسپارلاۋ جۇيەسىن بەكىتۋ جانە دامىتۋ وكىلەتتىكتەرىن بەرۋ ماقساتىندا وزگەرىستەر ەنگىزىلۋدە.
زاڭ جوباسىن ءماجىلىس ءبىرىنشى وقىلىمدا ماقۇلدادى.
