تاراپتار كولىك جانە اۆياتسيا سالاسى, ينفراقۇرىلىمدىق جوبالار, سونداي-اق ونەركاسىپ جانە جەر قويناۋىن يگەرۋ باعىتىنداعى ءوزارا ءتيىمدى بايلانىستىڭ كەلەشەگىن قاراستىردى. ونىڭ ىشىندە ەلىمىزدەگى اۋەجايلاردى باسقارۋ قىزمەتى, ينفراقۇرىلىمدىق جوبالاردى ىسكە اسىرۋ مەن پورتتاردى دامىتۋ, اقتاۋ پورتىندا كونتەينەرلىك حاب قۇرۋ, سونداي-اق ونەركاسىپ جانە جەر قويناۋىن يگەرۋ باعىتىنا ينۆەستيتسيا تارتۋ ماسەلەلەرى پىسىقتالدى.
بۇل ورايدا ۆەدومستۆو باسشىسى Adani Group-تىڭ باسقارما توراعاسىنا قازاقستانمەن ينۆەستيتسيالىق ىنتىماقتاستىققا قىزىعۋشىلىق تانىتقانى ءۇشىن العىسىن جەتكىزدى.
«قازاقستان وتاندىق اۋەجايلارعا شەتەلدىك ينۆەستيتسيالاردى تارتۋعا مۇددەلى. ويتكەنى بۇل جەرۇستى ينفراقۇرىلىمىن جاقسارتۋعا, ەلىمىزدىڭ اۋەجايلارىندا قاۋىپسىزدىك جانە جولاۋشىلارعا قىزمەت كورسەتۋ ساپاسىنىڭ ارتۋىنا اسەر ەتەدى. سونىمەن بىرگە Adani Group كومپانياسىمەن كولىك سەكتورىنداعى ينفراقۇرىلىمدىق جوبالاردى ىسكە اسىرۋ بويىنشا ارىپتەستىك ورناتۋعا دايىنبىز», دەدى ق.وسكەنباەۆ.
ەكونوميكالىق جانە يندۋستريالىق ايماقتار سالاسىنداعى قارىم-قاتىناس تۋرالى ايتا كەلە ينۆەستيتسيالىق جوبالاردى ىسكە اسىرۋ ءۇشىن قازاقستاندىق تاراپ ارنايى ەكونوميكالىق جانە يندۋستريالىق ايماق الاڭدارىن ۇسىندى. وسى رەتتە رەسپۋبليكا اۋماعىندا 13 ارنايى ەكونوميكالىق ايماق جانە 31 يندۋستريالىق ايماق جۇمىس ىستەيتىنىن ايتا كەتكەن ورىندى.
كەزدەسۋ سوڭىندا ەكى جاق ىسكەرلىك بايلانىسقا ريزاشىلىقتارىن ءبىلدىرىپ, قازاقستان مەن ءۇندىستان اراسىنداعى قارىم-قاتىناستى ودان ءارى دامىتۋدىڭ ماڭىزدىلىعىن اتاپ ءوتتى.
حالىقارالىق بايلانىستى كەڭەيتۋ جونىندەگى جوسپارلار شەڭبەرىندە Adani Group قازاقستانمەن ۇزاقمەرزىمدى ىنتىماقتاستىققا, سونداي-اق EPC+F فورماتى نەگىزىندە ينجەنەرلىك-قۇرىلىس قىزمەتتەرىن جەتكىزۋشى رەتىندە ەلەكتر جەلىلەرىن جاڭعىرتۋ جانە كەڭەيتۋگە بايلانىستى بىرلەسكەن جوبالاردى ىسكە اسىرۋعا ىنتالى.
