«مەن اۋىلدىق اۋماقتاردى دامىتۋ تۇجىرىمداماسىن ازىرلەۋدى تاپسىردىم. بۇل – مەنىڭ جاڭا پرەزيدەنتتىك وكىلەتتىگىم باستالعاننان كەيىنگى العاشقى جارلىعىم. كەلەسى جىل اۋىل تۇرعىندارىنىڭ ءال-اۋقاتىن ارتتىرۋعا جانە تۇرمىس ساپاسىن جاقسارتۋعا ارنالادى. تۇجىرىمدامانى ازىرلەۋگە مامانداردى, شارۋالاردى جانە جەرگىلىكتى قوعام بەلسەندىلەرىن تارتۋ قاجەت. اۋىلدى وركەندەتۋدىڭ مۇلدەم تىڭ تاسىلدەرى كەرەك», دەدى قاسىم-جومارت توقاەۆ.
سونداي-اق ول مۇنداي جۇمىستاردى ناقتى ىسكە اسىرۋ كەرەك دەپ ەسەپتەيدى. بۇدان بولەك, پرەزيدەنت جايىلىم ماسەلەسىنە دە نازار اۋداردى.
«جەر – اۋىلداعى تۇرعىنداردىڭ نەگىزگى تابىس كوزى. وكىنىشكە قاراي, ەلدى مەكەندەردىڭ توڭىرەگىندە جايىلىم جەتىسپەيدى. شامامەن 8,8 ميلليون گەكتار جەر تاپشى. مەنىڭ تاپسىرماممەن 5,2 ميلليون گەكتارعا جۋىق اۋىل شارۋاشىلىعى جەرى مەملەكەت مەنشىگىنە قايتارىلدى. بۇل – نەگىزىنەن, جايىلىمدىق جەرلەر. ەندى ۇكىمەت وبلىس اكىمدىكتەرىمەن بىرلەسىپ, جەردى ءبولىپ-تاراتۋ ءۇشىن مونيتورينگ كارتاسىن ازىرلەۋگە ءتيىس. سول ارقىلى جايىلىمدىق جەرگە مۇقتاج اۋىل حالقىنىڭ جاعدايىن جاسايمىز», دەدى مەملەكەت باسشىسى.
پرەزيدەنت ءبىرىنشى كەزەكتە اۋىل تۇرعىندارىنىڭ مۇددەسى قورعالۋى كەرەك ەكەنىن اتاپ ءوتتى.
«جالپى, «بارماق باستى, كوز قىستى» دەگەندى مۇلدەم دوعارۋ قاجەت. ءوزارا ىمىرالاسقان, استىرتىن شەشىم قابىلداۋعا بولمايدى. جەكەلەگەن شارۋاشىلىقتاردىڭ ەمەس, اۋىل تۇرعىندارىنىڭ مۇددەسى ءبىرىنشى ورىندا تۇرۋعا ءتيىس. اۋىل جۇرتىنىڭ كوپشىلىگىندە جەر ۇلەسى بار. بىراق حالىق ونىڭ يگىلىگىن كورە الماي وتىر. ازىق-ت ۇلىك قاۋىپسىزدىگى بۇكىل الەم بويىنشا باستى ماسەلەگە اينالدى. بيىل ءبىزدىڭ ەلدە استىق مول شىقتى. بىراق ەگىننىڭ ورتاشا شىعىمى ءالى دە تومەن. بۇل سالادا زاماناۋي تەحنولوگيانى قولدانۋ وتە ماڭىزدى. شارۋالاردى وسىعان ىنتالاندىرۋ كەرەك. سونداي-اق تىڭايتقىشتىڭ قولجەتىمدى بولۋىن قامتاماسىز ەتكەن ءجون. اۋىل شارۋاشىلىعى ءونىمىن وڭدەۋ ءىسىن جاقسارتۋعا باسا نازار اۋدارۋ قاجەت. مەملەكەت جىل سايىن اگروونەركاسىپ كەشەنىن دامىتۋعا 350 ميلليارد تەڭگەدەن استام سۋبسيديا بولەدى. سوعان قاراماستان, تەرەڭ وڭدەۋ ءوندىرىسى دامىپ جاتقان جوق», دەدى قاسىم-جومارت توقاەۆ.
