كەشتى «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى « ۇلىلارعا تاعزىم» جوباسى اياسىندا ۇيىمداستىرىپ وتىر.
ادەبي كەش بارىسىندا قالامگەردىڭ ءومىرى مەن شىعارماشىلىعى جانە قازاق كۇي ونەرىنە قوسقان ۇلەسى جايلى ۇزەڭگىلەس دوستارى مەن زامانداستارى ەستەلىكتەرىن بولىسەدى.
كونتسەرتتىك باعدارلامادا قالامگەردىڭ «سارىارقا», «داۋرەن-اي» جانە بۇرىن-سوڭدى شىرقالماعان اندەرى ورىندالادى. سونداي-اق, جانعالي ءجۇزباي, ەلمۇرا جاڭابەرگەنوۆا, ايتبەك نىعىزباەۆ, راۋشان ورازباەۆا, ەدىل باسىقارا, دىنيسلامبەك جايلاۋباي, اسقار مۇقيات, ءبىرجان ايتاحمەت, «استانا سازى» قازاق مەملەكەتتىك فولكلورلىق جانە «تURAN» فولكلورلى-ەتنوگرافيالىق انسامبلدەرى ونەر كورسەتەدى.
كەشكە عالىم, جازۋشى, اكادەميك, قر مەملەكەتتىك سىيلىعىنىڭ لاۋرەاتى, پروفەسسور قويشىعارا سالعارا ۇلى, حالىقارالىق «الاش» سىيلىعىنىڭ لاۋرەاتى, جازۋشى, عالىم, فيلولوگيا عىلىمدارىنىڭ دوكتورى, پروفەسسور تۇرسىن جۇرتباي, قر مەملەكەتتىك سىيلىعىنىڭ لاۋرەاتى, اقىن, جازۋشى نەسىپبەك ايت ۇلى, قازاقستاننىڭ ەڭبەك سىڭىرگەن قايراتكەرى, كۇيشى, كومپوزيتور ءشامىل ءابىلتاي, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى قايرات بايبوسىنوۆ قاتىسادى.
ايتا كەتەيىك, «قازاقكونتسەرت» مەملەكەتتىك كونتسەرتتىك ۇيىمى 2022 جىلدان باستاپ « ۇلىلارعا تاعزىم» جوباسىن باستادى. اتالمىش جوبا كورنەكتى جازۋشىلار مۇحتار اۋەزوۆتىڭ 125, عابيت مۇسىرەپوۆتىڭ 120, تالانتتى كومپوزيتورلار عازيزا جۇبانوۆانىڭ 95, ەركەعالي راحماديەۆتىڭ 90, قازاق وپەرا ونەرىنىڭ نەگىزىن سالۋشىلاردىڭ ءبىرى كۇلاش بايسەيىتوۆانىڭ 110, جەزتاڭداي ءانشى روزا باعلانوۆانىڭ 100 جىلدىق مەرەكەلەرىنە وراي ۇيىمداستىرىلىپ, داۋلەسكەر كۇيشى, كومپوزيتور, ديريجەر, حالىق قاھارمانى نۇرعيسا تىلەنديەۆتىڭ شىعارماشىلىعىنا ارنالدى.
