ۇلتتىق كوميسسيانىڭ ساراپشىلار توبى وڭىرلەرگە بارىپ, وسى ماسەلەنىڭ جاي-كۇيىن ەگجەي-تەگجەي زەرتتەدى. وتىرىس جۇمىسىنا ساراپتامالىق جانە عىلىمي قوعامداستىق وكىلدەرى, ۋاكىلەتتى ورگانداردىڭ باسشىلارى, وڭىرلەردەگى اكىمدەرىنىڭ ورىنباسارلارى مەن بالا قۇقىقتارى جونىندەگى ۋاكىلدەر, ورتالىق مەملەكەتتىك ورگانداردىڭ وكىلدەرى قاتىستى.
ۇلتتىق كوميسسيا توراعاسى, پرەزيدەنت اكىمشىلىگى باسشىسىنىڭ ورىنباسارى ايدا بالاەۆا بالالار ءۇشىن قولايلى جاعداي جاساۋ, ولاردى پاناسىز قالدىرماۋ, شاراسىز كۇيگە تۇسىرمەۋ – مەملەكەتىمىزدىڭ الەۋمەتتىك ساياساتىنىڭ ماڭىزدى باعىتى ەكەنىن اتاپ ءوتتى. وسى ماقساتتا الەۋمەتتىك جانە پروفيلاكتيكالىق شارالار كەشەنى ىسكە اسىرىلىپ جاتىر.
«بالالاردىڭ پاناسىز جانە قاراۋسىز قالۋىنىڭ الدىن الۋ ماسەلەسى ءالى دە وتكىر تۇر. بۇل بالالاردىڭ قاراۋسىز قالۋىنىڭ الدىن الۋ كەشەنىن قالىپتاستىرۋدىڭ جاڭا تاسىلدەرىن ىزدەۋدى تالاپ ەتەدى. كامەلەتكە تولماعانداردىڭ قاداعالاۋسىز قالۋ تاۋەكەلدەرىنىڭ الدىن الۋ جۇيەسىن جەتىلدىرۋ قاجەت. «قازاقستانداعى وتباسىن مەملەكەتتىك قولداۋ نەگىزدەرى تۋرالى» تۇجىرىمداماسىن ازىرلەۋ كەرەك. قۇجاتتا وتباسىن قورعاۋ سالاسىنداعى مەملەكەتتىك ساياساتتىڭ نەگىزگى باعىتتارى بەكىتىلۋگە ءتيىس. قوسىمشا ءبىلىم بەرۋ جانە بوس ۋاقىتتى ۇيىمداستىرۋ باعىتىندا شەشىلمەگەن ماسەلەلەر بار. قىلمىس جاساعان بالالارعا ارنايى قالپىنا كەلتىرۋ الەۋمەتتىك باعدارلامالار قاجەت. بۇل بالانىڭ جەكە باسىمەن جۇمىس ىستەۋگە مۇمكىندىك بەرەدى», دەدى ۇلتتىق كوميسسيا توراعاسى.
كوميسسيا وتىرىسىندا وقۋ-اعارتۋ ءمينيسترى اسحات ايماعامبەتوۆ بالالاردىڭ قاراۋسىز جانە پاناسىز قالۋىنىڭ الدىن الۋ باعىتىندا قولعا الىنعان ءىس-شارالار جانە وسى سالاداعى جۇمىس جۇيەسىن جەتىلدىرۋ جايىندا ءسوز سويلەدى.
ىشكى ىستەر ءمينيسترىنىڭ ورىنباسارى يگور لەپەحا اتا-انالاردىڭ بالالارىنىڭ مىنەز-قۇلقىن باقىلاماۋى سالدارىنان ولاردىڭ قۇقىق بۇزۋشىلىققا بارىپ, قىلمىس جاسايتىنىن اتاپ ءوتتى. جىل باسىنان بەرى 73 مىڭنان استام اتا-انا اكىمشىلىك جاۋاپكەرشىلىككە تارتىلىپ, كامەلەتكە تولماعانداردىڭ تۇنگى ۋاقىتتا مەكەمەلەردە بولۋىنا جول بەرگەنى ءۇشىن 1,5 مىڭعا جۋىق ويىن-ساۋىق مەكەمە يەسىنە جازا تاعايىندالعان.
پروفيلاكتيكالىق جۇمىستىڭ قازىرگى زامانعى تاجىريبەسى قورعاۋ-ساقتاۋ تۇجىرىمداماسى قاعيداتتارىنا نەگىزدەلەدى جانە «تاۋەكەل توبىنداعى» بالالار مەن وتباسىلارعا الەۋمەتتىك-قۇقىقتىق, پسيحولوگيالىق-مەديتسينالىق-پەداگوگيكالىق كومەك كورسەتەتىن ءارتۇرلى ۆەدومستۆولىق مەكەمەلەردىڭ كەڭ جەلىسىن قامتيدى.
بۇۇ دامۋ باعدارلاماسىنىڭ الەۋمەتتىك ماسەلەلەر جونىندەگى ۇلتتىق ساراپشىسى سۆەتلانا جاقىپوۆا جەدەل شارالار قابىلداۋ جانە بالالاردىڭ پاناسىز قالۋى پروبلەمالارىن شەشۋ ءۇشىن ينتەگراتسيالانعان الەۋمەتتىك قىزمەتتەر ينستيتۋتىن ەنگىزۋ قاجەتتىلىگى تۋرالى تولىعىراق ايتىپ بەردى.
ء«بىر تسيفرلى پلاتفورمادا ءارتۇرلى سالالاردىڭ ء(بىلىم بەرۋ, دەنساۋلىق ساقتاۋ, الەۋمەتتىك قورعاۋ, قۇقىق قورعاۋ ورگاندارى – ارقايسىسى ءوز قۇزىرەتى شەگىندە) ساراپشىلارى جۇمىس ىستەيدى. بۇل مۇقتاج وتباسىلارعا قاجەتتى مەملەكەتتىك قىزمەتتەردى جەدەل جانە ءتيىمدى كورسەتۋگە مۇمكىندىك بەرەدى. نازاردان تىس قالعان ءار ءىستى مەملەكەتتىك قىزمەت ىستەرى اگەنتتىگى باقىلايدى. بۇل شەشىم وسىنداي وتباسىلارعا قولداۋ شارالارىن كورسەتۋ مەرزىمدەرىن جانە تيىسىنشە مەملەكەتتىك ورگانداردىڭ اكىمشىلىك شىعىستارىن قىسقارتۋعا مۇمكىندىك بەرەدى», دەپ اتاپ ءوتتى سپيكەر.
وتباسىلىق دامۋ جانە بالالار قاۋىپسىزدىگى ماسەلەلەرى جونىندەگى ۇلتتىق كوميسسيانىڭ ساراپشىلارى بىرقاتار وزەكتى ماسەلەگە توقتالدى. ولاردىڭ قاتارىندا اتا-انا جاۋاپكەرشىلىگىن كۇشەيتۋ, يۋۆەنالدى پوليتسيانىڭ ءرولىن ارتتىرۋ, كەشەندى الدىن الۋ شارالارىن ۇيىمداستىرۋدىڭ جاڭا تاسىلدەرى بار.
ۇلتتىق كوميسسيا توراعاسى ا.بالاەۆا وقۋ-اعارتۋ مينيسترلىگىنە مەكتەپتەردەگى پروفيلاكتيكالىق قىزمەت پەن باقىلاۋدىڭ بىرىڭعاي ستاندارتتارىن ازىرلەپ, ەنگىزۋدى تاپسىردى. بۇل رەتتە ول وسى باعىتتاعى بارلىق ۋاكىلەتتى ورگانداردىڭ بەلسەندى دايەكتى جۇمىسى قاجەت ەكەنىن اتاپ ءوتتى.
اقپارات جانە قوعامدىق دامۋ مينيسترلىگى الەۋمەتتىك وسال وتباسىلاردى قولداۋ, سونداي-اق پروفيلاكتيكالىق ەسەپتە تۇرعان كامەلەتكە تولماعانداردىڭ بوس ۋاقىتىن ۇيىمداستىرۋ جونىندەگى جۇمىسقا ازاماتتىق سەكتوردى كەڭىنەن تارتا وتىرىپ, الدىن الۋ شارالارىن ازىرلەۋگە ءتيىس.
قاراۋسىز قالعان بالالاردىڭ قىلمىسقا ءۇيىر كەلەتىنى ەشكىمگە جاسىرىن ەمەس. وسىعان وراي وتىرىس بارىسىندا باقىلاۋسىز جۇرگەن جەتكىنشەكتەردىڭ قىلمىستىلىعىنىڭ الدىن الۋدا يۋۆەنالدى پوليتسيانىڭ ءرولىن ارتتىرۋدىڭ ماڭىزى دا ءسوز بولدى. مۇددەلى قۇرىلىمدار مەن جەرگىلىكتى اتقارۋشى ورگانداردى تارتا وتىرىپ, قاراۋسىز قالعان بالالاردى انىقتاۋ ماقساتىندا توقسان سايىن كەڭ اۋقىمدى رەيد جۇرگىزۋدى قايتا باستاۋ قاجەت. ۇلتتىق كوميسسيا وڭىرلىك دەڭگەيدە بالالاردىڭ قاداعالاۋسىز جانە پاناسىز قالۋىنىڭ الدىن الۋ سالاسىنا تولىققاندى مونيتورينگ جۇرگىزۋدى جالعاستىرادى.
