ايماقتار • 07 جەلتوقسان، 2022

ۇلىتاۋدا بالالارعا ارنالعان قايىرىمدىلىق سپورت زالى اشىلدى

ۇلىتاۋ وبلىسىنىڭ جەزدى جانە تالاپ اۋىلدارىندا بالالارعا ارنالعان قايىرىمدىلىق سپورت زالدارى اشىلدى، دەپ حابارلايدى Egemen.kz.

جانبولات كەنجەعۇل

زالدار «قازاقستان حالقىنا» قوعامدىق قورىنىڭ «24 بالالار سپورت زالى» قايىرىمدىلىق جوباسى اياسىندا جاراقتاندىرىلدى.

ەكى زال ورتا مەكتەپتەردىڭ عيماراتىندا اشىلدى. وسىعان دەيىن اۋىلداردا سپورتپەن اينالىسۋ ءۇشىن قاجەتتى زاماناۋي ورىن بولمادى. ەندى جەرگىلىكتى بالالار «قازاقشا كۇرەس»، بوكس سىندى سەكتسيالارىنا تۇراقتى قاتىسۋىنا مۇمكىندىك الدى.

«زالدا بارلىق قاجەتتى سپورت قۇرالدارى بار. بىزگە ارنايى فورما بەرىلدى. مەن ءبىرىنشى رەت قاتىسىپ جاتىرمىن. قۋانىشتىمىن! جەزدىدەن شىققان بالالار چەمپيون بولادى»، دەيدى جەزدى اۋىلىنداعى ورتا مەكتەپ وقۋشىسى نياز قاناتبەك.

«قازاقستان حالقىنا» قورى باعدارلامانى سەرىكتەسى «باتىر بولامىن!» قوعامدىق قورىمەن ىسكە اسىرۋدا.

«اۋىل – ەلىمىزدىڭ التىن بەسىگى. سوندىقتان اۋىلدى جەردە بالالار ءۇشىن سپورتپەن شۇعىلدانۋعا جاعداي جاساۋ، ادامگەرشىلىك تاربيەنى قالىپتاستىرۋ ماڭىزدى. سونىمەن قاتار ءبىز جاتتىقتىرۋشىلاردىڭ بىلىكتىلىگىن ارتتىرۋ ماقساتىندا وقىتۋ جانە تاجىريبە الماسۋ جۇرگىزۋدى ماقسات ەتىپ وتىرمىز»، دەپ اتاپ ءوتتى اشىلۋ سالتاناتىندا «باتىر بولامىن!» قوعامدىق قورىنىڭ ۆيتسە-پرەزيدەنتى ەرنۇر سابىكەن ۇلى.

«قازاقستان حالقىنا» قورىنىڭ جۇزەگە اسىرىپ جاتقان «24 بالالار سپورت زالى» جوباسىنىڭ ماقساتى – ەلىمىزدىڭ شالعايداعى ەلدى مەكەندەرىندە نەمەسە سپورتقا قولجەتىمدىلىك دەڭگەيى تومەن اۋىلدىق جەرلەردە بالالار سپورتىنىڭ قولجەتىمدىلىگىن ارتتىرۋ. جوبانىڭ ماقساتتى اۋديتورياسى – از قامتىلعان جانە كوپبالالى وتباسىلاردان شىققان 5 جاستان 18 جاسقا دەيىنگى بالالار، سونداي-اق دامۋ ەرەكشەلىگى (ينكليۋزيۆتىلىگى) بار بالالار.

ايتا كەتەيىك، 24 زالدى اشۋعا ارنالعان قايىرىمدىلىق باعدارلاماسىنىڭ بيۋدجەتى – 183 623 000 تەڭگە. بۇگىنگى تاڭدا ەلىمىز بويىنشا 11 زال اشىلعان.