بالا ءدىلمارلار باس قوسقان وي باسەكەسىنە ەلىمىزدىڭ 15 وبلىسى مەن 3 قالاسىنان بۇعان دەيىن وتكەن ىرىكتەۋدە جۇزدەن جۇيرىك دەپ تانىلعان 28 وقۋشى قاتىسىپ, ءسوز سايىسىنا ءتۇستى. شەشەندىك بايقاۋ قوس بولىمنەن تۇردى. العاشقى بولىمدە قاتىسۋشىلار جەرەبە ارقىلى تاقىرىپ تاڭداپ, جارتى ساعاتتىق جەكپە-جەك تۇرىندەگى شەشەندىك سايىستا باق سىنادى. وندا كوركەمدىك, جۇيەلىلىك, ناقتىلىق, وي ۇشقىرلىعى, ءتىل تازالىعى, داۋىس مانەرى, ساحنا مادەنيەتىن ساقتاۋ ساراپقا سالىندى. ال 2-بولىمدە بالا ءدىلمارلار الدىن الا بەرىلگەن بي-شەشەندەردىڭ ءسوزىن جاتقا ايتۋدان جارىستى.
– شەشەندىك سايىستى وتكىزۋدىڭ باستى ماقساتى – جاڭا بۋىن, جاس ۇرپاقتى ءتىل تازالىعىن ساقتاۋعا, مەملەكەتتىك ءتىلدى مەيلىنشە جەتىك بىلۋگە باۋلۋ. شەشەندىك ونەر ارقىلى بىلىمگەرگە ءسوز ونەرىنىڭ ەرەكشەلىگى مەن جۇيەلى ءسوز ساپتاۋ شارتتارىن مەڭگەرتۋ, جۇيەلى سويلەۋ داعدىسى مەن سويلەۋ شەبەرلىگىن شىڭداۋ كوزدەلىپ وتىر. وسكەلەڭ ۇرپاق ءسوز قۇندىلىعىن باعالاپ, تاريحي-مادەني جانە ۇلتتىق بولمىسىن تانىسا, سول ارقىلى ادەبي ءتىل نورماسىنا سايكەس مەملەكەتتىك ءتىلدى قولدانۋدىڭ جاڭا دەڭگەيى قالىپتاسسا دەگەن تىلەگىمىز بار, – دەيدى جوبا اۆتورى, جۋرناليست, شەشەندىك ءسوز ونەرى ءپانىنىڭ مۇعالىمى جارقىن سالەن ۇلى.
قازىلار القاسىنىڭ شەشىمىمەن باس جۇلدەنى اباي اتىنداعى رەسپۋبليكالىق مامانداندىرىلعان مەكتەپ ينتەرناتىنىڭ وقۋشىسى نەسىپباي شاميل يەلەندى. ءى ورىن استانا قالاسى, جەلىلىك اباي مەكتەبىنىڭ شاكىرتى ۇلپان ارعىنباەۆاعا, ال قوس بىردەي ءىى ورىن – الماتىلىق ايدانا قايىپ پەن اباي وبلىسىنان كەلگەن نۇرايىم تۇرسىنوۆاعا تابىستالدى. بورتە قاپسەمەت (اباي وبلىسى), ىڭكار ابىلقايىرقىزى (جەتىسۋ وبلىسى), اميرحان حايداروۆ (بقو), اسەم اناركۋلوۆا (شىمكەنت قالاسى) ءىىى ورىن يەگەرى اتاندى.
سونداي-اق نۇرباقىت امانگەلدى (ماڭعىستاۋ وبلىسى), الۋا دۋلاتوۆا (اقمولا وبلىسى), ءاسيا بالتاباي (تۇركىستان وبلىسى), اقەركە نۇرجانقىزى (الماتى وبلىسى), ايدانا قونىس (اقتوبە وبلىسى), ەلباقىت ەربولات (شقو) سىندى ايرىقشا ونەرىمەن كوزگە تۇسكەن شاكىرتتەرگە ارنايى جۇلدە بەرىلدى.
جەڭىمپازدار اقشالاي سىيلىقپەن جانە العىسحاتتارمەن ماراپاتتالدى. بايقاۋعا ءۇشىنشى جىل قاتارىنان «زەينوللا سانىك اتىنداعى مادەنيەت قورى» دەمەۋشىلىك جاساپ كەلەدى.
الماتى
