ايماقتار • 05 جەلتوقسان، 2022

ەكىباستۇز: جىلۋ جەلىلەرىندە تەڭگەرىمسىزدىك بايقالۋدا

ەكىباستۇزدا قالعان كوپقاباتتى 12 ۇيدە پاتەرارالىق قۇبىرلار مەن جىلۋ باتارەيالارىن اۋىستىرۋ جۇمىستارى جالعاسۋدا. جوندەۋ بريگادالارىنا 851 ادام جۇمىلدىرىلعان.

مۇرات قاپان ۇلى

قازىر بارلىق ءۇيدىڭ جەرتولەسىنە جىلۋ تاسىمالداعىشتار كىرگەن. جۇمىستار قىزۋ ءجۇرىپ جاتقان 12 ءۇيدىڭ كەيبىر پودەزدەرىندەگى قۇبىرلارعا جىلۋ جۇگىرۋدە. الايدا ۇيلەردى جىلۋمەن تولىق قامتۋ ازىرشە مۇمكىن بولماي تۇر.

بۇگىنگى ساعات 19.30-داعى مالىمەت بويىنشاپاتەرلەرگە 2000 جىلۋ باتارەياسى ورناتىلدى. قوردا قوسىمشا 4000 باتارەيا بار.

«نەگىزگى پروبلەما تۋىنداپ تۇرعان ۇيلەر – ساتباەۆ كوشەسى، №8 ۇيدەگى 3، 4، 5، 6-ىنشى كورپۋستار، ءماشھۇر ءجۇسىپ كوشەسى، 52-ۇيدەگى 3، 4، 5، 6-ىنشى كورپۋستار، ءماشھۇر ءجۇسىپ كوشەسىندەگى، 55، 46، 46ا، باۋىرجان مومىش ۇلى كوشەسى، №68-ۇيلەر. قۇبىرلار مەن رەگيستەرلەردى اۋىستىرۋ جۇمىستارى تاۋلىك بويى جۇرۋدە»، دەدى جەدەل شتاب وتكىزگەنكەشكى بريفينگتە پاۆلودار وبلىسى اكىمىنىڭ مىندەتىن اتقارۋشى ولەگ كرۋك.

قالا باسشىسى ايان بەيسەكين اۋىزسۋ جۇيەلەرى قاتىپ قالعان 28 ۇيدە قۇبىرلاردى ءجىبىتۋ جۇرگىزىلىپ جاتقانىن اتاپ ءوتتى. مۇنداي ۇيلەر سانى - 46.

«جىلۋ جەلىلەرىندە وتە ۇلكەن تەڭگەرىمسىزدىك بايقالادى. كەيبىر پاتەر يەلەرى ۇيلەرىنىڭ اسا ىستىق ەكەنىن، ايازدا تەرەزە اشىپ وتىرعاندارىن ايتادى. ال وزگە اۋماقتاردا جىلۋ پارامەترلەرى دۇرىس كوتەرىلمەي تۇر. ەندى ءبىر پيك-تەر قالادا اپات ورىن العان كۇنى وزدەرىنە قاراستى ۇيلەردىڭ جىلۋ جەلىسىندەگى سۋدى اعىزىپ جىبەرگەن. سەبەبى ونداعى قىسىم مەن جىلۋ كورسەتكىشتەرى وتە تومەن بولعان دەپ وتىر. شاھاردا 420 كم جىلۋ جەلىسى بار. بۇل توراپتاردىڭ بارلىعىن رەتتەۋ، تەڭگەرىمگە كەلتىرۋ ءالى دە بولسىن ءبىراز ۋاقىتتى قاجەت ەتەدى»، دەپ اتاپ ءوتتى ول.

جىلۋدان اجىراپ تۇرعان جەر ۇيلەرگە دە جوندەۋ بريگادالارى جىبەرىلۋدە. الايدا بۇل جەرلەردەگى قالپىنا كەلتىرۋ جۇمىستارىندا سۋ كوپ ىسىراپ بولۋىنا بايلانىستى بارلىق ءۇيدى ءبىر مەزگىلدە قوسۋ مۇمكىن ەمەس ەكەن.

ايتىپ وتەيىك، جىلۋ جەلىلەرى ءالى دە قالپىنا كەلمەگەن 12 ۇيدە شامامەن 1200-دەي پاتەر بار.