ەكىباستۇزداعى بارلىق ءۇيدىڭ جەرتولەسىنە جىلۋ كىردى

بۇل تۋرالى ەكىباستۇزداعى اپاتتى قالپىنا كەلتىرۋ جونىندەگى جەدەل شتابتىڭ وكىلدەرى وتكىزگەن ءباسپاسوز ءماسليحاتىندا ايتىلدى.

- قازىر ەكىباستۇز جەو-دان شىعاتىن جىلۋ جەلىلەرىندەگى تەمپەراتۋرا 82-دە 59 گرادۋستى كورسەتىپ وتىر. اپات سالدارىنان جىلۋدان اجىراپ قالعان بارلىق ۇيلەردىڭ جەرتولەسىنە دەيىن جىلۋ كىرگىزىلدى، جىلۋ اينالىمى قالپىنا كەلە باستادى. جوندەۋ بريگادالارى بۇگىنگە دەيىن ۇيلەردىڭ ىشىندەگى 850 جىلۋ باتارەيالارىن ايىرباستادى. تاڭەرتەڭ قولىمىزدا 2500 دانا جىلۋ باتارەياسى بولعان. سوندىقتان پاتەرلەرى جىلۋعا ەندى قوسىلا باستاعان 11 تۇرعىن ۇيگە قوياتىن جىلۋ رادياتورلارىمىز جەتكىلىكتى.

پاۆلودار وبلىسى اكىمىنىڭ مىندەتىن ۋاقىتشا اتقارۋشى ولەگ كرۋكتىڭ ايتۋىنشا، ىسىراپ بولىپ جاتقان سۋ كولەمى شامامەن 360 توننا، كاسىپورىن بۇعان قوسىمشا تاعى 350 تونناداي جوعالتىپ وتىر.

- كوپ جۇمىستار جۇرگىزىلدى. وكىنىشكە قاراي كەيبىر ۇيلەردە پيك-تەر ءتيىستى شارالاردى ۋاقىتىلى اتقارماعان. سونىڭ سالدارىنان جۇيەلەر قاتىپ قالعان. قازىرگى كۇنى ساتباەۆ كوشەسى، 8 ءۇي، ءماشھۇر ءجۇسىپ كوشەسى، 52 ءۇي، اۋەزوۆ كوشەسىندەگى №47، 46، 46ا، شەشەمبەكوۆ كوشەسى، 19ا ۇيلەرىندە قيىندىقتار تۋىنداۋدا. شتاب جەتەكشىسى، ۇكىمەت باسشىسىنىڭ ءبىرىنشى ورىنباسارى رومان سكلياردىڭ تاپسىرماسىمەن ءار ۇيگە بەلگىلى ءبىر كاسىپورىندار بەكىتىلدى. الگى كاسىپورىنداردىڭ باسشىلارى قالپىنا كەلتىرۋ جۇمىستارىنىڭ باسى-قاسىندا وزدەرى ءجۇر.  بۇل جاعداي بارلىق زاقىمدانۋ تولىق قالپىنا كەلتىرىلگەنشە ساقتالادى. ۇيلەردى جىلۋعا قوسۋ جاقىن ۋاقىتتا اياقتالادى دەپ وتىرمىز، - دەدى ول.

شتاب وكىلدەرى اپاتتى جويۋ شارالارىنا بەلسەندى اتسالىسىپ جاتقان «ساەم» كومپانياسىنا، «شىعىس» كەنىشى، ماەس-1، ماەس-2 ستانسالارىنا، «بوزشاكول» كبك-عا، «بوگاتىر كومىر» جانە كەگوك كاسىپورىندارىنىڭ باسشىلىعىنا، سونداي-اق ءوز جۇمىسىن ادال اتقارىپ جۇرگەن پيك-تەردىڭ وكىلدەرىنە العىس ءبىلدىردى.

ايازدا تۇرعىندار مەن جوندەۋ بريگادالارىنا ىستىق شاي مەن اس-اۋقات تاسىپ جۇرگەن ەرىكتىلەردىڭ ەڭبەگى دە ماقتاۋعا لايىق.

قالا باسشىسى ايان بەيسەكيننىڭ ايتۋىنشا، اپاتتان زارداپ شەككەن تۇرعىنداردىڭ بارلىق شىعىنىن وتەۋدى «ورتالىق-ازيا ەلەكتروەنەرگەتيكالىق كورپوراتسياسى» اق ءوز مىندەتىنە الىپ وتىر.

اتاپ وتەرلىگى، قالپىنا كەلتىرۋ، جوندەۋ جۇمىستارىندا پايدالانىلىپ جاتقان قۇبىرلار مەن رادياتورلار «ورتالىق-ازيا ەلەكتروەنەرگەتيكالىق كورپوراتسياسى» اق-نىڭ جانە دەمەۋشىلەردىڭ ەسەبىنەن ساتىپ الىنىپتى. بارلىق كوپقاباتتى تۇرعىن ۇيلەردىڭ جىلۋ توراپتارى قالپىنا كەلگەن سوڭ جوندەۋ بريگادالارى سۋىق سۋ قۇبىرلارىن جىبىتۋگە جانە جۇيەلەرى قاتىپ جاتقان 70 جەكە ءۇيدىڭ قۇبىرلارىن رەتتەۋگە اتتانادى.

بۇعان قوسا وجپ-52 نىسانىنا جانە وزگە دە ماگيسترالدەرگە قوسىلعان بىرنەشە الەۋمەتتىك نىساننىڭ جۇيەلەرىن دۇرىستاۋ كوزدەلىپ وتىر.