رۋحانيات • 04 جەلتوقسان، 2022

كىتاپ كوكجيەگى كەڭەيىپ كەلەدى

زاڭعار جازۋشى ءابىش كەكىلبايدىڭ «ادامدى ادام ەتكەن كىتاپ، ادامزات ەتكەن كىتاپحانا» دەگەن پاراساتتى ءسوزى كىتاپ پەن كىتاپحانانىڭ ءبىزدىڭ ءومىرىمىز ءۇشىن قانشالىقتى ماڭىزى زور ەكەنىن ءتۇسىندىرىپ بەرە الادى. قالاي دەسەك تە، ءبىزدىڭ ءار جەتىستىگىمىزدىڭ ءتۇپ قاينارى عاسىرلار تابى تۇسكەن، سارعايعان پاراقتار مەن سونى ساقتايتىن «جۇرەگى بار ۇيلەردىڭ» ەنشىسىندە ەكەنى شىندىق.

دۇيسەنالى الىماقىن

جاڭا ايدى جاقسىلىقپەن اشقىسى كەلگەن ۇلتتىق اكادەميالىق كىتاپحانادا مادەنيەت جانە سپورت مينيسترلىگىنىڭ قولداۋىمەن رەسپۋبليكالىق «جاس كىتاپحاناشى – 2022: جاڭا مۇمكىندىكتەر ۋاقىتى» اتتى ىسكەرلىك كەزدەسۋ ءوتتى.

اتالعان كەزدەسۋدىڭ ماقساتى – رەسپۋبليكامىزدىڭ ءار وڭىرىنەن جينالعان جاس كىتاپحاناشىلاردىڭ ءوزارا تاجىريبە الماسۋىنا ىقپال ەتۋ، ىسكەرلىك قابىلەتتەرىن دامىتۋ. جاس مامانداردىڭ تاڭداعان ماماندىعى تۋرالى ويىن ءبىر جۇيەگە كەلتىرىپ، ءونىمدى ءارى ساپالى جۇمىس ىستەۋىنە كومەكتەسۋ. ىسكەرلىك كەزدەسۋ اياسىندا اشىق ديالوگ الاڭى، TEDx فورماتىنداعى جاس كىتاپحاناشىلار كەيستەرىنىڭ تانىستىرىلىمى، موبيلوگرافيا، پودكاستينگ نەگىزدەرى، SMM-تەحنولوگيالارى. تارگەتينگ، كوممۋنيكاتيۆتى كوماندا قۇرۋ، «قاراڭعىداعى ديالوگ» ءموبيلدى جانە پسيحولوگيالىق ترەنينگتەرى، ادەبي PARTY، «كانن» فەستيۆالىندە گران-پري يەلەنگەن قىسقامەتراجدى ء«شاي» (وزبەكستان) ءفيلمىنىڭ قازاقشا تيفلوكومەنتاري نۇسقاسى، سونداي-اق «جىل تاڭداۋى – 2022» قورىتىندىلاۋ سالتاناتى دا ءوز دەڭگەيىندە جالعاستى.

ءىس-شاراعا نازارباەۆ ۋنيۆەرسيتەتى عىلىمي كىتاپحاناسىنىڭ باس ساراپشىسى پ.لاپو، قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ ءباسپاسوز حاتشىسى بيبىگۇل قۇلامان، SMM مەنەدجەر ايگەرىم ەرجانوۆا، پودكاستەر ەلدار قۇدايبەرگەنوۆ، موبيلوگراف مامان نۇرجان نۇرلان ۇلى، پسيحولوگتار سالتانات اسكەربەكقىزى مەن ۆەرونيكا بالگارسكايا، اقىندار سالتانات قايىربەك، شەرحان تالاپ، ايزادا راحىمجانوۆا، ايان مەيراش ت.ب. قالامگەرلەر مەن ستۋدەنتتەر، ءبىر توپ زيالى قاۋىم وكىلدەرى قاتىسىپ، ءوز ويلارىن ورتاعا سالدى.

بۇل كەزدەسۋگە قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى، نازارباەۆ ۋنيۆەرسيتەتىنىڭ عىلىمي كىتاپحاناسى، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسى، قازاقستاننىڭ وبلىستىق كىتاپحانالارى سەرىكتەس بولدى.

گەپ