«وزەكتى ماسەلەنىڭ ءبىرى - رۇقسات ەتىلمەگەن پوليگوندار سانىنىڭ ءوسۋى. كوسمومونيتورينگ ناتيجەسىندە 386 پوليگون انىقتالدى. ونىڭ 51-ءى, ياعني 13 پايىزى جويىلدى. بۇل وتە تومەن كورسەتكىش. ستيحيالىق پوليگونداردىڭ پايدا بولۋ سەبەپتەرىنىڭ ءبىرى – قاتتى تۇرمىستىق قالدىقتاردى توگەتىن زاڭداستىرىلعان پوليگوندارىنىڭ بولماۋى. قوقىستاردى ۋاقىتشا ورنالاستىرۋدىڭ 170 وبەكتىسىنىڭ تەك بەسەۋى نەمەسە 2,9 پايىزى عانا ەكولوگيالىق جانە سانيتارلىق تالاپتارعا سايكەس كەلەدى. وسىنى ەسكەرە وتىرىپ, اكىمدىككە رۇقسات ەتىلمەگەن پوليگونداردى جويۋ جونىندەگى جۇمىستى كۇشەيتۋ, جاڭا پوليگونداردى سالۋ, زاڭداستىرۋ ماسەلەلەرىن قاراۋ, سونداي-اق كوممۋنالدىق قالدىقتاردى باسقارۋ جونىندەگى باعدارلامانى ازىرلەۋ جانە بەكىتۋ ۇسىنىلادى», دەپ مىندەت جۇكتەدى سەرىكقالي برەكەشەۆ.
مينيستر كەلتىرگەن دەرەك بويىنشا بيىل وبلىسقا قاراستى سەمەي, اياگوز قالالارىندا اۋانىڭ لاستانۋ دەڭگەيى جوعارىلاعان. بولىنگەن زياندى قالدىقتاردىڭ باسىم بولىگى جىلۋ ەنەرگەتيكاسى كاسىپورىندارىنا تيەسىلى.
