قارجى • 02 جەلتوقسان، 2022

تسيفرلىق تەڭگە قولدانىسقا ەنەدى

122 رەت كورسەتىلدى

قازاقستان ۇلتتىق بانكىنىڭ حابارلاۋىنشا، تسيفرلىق تەڭگە تۋرا­لى جالعان اقپاراتتار تارالىپ جاتىر. بۇل رەتتە تولەم جانە قارجى تەحنولوگيالارىن دامىتۋ ورتالىعى مۇنداي الاياقتىق ارە­كەت­تەر­دەن ساق بولۋعا شاقىرادى.

تسيفرلىق تەڭگە توڭىرەگىندە قىزىعۋشىلىق ارتقاندىقتان الاياقتار جوبا تۋرالى اقپاراتتى تەرىس ماقساتتا پايدالانىپ، جۇرت­تى اداستىرۋعا كوشتى. مەس­سەند­جەرلەر دە جاڭالىقتار شىعا­رىلىمى فور­ماتىندا قولما-قول اقشانى تسيفر­لىق تەڭگەمەن اۋىستىرۋ تۋرالى فەيك اقپاراتتار مەن ۆيدەوروليكتەر تاراپ جاتىر. ال تسيفرلىق تەڭگە جوباسىنا ينۆەستيتسيا سالۋدى جارنامالاۋشىلار الاياقتىقتى ىسكە اسىراتىن سايتتاردى جاساۋعا كوشكەن. بۇل حابارلامالاردىڭ بار­لى­عى دا شىندىققا جاناس­پايدى.

«تسيفرلىق تەڭگە قولما-قول جانە قولما-قول اقشاسىز اۋدارىم­دار­دىڭ ورنىن اۋىستىرۋ ءۇشىن شىعارىلماعان، ول قولدانىستا قاتار جۇرەتىن بولادى. تسيفرلىق ۆاليۋتا بىرەگەي تەحنولوگيالىق سيپات­تامالاردىڭ ارقاسىندا قازاق­ستان­نىڭ ۇلت­تىق تولەم جۇيەسىن ودان ءارى دامى­تۋدى كوزدەيدى، ونىڭ ىشىندە ينتەرنەتسىز تولەم جاساۋ مۇم­كىن­دىگى دە پايدا بولادى. قا­زىر «تسيفرلىق تەڭگە» جوباسى ازىرلەۋ جانە سىناقتان وتكىزۋ كەزەڭىندە تۇر. ۇلتتىق تسيفرلىق ۆاليۋتانى ەنگىزۋ بويىنشا ناقتى شەشىم وسى جىلدىڭ سوڭىنا دەيىن قابىلدانادى دەپ جوسپارلانىپ وتىر. ال ۇلتتىق بانك تسيفرلىق ۆاليۋتانىڭ ارتىقشىلىقتارى مەن تاۋەكەلدەرىن، ونىڭ اقشا-كرەديت سايا­ساتىنا، قارجىلىق تۇ­راق­­­­تىلىققا جانە تولەم قىز­مەتى نارى­­عى­نا اسەرىن جان-جاقتى زەرتتەپ جاتىر»، دەلىنگەن ۇلتتىق بانك حابارلاماسىندا.

ايتا كەتەيىك، تسيفرلىق تەڭگە جوباسى تۋرالى رەسمي اق­پا­رات كوزى – ۇلتتىق بانكتىڭ (nationalbank.kz) رەسمي سايتى جانە تقتدو-نىڭ payfintech.kz سايتى. وزگە سايت­تاردىڭ، اسىرەسە «.kz» دو­مەن­دىك كەڭىستىگىنەن تىس تىر­كەلگەن سايتتاردىڭ بۇل جوباعا ەش قاتىسى جوق. كەڭەس الۋ ءۇشىن ۇلتتىق بانكتىڭ 1477 بايلانىس ورتالىعىنا حابارلاسۋعا بولادى.

سوڭعى جاڭالىقتار

ۇقساس جاڭالىقتار