قوعام • 01 جەلتوقسان، 2022

ساپالى ينتەرنەت قولجەتىمدى

استانا قالاسىنىڭ تۇرعىن الابتارىن ساپالى ينتەرنەتپەن قامتاماسىز ەتۋ وتە وزەكتى. حالىق تىعىز قونىستانعان ەلورداداعى ينتەرنەت ساپاسى تۋرالى استانا قالاسىنىڭ تسيفرلاندىرۋ جانە مەملەكەتتىك قىزمەت باسقارماسى تسيفرلاندىرۋ ءبولىمىنىڭ باس مامانى عاني باقداۋلەت بايانداپ بەردى.

دۋمان اناش

ول استانا قالاسىنىڭ تسيفرلاندىرۋ جانە مەملەكەتتىك قىزمەت باسقارماسى «استانا-رەك» اق جانە ينۆەستورلارمەن بىرلەسە وتىرىپ، ينۆەستورلاردىڭ تولىق قارجىلاندىرۋى ەسەبىنەن ەلوردانىڭ تۇرعىن الابتارىندا ەلەكتر بەرۋ جانە جارىقتاندىرۋ باعانالارى بويىمەن وپتيكالىق بايلانىس جەلىلەرىن تارتۋ جۇمىستارىن جۇرگىزىپ جاتقانىن جەتكىزدى.

سارىارقا اۋدانىندا «كازاحسكيە دوماشنيە سەتي» جشس-ى جۇمىس جۇرگىزۋدە. بۇگىنگى تاڭدا «كوكتال-2» تۇرعىن الابى بويىمەن 16 شاقىرىم كوشە كابەلدەرى تارتىلدى. ابونەنتتەردى قوسۋدىڭ تاريفتىك جوسپارى جىلدامدىققا بايلانىستى 4 500 تەڭگەدەن 14 500 تەڭگەگە دەيىنگى ارالىقتى قۇرايدى (جىلدامدىق 50 مبيت/س-تەن 500 مبيت/س دەيىن). قازىرگى ۋاقىتتا تۇرعىنداردان ينتەرنەتكە قوسىلۋعا 53 ءوتىنىش ءتۇسىپ، 2022 جىلدىڭ 23 قاراشاسىندا «كوكتال-2» ءبىرىنشى ابونەنتى قوسىلدى، اۋا رايىنىڭ قولايلى جاعدايىندا كۇنىنە 5 ابونەنتتى قوسۋ جوسپارلانۋدا. ينتەرنەتكە قوسىلۋ تەگىن تۇردە جۇزەگە اسىرىلادى.

تاريفتىك جوسپارلاردىڭ ەڭ تومەنى 50 مب/س – 4 500 تەڭگە بولسا، ستاندارتتى 100 مب/س دەيىن – 6 500 تەڭگە، ال شاڭىراق ءتاريفى 200 مب/س دەيىن 8 500 تەڭگەنى قۇرايدى. 350 مب/س دەيىن وتباسىلىق تاريف – 11 500 تەڭگە، ماكسيمالدى 500 مب/س دەيىنگى تاريف 14 500 تەڭگە بولادى.

ۇركەر تۇرعىن الابىندا «Synergy Telecom» جشس جۇمىس جۇرگىزۋدە. بۇگىنگى تاڭدا ۇركەر تۇرعىن الابى بويىمەن 20 شاقىرىم كوشە كابەلدەرى تارتىلدى. ابونەنتتەردى قوسۋدىڭ تاريفتىك جوسپارى جىلدامدىققا بايلانىستى
4 500 تەڭگە جانە 6 500 تەڭگە ارالىعىن قۇرايدى (جىلدامدىق 50 مبيت/س-تەن 100 مبيت/س دەيىن)، جىلدامدىقتى ۇلعايتۋعا سۇرانىس بولعان جاعدايدا، ونى 500 مب/س دەيىن ارتتىرۋعا بولادى. قازىرگى ۋاقىتتا تۇرعىنداردان ينتەرنەتكە قوسىلۋعا 40 ءوتىنىش قابىلداندى، اۋا رايىنىڭ قولايلى جاعدايىندا كۇنىنە 8 ابونەنتتى قوسۋ جوسپارلانۋدا. اعىمداعى جىلدىڭ 29 قاراشاسىندا العاشقى ابونەنتتەردى قوسۋ جوسپارلانعان.

تۇرعىن الابتاردى جوعارى جىلدامدىقتى ينتەرنەتپەن قامتاماسىز ەتۋ ءۇشىن قالاعا جالپى سوماسى 1،5 ملرد تەڭگەنى قۇرايتىن ينۆەستيتسيا تارتىلدى. 2023 جىلعا «كوكتال-1»، «اگروگورودوك، «ينتەرناتسيونال»، «وڭتۇستىك-شىعىس» (وڭ جاعالاۋ)، «پرومىشلەننىي»، «كۇيگەنجار»، «ميچۋرين»، «كازگورودوك»، «كيرپيچنىي»، ء«وندىرىس»، «قوياندى» ساياجايى تۇرعىن الابتارىن ينتەرنەتكە قوسۋ جوسپاردا بار.