قوستاناي قالالىق ءبىلىم باسقارماسىنىڭ مالىمەتىنشە, قاتتى ايازعا بايلانىستى بۇگىن ءبىرىنشى اۋىسىمداعى 9-سىنىپقا دەيىن وقيتىن وقۋشىلار قاشىقتان وقىتۋ فورماتىنا كوشىرىلدى.
«اۋا تەمپەراتۋراسى -27 گرادۋس, جەل سەكۋندىنا 3 مەتر. قوستاناي قالاسىنداعى مەكتەپتەردىڭ ءبىرىنشى اۋىسىمىنداعى 0-9 سىنىپ وقۋشىلارى قاشىقتان وقىتۋ فورماتىنا كوشىرىلىپ جاتىر», دەلىنگەن حابارلامادا.
سونداي-اق شىعىس قازاقستان جانە اباي وبلىستارىندا ايازعا بايلانىستى وقۋشىلار ونلاين فورماتتا وقيدى.
«اباي وبلىسى اۋماعىندا اۋا تەمپەراتۋراسى -31 گرادۋس ايازدى كورسەتىپ تۇر. وسىعان بايلانىستى 30 قاراشادا ءبىرىنشى اۋىسىمدا وقيتىن 1-11 سىنىپ وقۋشىلارى جانە كوللەدجدەردىڭ 1,2 كۋرس ستۋدەنتتەرى ءۇشىن ساباق ونلاين فورماتقا اۋىستىرىلدى. شىعىس قازاقستان وبلىسىنىڭ التاي, تارباعاتاي, گلۋبوكوە, سامار, قاتونقاراعاي, كۇرشىم اۋداندارىندا 0-11 سىنىپ, وسكەمەن مەن ريددەردە 0-9 سىنىپ, جاڭا بۇقتىرما ەلدى مەكەنىندە 0-4 سىنىپ وقۋشىلارى قاشىقتان ءبىلىم الادى», دەلىنگەن جەرگىلىكتى ءبىلىم باسقارماسىنىڭ حابارلاماسىندا.
