ەڭ ناشار كورسەتكىش – بايىرعى «سبەربانك», قازىرگى «Bereke Bank»-تە. بىلتىر بۇل قارجى ينستيتۋتى 102,8 ملرد تەڭگە تابىس تاپسا, بيىلعى شىعىن مولشەرى تابىسىنان 287,3 ملرد تەڭگە بولىپ اسىپ تۇسكەن. تاعى ءبىر رەسەيلىك ەنشىلەس بانك – «ۆتب بانك» شىعىنى – 37,2 ملرد تەڭگە. «كزي بانك» (14,5 ملرد تەڭگە) پەن «زامان-بانك» تە (591,6 ملن تەڭگە) تابىسقا شىعا الماعان بانكتەر قاتارىندا. دامۋ ديناميكاسى السىرەگەن بۇل قارجى ينستيتۋتتارىنىڭ ءبارى دە بىلتىر تابىستى بولعان. وتكەن جىلى مينۋستا بولعان Al Hilal يسلام بانكى بيىل 2,3 ملرد تەڭگەمەن وڭ كورسەتكىشكە يە. رەتتەۋشى مەنشىك كاپيتالى بويىنشا دا سول ءۇش بانك ۇزدىك – Halyk, Kaspi جانە بتسك. «Bereke» مەن «زاماننىڭ» ءحالى تاعى دا قيىن. جالپى, سەكتورداعى رەتتەۋشى جيىنتىق كاپيتال كولەمى 5,7 ترلن تەڭگەگە جەتكەن (بىلتىر 5,2 ترلن تەڭگە بولدى). «Bereke Bank»-تەن وزگە ينستيتۋتتىڭ ءبارى پرۋدەنتسيالدى نورماتيۆتەردى بۇلجىتپاي ورىنداعان.
Ranking دەرەگى بويىنشا, 1 قازانداعى جاعدايعا سايكەس بانكتەردىڭ قارىز پورتفەلى 22,3 ترلن تەڭگە بولدى. ءبىر جىلداعى ءوسىم – 23,3 پايىز.
«ۇزدىك وندىقتا ايلىق ءوسىم بويىنشا Bank RBK كوش باستايدى (+9 پايىز, 865 ملرد تەڭگە). جىلدىق ديناميكادا بانك پورتفەلى بىردەن-ءبىر جارىم ەسە وسكەن. بۇل بانك بيزنەسكە دە, حالىققا دا نەسيە بەرەدى. ەكىنشى ورىندا – «بانك تسەنتركرەديت» (+8,8 پايىز, 2 ترلن تەڭگە). بانك پورتفەلىنىڭ جىلدىق ءوسىمى 61,9 پايىز بولعان. بتسك-داعى مۇنداي ەرەكشە قارقىندى ءوسىم قۇرامىنا Eco Center Bank (بۇرىنعى «الفا-بانك») قوسىلعاننان كەيىن بولىپ وتىر. ۇشتىكتى «ەۋرازيالىق بانك» تۇيىندەيدى (+4,3 پايىز, 1,1 ترلن تەڭگە). ءبىر جىلدا بانكتىڭ پورتفەلى 51,3 پايىزعا ۇلعايعان», دەپ جازادى Ranking.
وتاندىق ەكىنشى دەڭگەيلى بانكتەردەگى سالىمدار دا 4 پايىزعا, 29,4 ترلن تەڭگەگە دەيىن وسكەن. جىلدىق ءوسىم – 17,3 پايىز. جەكە تۇلعالاردىڭ سالىمى 14,68 ترلن تەڭگە (سوڭعى ءبىر ايدا +3,2 پايىز, سوڭعى ءبىر جىلدا +17 پايىز) بولسا, كورپوراتيۆتىك سالىمدار كولەمى – 14,73 ترلن تەڭگە (سوڭعى ءبىر ايدا +5 پايىز, سوڭعى ءبىر جىلدا +17,5 پايىز). سالىمداردىڭ ايلىق ءوسىمى بويىنشا دا Bank RBK كوشباسشىلىقتى ەشكىمگە بەرمەيدى. ءبىر جىلدا بانكتىڭ دەپوزيتى 55,4 پايىزعا مولايعان. ودان كەيىنگى ورىندا سالىمشىلاردىڭ 1,7 ترلن تەڭگەسىن جيناعان «ەۋرازيالىق بانك» تۇرسا, ۇشتىككە «سيتيبانك» ىلىنگەن – 1,2 ترلن تەڭگە.
قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆانىڭ ايتۋىنشا, نەسيە نارىعىندا جاڭا ويىنشىلاردىڭ كەلۋىنە جول اشۋ ءۇشىن دەپوزيت تارتۋعا قاتىستى شەكتەۋلەردى الىپ تاستاۋ جوسپارلانىپ وتىر.
«قارجى نارىعىنىڭ قاتىسۋشىلارىمەن بىرگە بانك اشۋ ءۇشىن ليتسەنزيالاۋ جانە رۇقسات بەرۋ پروتسەدۋرالارىن وڭتايلاندىرۋ بويىنشا جۇمىس جۇرگىزدىك. جاڭا بانككە ليتسەنزيا العاننان كەيىن ءبىر جىل ىشىندە دەپوزيت تارتۋدى شەكتەيتىن نورما بار. بۇل نورما وسىدان 20 جىل بۇرىن, قازىر قالىپتاسىپ جاتقان تاۋەكەلدەردى باسقارۋ جۇيەسى بولماعان كەزدە قاراستىرىلعان بولاتىن. سوندىقتان بۇل تالاپتى الىپ تاستاۋ كەرەك دەپ ەسەپتەيمىز جانە زاڭناماعا ءتيىستى وزگەرىستەر كەلەسى جىلى ەنگىزىلەدى. وسى وزگەرىس بانك سەكتورىندا جاڭا ويىنشىلاردىڭ پايدا بولۋىنا مۇمكىندىك بەرەدى», دەدى م.ابىلقاسىموۆا.
ينفوگرافيكانى جاساعان امانگەلدى قياس, «ەQ»
