ەكونوميكا • 29 قاراشا، 2022

اراب ەلدەرىنە قوي ەتى ەكسپورتتالادى

اۋىل شارۋاشىلىعى ۆيتسە-ءمينيسترى ايداربەك ساپاروۆ پەن «Al-Reef Al-Tholathy» اتقارۋشى ديرەكتورى مۇحاممەد ناسسەر المۋكەيريش قازاقستان مەن ساۋد ارابياسىنداعى ازىق-ت ۇلىك ونىمدەرىن وندىرەتىن ءىرى كومپانيالاردىڭ بىرىمەن ىنتىماقتاستىقتىڭ كەلەشەگىن تالقىلادى. اتاپ ايتقاندا، اراب كاسىپكەرلەرىنىڭ قازاقستاندا قۇرىلاتىن «قوي شارۋاشىلىعىن دامىتۋ قورى» جۇمىسىنا قاتىسۋ مۇمكىندىگى قاراستىرىلدى.

اباي قازبەك ۇلى

جوبا قازاقستاندىق قوي مەن قوزىنى اراب مەملەكەتتەرىنە، ءبىرىنشى كەزەكتە پارسى شىعاناعى ەلدەرىنە جەتكىزۋگە ىقپال ەتەتىن بولادى. وندىرىلگەن قاراجاتتى ودان ءارى قوي وسىرۋمەن اينالىساتىن وتاندىق فەرمەرلەردى قارجىلاندىرۋ ءۇشىن پايدالانۋ جوسپارلانىپ وتىر. قازىرگى ۋاقىتتا جوباعا ينۆەستورلاردى تارتۋ بويىنشا جۇمىس باستالدى. ساۋد ارابياسىنىڭ قارقىندى دامىپ كەلە جاتقان كومپانيالارىنىڭ ءبىرى سانالاتىن جانە ءوز نارىعىن جوعارى ساپالى سالقىنداتىلعان ەتپەن قامتاماسىز ەتۋمەن اينالىساتىن «Al-Reef Al-Tholathy» كومپانياسى الەۋەتتى سەرىكتەس بولا الادى.

2022 جىلدىڭ 9 ايىنىڭ قورىتىندىسى بويىنشا قازاقستاندىق مال وسىرۋشىلەر 29،7 مىڭ توننا ەت، ونىڭ ىشىندە 6،7 مىڭ توننا قوي ەتىن ەكسپورتتادى. وتاندىق قويدىڭ نەگىزگى تۇتىنۋشىلارى – وزبەكستان، ءباا، كۋۆەيت، ومان جانە باحرەين مەملەكەتتەرى. اۋىل شارۋاشىلىعى مينيسترلىگى قازاقستاندىق قوي ەتىن وندىرۋشىلەر ءۇشىن وتكىزۋ نارىعىن كەڭەيتۋگە جانە ءوندىرىستى ۇلعايتۋعا ودان ءارى ىقپال ەتەتىن بولادى.

اراب دەلەگاتسياسى قازاقستانعا ساپارى اياسىندا جەرگىلىكتى مال شارۋاشىلىعى كاسىپورىندارىنىڭ جۇمىسىمەن تانىسۋ ءۇشىن ەلىمىزدىڭ وڭتۇستىك وڭىرلەرىنە باردى.

جالپى، ەلىمىزدە بيىل 10 ايدا فەرمەرلەر 948،5 مىڭ توننا ەت ءوندىردى، ونىڭ كولەمى ءبىر جىل بۇرىنعى ۇقساس كەزەڭمەن سالىستىرعاندا ورتا ەسەپپەن 0،5%-عا ءوستى. ەڭ ۇلكەن ءوسىمدى جىلقى ەتىنىڭ ءوندىرىسى كورسەتتى (4،8%) – 114،1 مىڭ توننا. قۇس ەتى 2،9%-عا ءوسىپ، 239،6 مىڭ توننانى قۇرادى. جىل باسىنان بەرى 400،1 مىڭ توننا سيىر ەتى، 113،7 مىڭ توننا قوي ەتى ءوندىرىلدى.

ەت ەكسپورتى 2022 جىلدىڭ قىركۇيەگىنە قاراي 1 ملن دوللارعا 29،7 مىڭ توننا كولەمىنە جەتتى. ەكسپورتتىڭ باسىم بولىگى سيىر ەتىنە تيەسىلى – 13،5 مىڭ توننا، سونداي-اق شەتەلگە 6،7 مىڭ توننا قوي ەتى مەن 9،5 مىڭ توننا قۇس ەتى ساتىلدى. ۆەدومستۆونىڭ حابارلاۋىنشا، الىس جانە جاقىن شەتەلدەردەن 110 مىڭ توننا ەت يمپورتتالعان. يمپورتتىڭ باسىم بولىگى قۇس ەتىنە تيەسىلى، ەلگە شامامەن ونىڭ 97،5 مىڭ تونناسى اكەلىنىپتى.