ايماقتار • 28 قاراشا، 2022

ەكىباستۇزداعى جىلۋ جەلىلەرىندەگى 15 اقاۋ جويىلدى

28 قاراشا كۇنگى ساعات 19:00-دەگى جاعداي بويىنشا جىلۋ قۇبىرىنداعى سۋدىڭ اتقىلاۋىن جويۋ جۇمىستارى تاعى ەكى ماگيسترالدا جالعاسۋدا دەپ حابارلادى جەدەل شتاب.

مۇرات قاپان ۇلى

ماماندار 17 كوپقاباتتى ءۇي مەن 4 الەۋمەتتىك نىسانعا جىلۋ بەرۋ جۇمىستارىن جۇرگىزىپ جاتىر. بۇل جۇمىستارعا 143 ادام مەن 30 تەحنيكا جۇمىلدىرىلدى.

ستانتساداعى تەمپەراتۋرا 75°C-گە دەيىن كوتەرىلدى. «واەك» اق باسقارما توراعاسى باعدات ورالدىڭ اقپاراتى بويىنشا نەگىزگى اپاتتىق ۋچاسكە انىقتالدى.

«اپات №52 ورتالىق جىلۋ پۋنكتىندە ورنالاسقان. بارلىق كۇشتەر وسىندا شوعىرلاندىق. ءبىز اسفالت قاباتىن الىپ تاستاپ، قۇبىردىڭ وزىنە جەتتىك. قۇبىردى اۋىستىرعان سوڭ جىلۋ جەلىسىنە قوسىلا باستايمىز» دەپ ءتۇسىندىردى باعدات ورال.

ەنەرگەتيكا مينيسترلىگىنىڭ اتوم جانە ەنەرگەتيكالىق قاداعالاۋ جانە باقىلاۋ كوميتەتىنىڭ توراعاسى سۇڭعات ەسىمحانوۆ اپات بويىنشا تەرگەۋدىڭ باستالعانىن مالىمدەدى.

«بۇگىن جەو باسشىلىعى رەسمي تۇردە حاباردار ەتىلدى. ون جۇمىس كۇنى ىشىندە تەرگەۋدى اياقتاپ، قورىتىندىنى حابارلايمىز. كاسىپورىنداردىڭ تاۋلىك بويى كەزەكشىلىگىن ۇيىمداستىردىق. جەلىدەگى جىلۋدان اجىراتۋلار سەرۆيستىك كومپانيالارمەن بىرلەسىپ پىسىقتالدى»، دەدى ەسىمحانوۆ.

ايتا كەتەيىك، «ەكىباستۇزجىلۋەنەرگو» جشس قۇرىلتايشىسى الەكساندر كلەبانوۆ كومپانيانىڭ اقاۋدى جويۋ ءۇشىن قاجەتتى رەسۋرستارى بار ەكەنىنە سەندىردى. سونداي-اق، اپاتتىڭ سالدارىن جويۋعا قالانىڭ باسقا دا ونەركاسىپتىك كاسىپورىندارىنىڭ كۇشتەرى جۇمىلدىرىلعان.

ء«بىز جەكە كومپانيا رەتىندە ورىن العان جاعدايعا تولىق جاۋاپ بەرەمىز. مۇندا قۇقىق قورعاۋ ورگاندارى مەن پروكۋراتۋرانىڭ قاتىسۋىمەن كوميسسيا قۇرىلاتىنى ءسوزسىز. ولار ءبارىن مۇقيات قاراستىرادى. بۇعان ءبىز دە مۇددەلىمىز»، دەدى الەكساندر كلەبانوۆ.

پاۆلودار وبلىسى اكىمىنىڭ (م.ا.) مالىمەتىنشە، قازىرگى كەزدەگى باستى مىندەت – ۇيلەردى جىلۋمەن جابدىقتاۋدى قالپىنا كەلتىرۋ.

ء«بارى پروبلەمانى تولىقتاي ءتۇسىنىپ وتىر، ناقتى شەشىمدەر قابىلداۋ قاجەت. ءبىز وسى ماقسات ءۇشىن جينالدىق. نەگىزگى مىندەت – تەز ارادا جىلۋمەن جابدىقتاۋ جۇيەسىن قالپىنا كەلتىرۋ. ءبىز بارلىق كۇش پەن رەسۋرستاردى قولدانامىز. سوندىقتان ءبارىمىز قالاداعى جىلۋمەن جابدىقتاۋ جۇيەسى شتاتتىق رەجيمدە ىسكە قوسىلمايىنشا، بۇل جەردەن كەتپەيمىز. تۇرعىندار بىزدەن تەك وسىنى كۇتەدى»، - دەپ اتاپ ءوتتى ابىلقايىر سقاقوۆ.

ەستەرىڭىزگە سالا كەتەيىك، ەكىباستۇزدا جىلۋ ماگيسترالدارىنداعى زاقىمدارعا بايلانىستى تەحنوگەندىك سيپاتتاعى تج جاريالاندى. قالادا جەدەل شتاب اشىلىپ، ەۆاكۋاتسيالىق پۋنكتتەر مەن شۇعىل قوڭىراۋ جەلىسى جۇمىس ىستەپ تۇر.