الەم • 27 قاراشا، 2022

تۇركيادا «قازاق-تۇرىك باۋىرلاستىعى» ەسكەرتكىشى اشىلدى

كەشە تۇركيانىڭ ىستانبۇل قالاسىندا، باعجىلار اۋدانىندا «قازاق-تۇرىك باۋىرلاستىعى» ەسكەرتكىشى سالتاناتتى تۇردە اشىلدى، دەپ حابارلايدى Egemen.kz.

مارجان تىلەۋبەك

التايدان انادولىعا قونىس اۋدارعان قازاقتاردىڭ تۇركيا مەملەكەتىن مەكەندەۋىنە 70 جىل تولعان مەرەيتوي قارساڭىندا بوي كوتەرگەن بۇل ەسكەرتكىش ەكى ەل اراسىنداعى تۋىستىق، دوستىق قارىم-قاتىناستىڭ ايرىقشا بەلگىسى ەكەنى انىق.

ءىس-شارانى قازاقستاننىڭ تۇركياداعى توتەنشە جانە وكىلەتتى ەلشىسى ەركەبۇلان ساپيەۆ سالتاناتتى تۇردە اشىپ بەردى. باعجىلار اۋدانىنىڭ مەرى ابدۋللا وزدەمير مىرزا تۇركيادا تۇرىپ جاتقان قازاق ۇلتىنا ءوز ريزاشىلىعىن ءبىلدىرىپ، قۇتتىقتاۋىن جەتكىزدى.

ءوز كەزەگىندە قازاقستان رەسپۋبليكاسى پارلامەنتى سەناتىنىڭ دەپۋتاتى، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى مۇرات باقتيار ۇلى ءسوز سويلەپ، قازاق ۇلتىنىڭ قيلى تاريحىنا توقتالىپ، تۇرىك حالقىنىڭ باۋىرلاستىعىن تىلگە تيەك ەتتى. «بىرلىك» قازاق جاستارى ۇيىمىنىڭ توراعاسى اسلان سەرىك قازاقتىڭ قارا دومبىراسىمەن «قازاق وسى» ءانىن ورىنداپ، جينالعان قاۋىمنىڭ ىقىلاسىنا بولەندى.

بۇدان سوڭ، «وتانداستار قورى» كەاق پرەزيدەنتى ابزال ساپاربەك ۇلى قازاقستان مەن تۇركيانىڭ اراقاتىناسىنا توقتالىپ، بىرلىگى بەكەم مەملەكەتتەر ەكەنىن ايتىپ ءوتتى. سونىمەن قاتار باعجىلار اۋدانىنىڭ اكىمىنە شاپان جاۋىپ ارنايى سىيلىق تابىستادى.

ەسكەرتكىش اۆتورى «قازاقستاننىڭ ەڭبەك سىڭىرگەن قايراتكەرى»، قر كوركەمسۋرەت اكادەمياسىنىڭ ءبىرىنشى-ۆيتسە پرەزيدەنتى، بەلگىلى سۋرەتشى، رەجيسسەر، تەلەجۋرناليست - جانۇزاق ءمۇساپىر مىرزا ەسكەرتكىشتىڭ جاسالۋى مەن تاريحىن تانىستىردى.

ەسكەرتكىشتىڭ اشىلۋ راسىمىنەن كەيىن قازاق كوشىنىڭ 70–جىلدىعىنا وراي ۇيىمداستىرىلعان « ۇلى كوش» تاقىرىبىندا فوتوسۋرەتتەر مەن قر جوعارى وقۋ ورىندارىنىڭ ءبىلىم كورمەسىمەن تانىسۋ ۇيىمداستىرىلىپ، جيىنعا جينالعان قاۋىم ەستەلىككە سۋرەتكە ءتۇستى.