جول اكتيۆتەرىنىڭ ۇلتتىق ساپا ورتالىعىنىڭ باس ديرەكتورى زامير ساعىنوۆ كاسىپورىننىڭ جۇمىسى تۋرالى ايتىپ بەردى. وسى جىلى ساپا ورتالىعى جول-قۇرىلىس ماتەريالدارىنىڭ 29 مىڭ ۇلگىسىنەن سىناما العان. ونىڭ 9 مىڭى رەسپۋبليكالىق جەلى بويىنشا بولسا, 20 مىڭ سىناما جەرگىلىكتى جەلىگە تيەسىلى. سونىڭ ىشىندە 7,3 مىڭ ماتەريال سىناماسى نەمەسە 24% بەلگىلەنگەن نورماتيۆتىك تالاپتارعا سايكەس كەلمەيدى. وسىلايشا, رەسپۋبليكالىق جەلى بويىنشا 13% (1 166), جەرگىلىكتى جەلى بويىنشا 30% (6 234) سايكەسسىزدىك انىقتالدى. سونىمەن قاتار ساپا ساراپتاماسىمەن جەرگىلىكتى جەلى بويىنشا ىسكە اسىرىلاتىن بارلىق جوبانىڭ نەبارى 63%-ى, ال رەسپۋبليكالىق جولدار بويىنشا بارلىق جوبا قامتىلعان.
تەحنيكالىق قاداعالاۋدا ورىن العان بۇزۋشىلىق فاكتىلەرى بويىنشا وڭىرلىك مەملەكەتتىك ساۋلەت قۇرىلىسى باسقارمالارىنا وتىنىشتەر جولدانۋدا. 2020 جىلدان بەرى ساپا ورتالىعىنىڭ جولداعان وتىنىشتەرى بويىنشا 81 تەحنيكالىق قاداعالاۋ قىزمەتى اكىمشىلىك جاۋاپكەرشىلىككە تارتىلسا, 56 ينجەنەردىڭ اتتەستاتى ءوز كۇشىن جويعان. سونداي-اق 4 مەردىگەر ۇيىم جول قۇرىلىس جۇمىستارىن جۇرگىزۋ ليتسەنزياسىنان ايىرىلعان (2020 جىلى – 2, 2022 جىلى – 2). جالپى, سالىنعان ايىپپۇل سوماسى – 110 ملن تەڭگە.
ءوز سوزىندە باس ديرەكتور ز.ساعىنوۆ جول جوندەۋ جۇمىستارىندا پايدالانىلاتىن بيتۋمنىڭ ساپاسىنا دا توقتالىپ ءوتتى.
«بيىل ساپا ورتالىعى مۇناي وڭدەۋ زاۋىتتارى, اسفالت زاۋىتتارى جانە بيتۋم قويمالارىنان 900-گە جۋىق جول بيتۋمىنىڭ ۇلگىسىن پايدالانىپ, سىناپ كوردى. ونىڭ ىشىندە 232 سىناما (26%) ساپا ستاندارتتارىنا سايكەس كەلمەيتىنى انىقتالدى. وسىعان بايلانىستى بيتۋم ساپاسىنا قاتىستى ماسەلەلەردى تەرەڭ زەرتتەۋ ءۇشىن اۆتوجول كوميتەتىنىڭ تاپسىرماسىنا سايكەس ساپا ورتالىعى بازاسىندا بيتۋمدى جانە پوليمەرلى-موديفيكاتسيالانعان بيتۋمدى بايلانىستىرعىشتاردى زەرتتەۋ جونىندەگى ورتالىق زەرتحانا قۇرىلدى, ول زاماناۋي جابدىقتارمەن جاراقتاندىرىلۋدا», – دەدى ز.ساعىنوۆ.
اتالعان ورتالىق نازارباەۆ ۋنيۆەرسيتەتى پروفەسسورلارىمەن بىرلەسە ەلىمىزدىڭ ءارتۇرلى وڭىرلەرىندەگى ناقتى كولىك پايدالانۋ جانە كليماتتىق جاعدايلاردى ەسكەرە وتىرىپ, اسفالتبەتوننىڭ بەرىكتىك سيپاتتامالارىن ارتتىرۋ, جوندەۋارالىق قىزمەت مەرزىمىن ۇلعايتۋ بويىنشا شەتەلدىك تاجىريبەنى زەردەلەۋدە. سونداي-اق ل.ن.گۋميلەۆ اتىنداعى ەۇۋ-مەن بىرلەسە تسەمەنت-بەتون جابىنى بار اۆتوجولداردا اقاۋلاردىڭ پايدا بولۋ سەبەپتەرىن انىقتاۋ بويىنشا عىلىمي-زەرتتەۋ جۇمىستارى جۇرگىزىلۋدە. جۇمىستىڭ قورىتىندىسىندا قولدانىستاعى نورماتيۆتەرگە وزگەرىستەر ەنگىزۋ بويىنشا ۇسىنىستار بەرىلەتىن بولادى.
