ومىرتقاعا جاسالعان وپەراتسيالار

بەل ومىرتقاداعى جارىقتى سىلىپ تاستادى

وتكەن اپتادا ورتالىق قالا­لىق كلي­نيكالىق اۋرۋحانا دارىگەر­لە­رى 37 جاستاعى پاتسيەنتتىڭ ومىرت­قا­سىنداعى جارىقتى شاعىن ءينۆا­زيۆتى ادىسپەن الىپ تاستادى. جو­عارى تەحنولوگيالىق وپەراتسيا ءمامس شەڭبەرىندە جاسالدى. نەي­روحيرۋرگيا بولىمشەسىنىڭ مەڭ­گەرۋ­شىسى مارات الماتوۆتىڭ ايتۋىنشا, ناۋقاستىڭ بەل ومىرتقاداعى وستەو­حاندروز بەن جارىقتىڭ زاردابىن تارتقانىنا بىرنەشە جىلدىڭ ءجۇزى بولعان. ناۋقاس بۇلشىق ەتتەردىڭ سەمە باستاعانىنان سول اياعىن باسا الماي قالعان. ادەتتە, جارىقتىڭ مۇنداي ءتۇرى ومىرتقا قۇرىلىمىنىڭ ءبىر بولىگىن الىپ تاستاۋدى قاجەت ەتەتىندىكتەن اۋىر وپەراتسيا جاسالادى. وسى جولى ماماندار اقىلداسا كەلە, ەمنىڭ مەيلىنشە جەڭىل ءارى ەڭ ءتيىمدى شاعىن ءينۆازيۆتى ءتاسىلىن تاڭدادى. بۇل ءادىس كەۋدە-بەل ومىرتقا تۇسىندا قىسىلىپ تۇرعان ج ۇلىن قۇرىلىمىن تولىق قالپىنا كەلتىرۋگە مۇمكىندىك بەرەدى.

«وپەراتسيا جۇمساق تىندەردى كەسپەي, تۋبۋستىق كەڭەيتكىش ارقىلى جاسالدى. مۇنداي حيرۋرگيالىق وپەراتسيا ءبىزدىڭ ستاتسيوناردا تۇڭعىش رەت جاسالىپ وتىر. ۆينتتەر تەرى ارقىلى ەنگىزىلدى. وپەراتسيا بارىسىندا ومىرتقا اراسىنا جاساندى ديسك ورناتىلدى. ءۇش ساعاتقا سوزىلعان وپەراتسيا ءساتتى اياقتالدى», دەدى م.الماتوۆ.

ماماندار جاڭا تەحنولوگيالار­دىڭ كومەگىمەن جاسالاتىن زاماناۋي ەمدەۋ ءادىسى ارقىلى وپەراتسيا ۋاقىتىن قىسقارتىپ, جاقسى نا­تي­جە­گە قول جەتكىزۋگە بولاتىنىن, سونىمەن قاتار پاتسيەنت وپەراتسيادان كەيىن كوپ ۇزاماي اياققا تۇراتىنىن ايتادى.

وسى جولدار جازىلىپ جاتقاندا اۋرۋحانادان شىعۋعا دايىندالىپ جاتقان پاتسيەنت: «كەيىنگى كەزدە ءوز اياعىممەن جۇرۋدەن كۇدەر ۇزە باستاعان ەدىم. مۇگەدەك ارباسىنا تاڭىلدىم. قازىر ءوزىم ءجۇرىپ-تۇرامىن. ايىعىپ كەلە جاتىرمىن, اۋىرعانى قويدى. نەيروحيرۋرگيا بولىمشەسىنىڭ دارىگەرلەرى مەن مەدبيكەلەرىنە العىستان باسقا ايتارىم جوق», دەدى.

موينى سىنعان ادامدى ومىرگە قايتاردى

سول سياقتى №4 قالالىق كلي­ني­­كا­لىق اۋرۋحاناسىنىڭ نەيرو­حيرۋرگتەرى دە جاڭا ادىسكە جۇگى­نىپ, اۋرۋحانادا بۇرىن-سوڭدى جاسال­ما­عان وپەراتسيا جاسادى. وزىق تەح­نو­لوگيالاردىڭ كومەگىمەن موينى سىنعان ەر ادامنىڭ دەنساۋلىعىن قالپىنا كەلتىرىپ, مۇگەدەكتىكتەن امان الىپ قالدى.

48 جاستاعى ناۋقاستىڭ مويىن ومىرتقاسى قاتتى اۋىرعانى سونشا, باسىن ءتىپتى بۇرا الماي قالعان. تەكسەرۋدەن كەيىن شۇعىل نەيروحيرۋرگيا بولىمشەسىنە جاتقىزىلعان ناۋقاستىڭ ومىرتقاسىنا كەلەسى كۇ­نى بىردەن تەحنيكالىق كۇردەلى ءارى سيرەك وپەراتسيا جاسالدى. بۇل حي­رۋر­گيالىق وپەراتسيا ءتىس ءتارىزدى ءوسىن­دىنى بۇراندامەن ترانسدەنتال­دى وستەوسينتەزدەۋ دەپ اتالادى. نەي­رو­-
حيرۋرگيا ماماندارى ناۋ­قاستى مۇگە­دەكتىكتەن قۇتقارىپ, قا­لىپ­تى ءومىرىن ساقتاۋ ءۇشىن ەمدەۋدىڭ وسى ءادىسىن العاش رەت قولدانۋدى ۇيعارعان.

قاناتقاقتى وپەراتسيانى ساتى­مەن جۇزەگە اسىرعان نەيروحيرۋرگ تيمۋر ايتمۇحانوۆ: «مويىن جەتى ومىرت­قا­دان تۇرادى. ءبىرىنشى جانە ەكىنشى ومىرتقا كوتەرەتىن فۋنكتسيونالدىق جۇكتەمەگە بايلانىستى تۇبەگەيلى ەرەك­شە مانگە يە. ءبىرىنشى ومىرتقا – اتلانت, ەكىنشى ومىرتقا – اكسيس. ولار ءبىر-بىرىمەن س2 ومىرتقاسىنىڭ ءتىس ءتارىزدى ءوسىندىسى مەن اتلانتتىڭ ال­دىڭ­عى دوعاسىنان تۇزىلەتىن كريۋ­ۆەلە بۋىنى ارقىلى بايلانىسادى. ومىرتقانىڭ بۇل سەگمەنتىنىڭ ماڭىزدىلىعى سوندا, مەديتسينا ماماندارىنىڭ پىكىرىنە سۇيەنسەك, باس قوزعالىسىنىڭ 50-دەن 70%-ىنا دەيىن وسى بولىك اتقارادى. بىراق ءتىس ءتا­رىزدى ءوسىندىسى سىنعان كەزدە ونىڭ وسى قىزمەتىنە زاقىم كەلىپ, زارداپ شەگەدى», دەيدى.

وسىلايشا, بىرەگەي وپەراتسيا ار­قىلى ناۋقاستىڭ مويىن ومىرت­قا­سىنداعى قوزعالىستار قالپىنا كەل­تىرىلدى.

نەيروحيرۋرگتەر يمپلانتتىڭ جۇمىسىن ورناتىلعاننان كەيىنگى ءبىرىنشى كۇنى, ءبىر ايدان كەيىن, ءۇش ايدان كەيىن جانە التى ايدان سوڭ تەكسەرەدى. بۇل ءادىس پاتسيەنتتى اۋرۋ­حانا توسەگىنە تاڭىپ قويماي, ناۋقاستىڭ مۇگەدەكتىككە دۋشار بولۋ قاۋپىن دە الدەقايدا تومەندەتەدى.

الماتى