وتىرىستى اشقان قازاقستاننىڭ رەسەيدەگى ەلشىسى ەرمەك كوشەرباەۆ قاتىسۋشىلاردى ورتالىق سايلاۋ كوميسسياسى جاريالاعان داۋىس بەرۋدىڭ الدىن الا قورىتىندىلارىمەن تانىستىردى. مالىمەتتەرگە سايكەس, سايلاۋشىلاردىڭ 69,44 پايىزى قاتىسقان. قازىرگى مەملەكەت باسشىسى قاسىم-جومارت توقاەۆ 81,31% داۋىسپەن جەڭىسكە جەتتى.
رەسەيدىڭ كورنەكتى ديپلوماتى, رف ءسىم ديپلوماتيالىق اكادەمياسىنىڭ ەكس-رەكتورى ەۆگەني باجانوۆ سايلاۋ تاماشا جانە ۇزدىك الەمدىك ستاندارتتارعا ساي ءوتتى دەپ ەسەپتەيدى. باجانوۆ قازاق حالقىن تاماشا تاڭداۋىمەن قۇتتىقتادى.
«قاسىم-جومارت كەمەل ۇلى – كورنەكتى مەملەكەت قايراتكەرى, وراسان ومىرلىك جانە تابىستى باسقارۋ تاجىريبەسى بار تۇلعا», دەپ اتاپ ءوتتى ديپلومات.
رەسەيلىك جازۋشى, «بەلگىسىز قازاقستان» كىتابىنىڭ اۆتورى يۋري سيگوۆتىڭ ايتۋىنشا, توقاەۆتىڭ الداعى پرەزيدەنتتىك مەرزىمىنىڭ باستى نازارى ىشكى ساياساتقا اۋدارىلادى. ويتكەنى وعان حالىقتىڭ ءومىر ءسۇرۋ دەڭگەيىن كوتەرۋ ماسەلەلەرىن شەشۋ قاجەت بولادى. وسىعان بايلانىستى جازۋشى مەكسيكا پرەزيدەنتى وبرادوردىڭ «ەڭ جاقسى سىرتقى ساياسات – ىشكى ساياسات» دەگەن ءسوزىن كەلتىردى. يۋري سيگوۆ قازاقستانداعى ءبىرتۇتاس پرەزيدەنتتىك مەرزىم يدەياسىن دا دۇرىس دەپ اتاپ, مەكسيكا تاجىريبەسىنە توقتالدى.
رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك باسقارۋ اكادەمياسى كورپوراتيۆتىك باسقارۋ جوعارى مەكتەبىنىڭ دەكانى سەرگەي كالەندجيان عىلىم جانە ءبىلىم سالاسىنداعى ىنتىماقتاستىقتىڭ نىعايا تۇسەتىنىنەن ءۇمىتتى.
«بيىل اقپان ايىندا عانا قازاقستاندا رەسەي جوعارى وقۋ ورىندارىنىڭ فيليالدارىن قۇرۋ تۋرالى كەلىسىمگە قول قويىلدى. ال قىركۇيەكتە الماتىدا ماسكەۋ ينجەنەرلىك فيزيكا ينستيتۋتىنىڭ فيليالى جانە اتىراۋدا ي.گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىنىڭ فيليالى اشىلدى», دەپ ەسكە سالدى عالىم.
ەكونوميكالىق اسپەكتىگە «ەكونوميكا جوعارى مەكتەبى» ۇلتتىق زەرتتەۋ ۋنيۆەرسيتەتىنىڭ مەملەكەتتىك جانە مۋنيتسيپالدىق باسقارۋ ينستيتۋتى ەكونوميكالىق ساراپتاما ورتالىعىنىڭ ديرەكتورى, ەنەرگەتيكا جانە قارجى ينستيتۋتىنىڭ پرەزيدەنتى مارسەل ساليحوۆ توقتالدى. ونىڭ پىكىرىنشە, رەسەي ەكونوميكاسىنداعى قازىرگى كۇردەلى جاعداي قازاقستان ءۇشىن ۇلكەن مۇمكىندىك.
«رەسەيدەن كەتكەن باتىس كومپانيالارى بۇرىنعىسىنشا ونىڭ نارىعىنا باسا نازار اۋداراتىن بولادى. ال قازاقستان مۇندا تاماشا ترانزيتتىك الاڭ رەتىندە ارەكەت ەتە الادى. ءوز كەزەگىندە جاقسى جاعداي جاساۋ ارقىلى رەسەي ازاماتتارىنىڭ ەداۋىر بولىگىن قازاقستانعا كوشىرۋ, ادام كاپيتالىن تارتۋعا مۇمكىندىك بەرەدى», دەيدى ساراپشى.
قازاق كسر-ءنىڭ ەڭبەك سىڭىرگەن مادەنيەت قايراتكەرى تاتيانا پولتاۆسكايا-گابەلكو 2015 جانە 2019 جىلدارى قازاقستانداعى پرەزيدەنتتىك سايلاۋدا باقىلاۋشى بولعانىن ەسكە الدى. ونىڭ پىكىرىنشە, قازىر قاسىم-جومارت توقاەۆ ءدۇبىرلى دۇنيەدە ماڭىزدى مىندەتتەردى شەشۋى كەرەك.
«كوپ جىلداردان بەرى قازاقستاندا تۇرماسام دا, تۋعان جەرىمدە بولىپ جاتقان وقيعالار مەنى بەي-جاي قالدىرمايدى. مەن قازاقستاننىڭ گۇلدەنۋىن تىلەيمىن», دەدى ول.
دوڭگەلەك ۇستەلدى قورىتىندىلاي كەلە, قاتىسۋشىلار حالىق سەنىمىنىڭ جاڭا مانداتى قاسىم-جومارت توقاەۆقا اۋقىمدى ساياسي جانە الەۋمەتتىك-ەكونوميكالىق قايتا قۇرۋلاردى جالعاستىرۋعا مۇمكىندىك بەرەتىنىن اتاپ ءوتتى.
