«ورتالىق سايلاۋ كوميسسياسى قازاقستان پرەزيدەنتى سايلاۋىنىڭ الدىن الا قورىتىندىسىن جاريالادى. سوعان سايكەس ەل ازاماتتارىنىڭ 81,31 پايىزى قاسىم-جومارت كەمەل ۇلى توقاەۆقا داۋىس بەرگەنى بەلگىلى بولدى», دەپ جازدى ماۋلەن اشىمباەۆ.
سەنات توراعاسىنىڭ ايتۋىنشا, سايلاۋ ناتيجەلەرى مەملەكەت باسشىسىنىڭ اۋقىمدى رەفورمالارى مەن باستامالارى حالىق اراسىندا قولداۋ تاپقانىن كورسەتەدى.
«بۇل - ازاماتتارىمىزدىڭ بەكەم بىرلىگىنىڭ ارقاسىندا قول جەتكىزىلگەن جارقىن جانە ايقىن جەڭىس. مۇنداعى حالىقتىڭ بەلسەندىلىگىن دە اتاپ وتكەن ءجون. سايلاۋعا 8,3 ملن ادام نەمەسە بارلىق سايلاۋشىنىڭ 69,44 پايىزى قاتىسقان. داۋىس بەرۋ بارىسىن باقىلاعان وتاندىق جانە حالىقارالىق بايقاۋشىلار سايلاۋدىڭ جوعارى دەڭگەيدە ۇيىمداستىرىلعانىن جانە ۇلتتىق زاڭنامالار مەن حالىقارالىق ستاندارتتارعا ساي وتكەنىن مالىمدەدى», دەلىنگەن جازبادا.
وسى رەتتە ماۋلەن اشىمباەۆ قاسىم-جومارت كەمەل ۇلىن ايقىن جەڭىسىمەن قۇتتىقتادى.
«قاسىم-جومارت كەمەل ۇلىن جانە بارشا جاقتاستارىن ايقىن جەڭىسپەن تاعى دا قۇتتىقتايمىن! پرەزيدەنتىمىزدىڭ ساياساتى اياسىندا ءبارىمىز بىرگە جاڭا, وركەندەگەن, دەموكراتيالى جانە ادىلەتتى قازاقستان قۇرامىز دەپ تولىق سەنەمىن», دەپ جازدى سەنات توراعاسى.
