ايماقتار • 21 قاراشا، 2022

باسكول جۇرتى دىتتەگەنىنە جەتتى

«Egemen Qazaqstan» گازەتىنىڭ وسى جىلعى 20 قازانداعى نومىرىندە ماي اۋدانىنىڭ باسكول اۋىلىندا جىلدار بويى قوردالانعان ماسەلەلەر جايىندا جازىپ ەدىك. سونىڭ ءبىرى – بەلايا وزەنىنىڭ ۇستىنەن پانتوندى كوپىر سالۋ. جۋىقتا اۋىل تۇرعىندارى حابارلاسىپ، ەل گازەتى كوتەرگەن تۇيتكىلدىڭ ءتۇيىنى تارقاتىلعالى جاتقانى جايىندا سۇيىنشىلەدى.

مۇرات قاپان ۇلى

«باسكول جۇرتىنىڭ بازىناسى» دەپ اتالعان ماقالادا اتاپ كورسەتكەنىمىزدەي، باسكول ەلدى مەكەنىن ەرتىس وزەنىنەن بەلايا دەپ اتالاتىن شاعىن وزەن ءبولىپ تۇر. ەرتىستىڭ سول جاق جاعالاۋىنداعى شابىندىق جەرلەر ءونىمدى بولعاندىقتان باسكول، بوزشا اۋىلدارىنىڭ حالقى جازدا سول جەردەن ءشوپ شابادى. جەرگىلىكتى حالىق كوپ جىلدان بەرى الگى تۇستا پانتوندى كوپىر ورناتىپ بەرۋدى سۇراپ كەلەدى. بەلايا وزەنىنەن وتەتىن ەسكى پاروم – بۇگىندە جايىلمادان ءشوپ شاباتىن اعايىن ءۇشىن جالعىز عانا سۋ كولىگى. الايدا وعان ءمىنۋدىڭ ءوزى قاۋىپتى. سەبەبى قۇرىلعىنىڭ جالعىز عانا تراكتوردى كوتەرەتىن شاماسى بار. جۋىقتا العاشقى قار تۇسكەندە پاروم ۇستىندەگى تراكتور تايعاناقتاپ سۋعا قۇلاپ، رۋلدە وتىرعان تراكتوريست ازامات اۋپىرىمدەپ امان قالعانىن دا كوزىمىز كوردى.

قىركۇيەك ايىندا پاۆلودار وبلىسىنىڭ اكىمى ابىلقايىر سقاقوۆ ماي اۋدانىنىڭ حالقىمەن جۇزدەسكەندە باسكولدىك تۇرعىندار بۇل ماسەلەنى كوتەرىپ، ايماق باسشىسى نازارىنا الاتىنىن ايتقان ەدى. اكىم ءوز ۋادەسىندە تۇردى. ءوڭىردىڭ 2023-2025 جىلدارعا ارنالعان بيۋدجەتىندە بەلايا وزەنى ۇستىنەن پانتوندى كوپىر تۇرعىزۋعا 215 ملن تەڭگە قاراستىرىلدى.

– پانتوندى كوپىر سالۋ ماسەلەسى وتكەن عاسىردىڭ سوناۋ 90-ىنشى جىلدارىنان جالعاسىپ كەلە جاتىر ەكەن. ءساتىن سالىپ، كەلەر جىلى قولعا الىناتىنى ەل-جۇرتتى قۋانتىپ وتىر. ۇزىندىعى – 60، ەنى شامامەن 9 مەتردەي بولاتىن كوپىر قۇرىلعىسى 200 توننا جۇك كوتەرە الادى. مۇنداي جاڭا ۇلگىدەگى پانتوندى كوپىر قازاقستانداعى ەڭ العاشقىسى بولماق. ەلىمىزدە سۋ كەمەسى سالاسىنداعى قۇرىلىس جۇمىستارىمەن اينالىساتىن نەبارى 3 كاسىپورىن عانا بار ەكەن. ءبىزدىڭ اكىمدىك جاريالايتىن كونكۋرستى سولاردىڭ ءبىرى ۇتىپ الاتىنى انىق. كوپىر جوباسىنىڭ مەملەكەتتىك ساراپتاماسىنا وڭ شەشىم شىعارىلعانىن ايتقىمىز كەلەدى. ەندى تەك وبلىستىق ءماسليحات سەسسياسىنىڭ حاتتاماسىن عانا كۇتىپ وتىرمىز. ودان ءارى كونكۋرس جاريالاۋعا تولىق نەگىز بار، – دەيدى ماي اۋدانىنىڭ اكىمى اعىباي ءامىرين.

جاڭا كوپىر جينالمالى ۇلگىدە سالىنباق. ياعني ول جاز بەن قىستا جۇمىس ىستەپ، قىستا مۇز قاتقاندا جينالىپ قويىلادى. بۇل نىسان نەگىزىنەن باسكول مەن وعان قاراستى بوزشا، جاڭاتىلەك اۋىلدارى ءۇشىن ماڭىزى زور بولاتىنىن بايقايمىز. سەبەبى اتالعان ەلدى مەكەندەردىڭ ازاماتتارى بەلايا وزەنىنەن ءارى اسىپ، 5،7 مىڭ گەكتار جەردەن ءشوپ شابادى. بۇگىندە اتالعان اۋماقتىڭ 2،8 مىڭ گەكتارى شارۋالارعا ۇلەستىرىلگەن، قالعانىن كونكۋرستىق ۇلگىدە راسىمدەۋ كوزدەلىپ وتىر. كەلەشەكتە پانتوندى كوپىردى كۇتىپ ۇستاۋ سەنىمگەرلىك باسقارۋعا بەرىلۋى مۇمكىن.

پاۆلودار وبلىسى،

ماي اۋدانى،

باسكول اۋىلى