قوعام • 20 قاراشا، 2022

بايقاۋ ورتالىعى: سايلاۋ ۋچاسكەلەرىنىڭ دايىندىعى جوعارى

پاۆلودار وبلىسىندا تاۋەلسىز بايقاۋشىلار شتابى تۇراقتى نەگىزدە ارەكەت ەتۋدە، دەپ حابارلايدى Egemen.kz.

«پارتيالىق ەمەس بايقاۋ ورتالىعى» رقب پاۆلودار وبلىسى بويىنشا فيليالىنىڭ مۇشەلەرى سايلاۋ ۋچاسكەلەرىندە تاڭعى 6.00-دەن جۇمىسقا كىرىسكەن.

كەزەكتەن تىس قر پرەزيدەنتىنىڭ سايلاۋىنا مونيتورينگ جۇرگىزۋ ماقساتىندا وڭىردەگى بىرنەشە ۇكىمەتتىك ەمەس ۇيىم بىرىگىپ ارەكەت ەتۋدە. اتاپ ايتقاندا، «قايسار KZ»، «NAMYS PVL» قوعامدىق بىرلەستىكتەرى جانە اۋعان سوعىسىنىڭ ينتەرناتسيونال جاۋىنگەرلەرى قوعامىنىڭ مۇشەلەرى وبلىستىڭ 507 اشىق سايلاۋ ۋچاسكەلەرىندە باقىلاۋ جۇمىستارىن جۇزەگە اسىرۋدا.

وسى ورايدا «پارتيالىق ەمەس بايقاۋ ورتالىعى» رقب پاۆلودار وبلىسى بويىنشا فيليالىنىڭ توراعاسى الما قوزباەۆانى سوزگە تارتتىق.

«بىزبەن بەلسەندى ازاماتتىق پوزيتسياعا يە 2000-نان استام ادام جۇمىس ىستەپ جاتقانىن اتاپ وتكىم كەلەدى. ورتالىق مۇشەلەرى سايلاۋ پروتسەسىنە ەش بوگەت جاساماستان ۋچاسكەلەردەگى جاعدايدى باقىلاپ، بارلىق داۋىس بەرۋ شارالارىنىڭ زاڭ شەڭبەرىندە جۇزەگە اسىپ جاتقانىنا كوز جەتكىزۋدە.

قازىرگى تاڭدا سايلاۋ ناۋقانى ءبىزدىڭ ساياسي ءومىرىمىزدىڭ اجىراماس بولىگى. قازاقستاندىقتار بارلىق دەڭگەيدەگى سايلاۋ پروتسەستەرىنە، اتاپ ايتقاندا، اۋىل اكىمدەرى، بارلىق دەڭگەيدەگى ءماسليحات جانە ءماجىلىس دەپۋتاتتارى سايلاۋىنا بەلسەنە قاتىساتىنىن بايقاپ كەلەمىز. بۇيىرتسا، الداعى ۋاقىتتا اۋدان اكىمدەرىن سايلاۋعا قول جەتكىزەمىز.

كەزەكتەن تىس پرەزيدەنت سايلاۋى اسا جاۋاپكەرشىلىكتى قاجەت ەتەدى. ءبىزدىڭ ارقايسىمىزدىڭ داۋىسىمىز تۇتاس ەلدىڭ بولاشاعى ءۇشىن اسا ماڭىزدى ەكەنىن كوپشىلىك ۇعىنىپ، داۋىس بەرۋگە بەلسەنە كەلىپ جاتىر. سەبەبى قازاقستان – ءبىزدىڭ ورتاق شاڭىراعىمىز.

بايقاۋشىلار تاڭعى ساعات 6.00-دەن باستاپ ءوز جۇمىستارىنا كىرىستى، ولار باقىلاۋ شارالارىن ۋچاسكەلەردەگى كوميسسيانىڭ حاتتاماسى قولدارىنا تيگەندە بارىپ توقتاتادى. تاڭ قاراڭعىسىنان داۋىس بەرۋ ورىندارىنىڭ تالاپقا ساي بولۋى تەكسەرىلدى. بۇعان دەيىنگى سايلاۋ ناۋقاندارىنا دا قاتىسقان ەدىك. ولارمەن سالىستىرعاندا بۇگىنگى سايلاۋدا سايلاۋ كوميسسيالارىنىڭ دايىندىعى وتە مىعىم، قىزمەتكەرلەردىڭ جاۋاپكەرشىلىگى ارتقانى بايقالىپ وتىر. ازىرگە پاۆلودار وبلىسىنداعى سايلاۋ ۋچاسكەلەرىندە زاڭ بۇزۋشىلىق تىركەلمەگەنىن اتاپ وتۋگە بولادى»، دەيدى فيليال توراعاسى.