«قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنا سايكەس 2025 جىلعا دەيىن جىل سايىن 3 مىڭ پاتەر سالۋ جانە ساتىپ الۋ كوزدەلىپ وتىر. بيىل وسى ماقساتتا رەسپۋبليكالىق بيۋدجەتتەن 21,6 ملرد تەڭگە قاراستىرىلعان.
ساتىپ الۋ قۇقىعىنسىز جالعا بەرىلەتىن تۇرعىن ءۇي بەس جىل مەرزىمگە بەرىلەدى. وسى كەزەڭ ىشىندە جاستاردىڭ ءوز باسپاناسىنىڭ باستاپقى جارناسىن جيناۋ مۇمكىندىگى تۋماق. ال كەيىننەن بوساعان تۇرعىن ءۇي كەلەسى ۇمىتكەرلەرگە بەرىلەدى.
جالپى العاندا, 2019 جىلدان بەرى «نۇرلى جەر» مەملەكەتتىك باعدارلاماسى شەڭبەرىندە جۇمىس ىستەيتىن جاستارعا ەلىمىزدەگى ءۇش مەگاپوليستە 7 مىڭعا جۋىق جالعا بەرىلەتىن پاتەر سالىندى.
سونىمەن قاتار بۇگىندە استانا قالاسىندا «ەلوردا جاستارى», الماتى قالاسىندا «الماتى جاستارى», قاراعاندى وبلىسىندا «قاراعاندى جاستارى», جامبىل وبلىسىندا «اۋليەاتا جاستارى», باتىس قازاقستان وبلىسىندا «ورال جاستارى», قوستاناي وبلىسىندا «قوستاناي جاستارى», الماتى وبلىسىندا «الاتاۋ جاستارى», اتىراۋ وبلىسىندا «اتىراۋ جاستارى» تۇرعىن ءۇي باعدارلامالارى ىسكە قوسىلدى. بۇدان بولەك, پاۆلودار وبلىسىندا «ەرتىس جاستارى», اباي وبلىسىندا «اباي جاستارى», اقتوبە وبلىسىندا «اقتوبە جاستارى» وڭىرلىك نەسيەلەندىرۋ باعدارلامالارى دايارلانۋدا.
وڭىرلىك باعدارلامالار جەرگىلىكتى بيۋدجەتتەن قارجىلاندىرۋ ەسەبىنەن جۇمىس ىستەيتىن جاستاردى تۇرعىن ۇيمەن قامتاماسىز ەتۋگە جانە باستاپقى جارناسى 0-10 پايىزدان باستاپ, 25 جىلعا دەيىنگى مەرزىمگە جىلدىق 5 پايىزدىق جەڭىلدەتىلگەن قارىز بەرۋگە باعىتتالعان.
ايتا كەتەيىك, اتالعان ءىس-شارالار مەملەكەت باسشىسىنىڭ قولجەتىمدى جالعا بەرىلەتىن تۇرعىن ۇيلەر سالۋ جانە جەكە باسپانا ساتىپ الۋ قۇرالدارىن دامىتۋ تاپسىرماسىن ىسكە اسىرۋ ماقساتىندا جۇزەگە اسىرىلۋدا.
