ەرتىس – ەلىمىزدەگى ەڭ ۇزىن وزەن. پاۆلودار قالاسىن وزگە وڭىرلەرمەن بايلانىستىرۋعا ارنالعان ەكى بىردەي اۆتوموبيل كوپىرى اتالعان سۋ ايدىنىنىڭ ۇستىنەن وتەدى. ونىڭ العاشقىسى 1962 جىلى سالىنعان, ءالى كۇنگە قولدانىستا. ال ەكىنشىسى «استانا – وسكەمەن» اۆتوجول قۇرىلىسى اياسىندا 2016 جىلى جاڭادان تۇرعىزىلدى. العاشقى كوپىر بۇگىندە ابدەن توزىپ, شىقپا جانىم, شىقپانىڭ كۇيىن كەشىپ تۇرعانى راس. ودان تەك جەڭىل كولىكتەر مەن قالا ماڭىنا قاتىنايتىن جولاۋشىلار اۆتوبۋستارى عانا جۇرەدى. ۇلكەن جۇك كولىكتەرىنىڭ بارلىعى وبلىس ورتالىعىنا كىرىپ-شىعۋ ءۇشىن جاڭا كوپىردى پايدالانادى.
بيىل قازان ايىنىڭ باسىندا مەملەكەت باسشىسى قاسىم-جومارت توقاەۆ كەرەكۋگە كەلگەندە جۇرتشىلىقتى جىلدار بويى الاڭداتقان بۇل ماسەلەگە نۇكتە قويىلاتىنىن ايتقان ەدى.
– پاۆلوداردىڭ وراسان زور ترانزيتتىك الەۋەتى بار. بىراق ەرتىستەن وتەتىن ەسكى كوپىر كولىك-لوگيستيكا سالاسىن دامىتۋعا مۇمكىندىك بەرمەي وتىر. ونىڭ اپاتتى جاعدايدا تۇرعانىنا ءبىراز جىل بولدى. كوپىر ارقىلى جۇك كولىكتەرىنىڭ جۇرۋىنە تىيىم سالىنعان. بۇعان دەيىن وبلىس ورتالىعىن اينالىپ وتەتىن جاڭا كوپىر سالۋ جوسپارلانعان. ۇكىمەتكە كەلەسى جىلى وسى جوبانى باستاۋدى تاپسىرامىن. جولدى كۇتىپ ۇستاۋعا باسا نازار اۋدارۋ قاجەت, – دەگەن ەدى پرەزيدەنت.
پرەزيدەنت جۇكتەگەن تاپسىرمانىڭ ناتيجەسى كوپ كۇتتىرگەن جوق. وسىدان بىرەر كۇن بۇرىن يندۋستريا جانە ينفراقۇرىلىمدىق دامۋ مينيسترلىگى جاڭا كوپىردىڭ قۇرىلىسى كەلەسى جىلى باستالادى دەپ سۇيىنشىلەدى. جالپى ۇزىندىعى 2,7 شاقىرىم, ءتورت جولاقتان تۇراتىن جاڭا ستراتەگيالىق نىسان ەسكى كوپىردىڭ جانىنان سالىناتىنى بەلگىلى بولدى. ونىڭ قۇرىلىسىنا ەل بيۋدجەتىنەن 40,3 ملرد تەڭگە بولىنبەك. قۇرىلىس جۇمىستارى 2023 جىلى باستالىپ, شامامەن 3,5-4 جىلعا جالعاسادى.
اتاپ وتەرلىگى, بىلتىر «قازاۆتوجول» اق-نىڭ وڭىردەگى فيليالىنىڭ باسشىلىعى وبلىس ورتالىعىندا جاڭا كوپىر قۇرىلىسى قولعا الىنا قالسا, ءبىزدىڭ جوبامىز دايىن دەپ مالىمدەگەن-تۇعىن. انىقتاپ بىلگەنىمىزدەي, نىسان سول جوبانىڭ نەگىزىندە تۇرعىزىلاتىن بولىپ شىقتى.
– جاڭا كوپىر ەسكىسىنىڭ ءدال جانىنان, اعىستىڭ تومەنگى تۇسىنان سالىناتىن بولىپ شەشىم قابىلداندى. كوپىردىڭ ۇزىندىعى 691 مەتردى قۇراسا, وعان قاتىستى بارلىق جولدىڭ ۇزىندىعى 2,7 كيلومەترگە جەتەدى. نورماتيۆ بويىنشا جاڭا كوپىردىڭ قۇرىلىسى 25 ايدا سالىنۋى كەرەك. ودان سوڭ ەسكى كوپىر بۇزىلىپ, بولشەكتەلىپ الىنادى. وعان شامامەن قوسىمشا 14 اي جۇمسالادى دەپ وتىرمىز. سوندا جوبا بارلىعى 39 اي ىشىندە ەڭسەرىلۋگە ءتيىس. «قازاۆتوجول» اق نەگىزگى تاپسىرىس بەرۋشى رەتىندە تاڭدالدى. سوندىقتان نەگىزگى جاۋاپكەرشىلىك تە بىزگە ءتۇسىپ تۇر. قاراجات ناقتى بولىنگەنى بەلگىلى بولسا, ءبىز كونكۋرس جاريالاۋ جۇمىستارىن باستاپ كەتەمىز, – دەيدى «قازاۆتوجول» اق وبلىستىق فيليالى ديرەكتورىنىڭ ورىنباسارى الەكسەي لوگۆينەنكو.
قۇرىلىسى جاعىنان كوپىر امەريكانىڭ ءىرى قالالارىندا ءجيى سالىناتىن ەكسترادوز تيپىندەگى اسپالى نىسان رەتىندە تۇرعىزىلماق. قۇرىلىستى 4 ۇلكەن تىرەك ۇستاپ تۇرادى. مۇنداي كونسترۋكتسيا ءوزىنىڭ بەرىكتىگىن دالەلدەگەن. ءارى جاسالعان جوبا دا مەملەكەتتىك ساراپتامادان ءساتتى ءوتتى.
الەكسەي الەكساندروۆيچتىڭ سوزىنە قاراعاندا, كوپىر ورنىن دايىنداۋ بارىسىندا ەرتىس وزەنىنىڭ وڭ جاق جاعالاۋىندا شامامەن 3,5 مىڭداي اعاش وتالادى. ونىڭ ورنىنا كەيىن 35 مىڭعا جۋىق جاسىل جەلەك وتىرعىزۋ جوسپارلانعان. ەگەر قاراجات ۋاقتىلى ءبولىنىپ, قۇرىلىس جۇمىستارى كوزدەلگەن مەرزىمدە باستالىپ كەتسە, جەرلەستەرىمىز جاڭا كوپىر بويىمەن 2025 جىلى جۇرە باستاۋى عاجاپ ەمەس.
ايتپاقشى, ا.لوگۆينەنكو پاۆلوداردا «شىعىس اينالما جولى» جوباسى دا دايىن تۇرعانىن ايتىپ ءوتتى. ترانزيتتىك كولىكتەردىڭ قالانى شىعىس جاعىنان اينالىپ, وزگە باعىتتارعا وتۋىنە مۇمكىندىك جاسايتىن جول تارماعى شامامەن 33 شاقىرىمدى قۇرايدى. العاشقى قۇنى 22 ملرد تەڭگەنى قۇراعان جوبادا اينالما جولدار, جول بويى سەرۆيسى, ۇلكەن جۇك كولىكتەرىنە ارنالعان تۇراقتار, باسقا دا قاجەتتىلىك تولىعىمەن قاراستىرىلعان. شىعىس اينالما جولى جۇزەگە اسسا, وبلىس ورتالىعى اينالاسىنداعى اينالما جولدار شەڭبەرى تولىق تۇزىلمەك. جوبا ازىرشە قارجىلاندىرۋدى كۇتىپ تۇر.
پاۆلودار
