سەرىكتەستىك سەرپىنى

ديقانداردىڭ قولى ۇزارىپ، جاۋاپتى ناۋقاندا شيراق قي­مىلداپ، ماڭداي تەرمەن وسى­رىل­گەن التىن استىقتىڭ ءبىر ءدانى دالادا ىسىراپ بولماي، قۇت قامباسىنا قۇيىلۋىنا جاڭا تەحنيكانىڭ سەپتىگى ءتيىپ وتىر. ناقتىلاپ ايتار بولساق، بەلارۋس­تىڭ تيىمدىلىگى الدەقاشان دالەل­دەنگەن كوممۋنالدىق جانە اۋىل شارۋاشىلىعى سالا­لارىنىڭ وزىق تەحنيكالارىن ەلىمىزدە قۇراس­تىرۋىنا بايلانىستى قات-قابات شارۋا ساتىمەن ساباقتالدى.

بۇگىندە وبلىستاعى ەگىستىك القاپتاردا اتالعان كاسىپورىن­نىڭ ءوندىرىس الاڭدارىندا قۇراستىرىلعان «روستسەل­ماش»، «كلەۆەر» اكتسيونەرلىك قوعام­دارىنىڭ، «AGCO-Amity JV LLC» كومپانياسىنىڭ برەندتىك ونىمدەرىن ءجيى كورۋگە بولادى. كومبايندارمەن بىرگە ديقاندار ءۇشىن وتە قاجەتتى، الىمدىلىعى جوعارى زاماناۋي استىق كومبايندارى مەن ەكپىنى ءۇي جىققان­داي قۋاتتى تراكتورلار، جۇمى­سى ءونىمدى ەگىس كەشەندەرى، ءار­تۇرلى مودەلدەگى كوممۋنالدىق تەح­نيكالار شىعارادى. 2019 جىلى 1 464 بىرلىك تەحنيكا شىعارسا، 2020 جىلى بۇل كورسەتكىش 3 مىڭ­عا جەتتى. وسىلايشا، جىل سايىن ەلىمىزگە قاجەتتى تەحنيكالاردىڭ سانى كۇرت كوبەيىپ كەلەدى.

وڭىردەگى بۇرىنعى توزىعى جەتكەن تەحنيكا جاڭارا باس­تادى. تەحنيكانىڭ جاڭارۋى كوكتەمگى جانە كۇزگى ەگىن وراعى ءتارىزدى جاۋاپتى ناۋقاندى ۋاق­تىلى اتقارۋعا مول مۇمكىندىك بە­رىپ وتىر. شىنىن ايتقاندا، استىقتى ءوڭىردىڭ ديقاندارى جاڭا زاماننىڭ تالابىنا تو­لىق جاۋاپ بەرەتىن ءدال وسىنداي تەحنيكالارعا سۋساپ وتىرعان بولاتىن.

ەندى ءبىر ءسات ىلكىمدى ءىستىڭ باياندى باستاۋى تۋرالى ءبىر اۋىز ءسوز ايتا كەتەلىك. جوبانىڭ العاشقى كەزەڭىن جۇزەگە اسىرۋ ءۇشىن 2014 جىلى بەلارۋستىڭ «مينسك تراكتور زاۋىتى» اشىق اكتسيونەر­لىك قوعامى جانە وتاندىق «قازاقستان اگرويننوۆاتسيالىق كورپوراتسيا­سى» جاۋاپكەرشىلىگى شەكتەۋ­لى سەرىكتەستىگى بىرىگىپ، «متز-كايك» سەرىكتەستىگىن قۇرعان بولاتىن. كەيىن بۇل جوبا اۋقىمدى ماقساتتى مۇرات تۇتقان يندۋستريا­لاندىرۋ كارتاسىنا ەنگىزىلدى. وبلىس اكىمدىگىنىڭ قولداۋىمەن سۋمەن، ەلەكتر قۋاتىمەن جاب­دىقتالىپ، ينفراقۇرىلىمدى ءتۇزۋ ماسەلەسى وڭىنان شەشىلدى. العاشقىدا ىسكەرلىك بايلانىس اياسىندا وڭىرگە اسا قاجەتتى جەتى ءتۇرلى تەحنيكانىڭ 500 بىرلىگى قۇ­راستىرىلدى. جاعىمدى جاڭالىق ەلدى ەلەڭ ەتكىزدى. ويتكەنى بىر­لەس­كەن كاسىپورىن دايىنداپ شىعاراتىن جاڭا تەحنيكالاردىڭ قۇنى جەرگىلىكتى ديقاندار ءۇشىن قولجەتىمدى ەدى. تراكتورلار عانا ەمەس، ءارالۋان جۇك كولىكتەرىنىڭ، ارنايى ماقساتتا پايدالانىلاتىن ماشينالاردىڭ دا بىرنەشە ءتۇرى شىعارىلا باستادى.

بۇگىندە بار شارۋاسى كەڭ ءورىس العان ۇجىم «ۆيراج» حولدينگىنىڭ ۇلەسكەر كومپانياسى رەتىندە وڭىرلىك يندۋستريالاندىرۋدىڭ كوش باسىندا تۇر. كوكشەتاۋ­داعى يندۋستريالىق-تەح­نو­لو­گيالىق پاركىن قامتيتىن قۋاتتى كورپوراتسياسى ءوزى­نىڭ مەم­لەكەتتىك، قارجىلىق تەتىك­تەرىن «قازاگروقارجى»، «اگ­رار­لىق نەسيە كورپوراتسياسى»، «برك-ليزينگ» اكتسيونەرلىك قوعامدارى ارقىلى ىسكە اسىرىپ، ءوز ونىمدەرىن ەلىمىز بويىنشا نارىقتىق اينالىمعا شىعارىپ وتىر. شىن مانىندە قالىڭ قاۋىم يندۋستريالىق جوبا جەتىستىگىنىڭ جەمىسىن كورىپ كەلەدى.

اقمولا وبلىسى