سوعىسقا بارۋ سۇرانىسى قابىل بولىپ, اسكەر قاتارىنا الىنعان مانشۇك ۇرىس الاڭىنا اتتاناردان بىرنەشە كۇن بۇرىن بريگادا كومانديرىنىڭ ساياسي جۇمىس جونىندەگى ورىنباسارى مىندەتىن اتقارعان پودپولكوۆنيك ساقتاعان بايىشەۆ مانشۇكتىڭ وتىنىشىنە قۇلاق اسىپ, ونى پۋلەمەتشىلەر روتاسىنا جىبەرۋ تۋرالى شەشىم قابىلدايدى.
مانشۇك جيەنعاليقىزى 1942 جىلدىڭ قارلى قىسىندا ۆەليكيە لۋكي قالاسىن جاۋ قولىنان ازات ەتۋگە تىكەلەي قاتىسا ءجۇرىپ, ۇرىس الاڭىندا سانيتار نۇسقاۋشى بولىپ شايقاسقان. كىشكەنتاي كەزىندە اكەسى احمەتكە ەلىكتەپ دارىگەر بولۋدى ارمان ەتكەن ول مەديتسينا ينستيتۋتىنىڭ ءبىرىنشى كۋرسىن ءتامامداپ ۇلگەرگەن بولاتىن. اقىرى قان مايداندا جاۋىنگەرلەرگە كومەك كورسەتىپ, «قايىرىمدى سولدات» اتانادى. اراسىندا بوس قالعان پۋلەمەتپەن جاۋ اسكەرىن اتقىلاي ءجۇرىپ, ەرەكشە كوزگە تۇسەدى. وجەت قىزدىڭ بۇل ءىس-ارەكەتى ونى پۋلەمەتشى بولامىن دەگەن ارمانىنا جەتكىزەدى. 1943 جىلى كوماندير مانشۇكتىڭ ءوتىنىشىن ورىنداپ, الدىڭعى شەپكە الادى. ءسويتىپ, ول پۋلەمەتشىلەر باتالونىنا قوسىلادى. ءتىپتى ءبولىم كومانديرىنە دەيىن كوتەرىلىپ, سەرجانت اتاعى بەرىلەدى.
باتىر قىز 1943 جىلدىڭ 15 قازانىندا ۇرىس دالاسىندا ەرلىكپەن قازا تاپتى. ونىڭ قازاسى مايدانداستارىنىڭ دا قابىرعاسىن قايىستىردى. سول كەزدەگى ءتۇرلى بۇقارالىق اقپارات قۇرالدارى مانشۇك تۋرالى جارىسا جازىپ, ونىڭ ەسىمىن ەلگە ۇران ەتتى. قازا بولعاننان التى اي وتكەن سوڭ مانشۇك مامەتوۆاعا كەڭەس وداعىنىڭ باتىرى اتاعى بەرىلدى. جالپى حالقىمىزدا جاۋعا ەرلەرمەن قاتار قاسقايىپ قارسى تۇرعان قىزدارىمىز از بولماعان. بۇگىنگى زاماندا دا جوق ەمەس. بۇل سوزىمىزگە قىزدارىمىزدىڭ كەشەگى جەلتوقسان كوتەرىلىسى كەزىندەگى ەرلىك قادامدارى دالەل بولا الادى.
قۋانالى الماسبەك ۇلى,
شەلەك تاريحي-ولكەتانۋ مۋزەيىنىڭ قور ساقتاۋشىسى
الماتى وبلىسى
