سالتاناتتى ءىس-شاراعا قالالىق اكىمدىك, قورعانىس ىستەرى جونىندەگى دەپارتامەنتتىڭ وكىلدەرى, قارۋلى كۇشتەردىڭ ارداگەرلەرى مەن ساربازداردىڭ اتا-انالارى ارنايى شاقىرىلدى.
ءبىر جىل بۇرىن اسكەرگە كەتكەن نەمەرەسى الىشەر تاستىبايدى قارسى العان استانا قالاسىنىڭ تۇرعىنى, زەينەتكەر كۇلپان شايسۇلتانوۆا يگى ءىس-شارانى ۇيىمداستىرۋشىلارعا العىسىن ايتتى.
– الىشەر قازىرگى قوناەۆ, بۇرىنعى قاپشاعاي قالاسىنداعى اسكەري بولىمدە قىزمەت ەتتى. ءبىر جىل ىشىندە نەمەرەم شىڭدالعان, شىنىققان ازامات بولىپ ورالدى. ءبولىم باسشىلىعىنا مىڭ دا ءبىر راقمەت. قىزمەت بارىسىندا بالامىزبەن ۇنەمى بايلانىستا بولدىق. پاراشيۋتپەن سەكىرگەن سۋرەتىنە دەيىن سالىپ جىبەرەتىن. ماقتاۋ قاعازدارى دا جەتەرلىك, – دەيدى قۋانىشىن جاسىرا الماعان اجە.
پويىزدان تۇسكەن ساربازدار ساپ تۇزەپ كەلىپ, توپ باسشىسى اسكەري تارتىپپەن استانا قالاسى قورعانىس ىستەرى جونىندەگى دەپارتامەنتىنىڭ باستىعى, پودپولكوۆنيك م.تۇرىسكەلديەۆكە بايانات بەردى:
– پودپولكوۆنيك مىرزا, استانالىق ساربازدار 35-گۆارديالىق دەسانتتىق شابۋىلداۋشى بريگاداسىندا ابىرويمەن اسكەري قىزمەت اتقارىپ, وتباسىنا ورالدى. توپ باسشىسى, قاتارداعى جاۋىنگەر الىشەر نازيەۆ!
سالتاناتتى مارشتان سوڭ «قارۋلى كۇشتەر ارداگەرلەرى» قوعامدىق ۇيىمىنىڭ ورىنباسارى, گەنەرال-مايور م.ناعۇمانوۆ وتباسىنا ورالعان ساربازداردى قۇتتىقتاپ, ءسوز سويلەدى.
– سىزدەردى ءبىر جىل بۇرىن اسكەرگە سالتاناتپەن شىعارىپ سالعان ەدىك. ەلىمىزدىڭ تىنىشتىعىن قورعاۋ جونىندەگى حالىقتىڭ تاپسىرماسىن سىزدەر ادال ورىندادىڭىزدار. سىزدەرگە بەرىلەتىن ەندىگى تاپسىرما – بەرىك وتباسىن قۇرىپ, ۇرپاق ءوسىرىپ, ادال ەڭبەك ەتۋ. ەلىمىزدىڭ دامۋىنا ۇلەس قوسا بەرىڭىزدەر! – دەدى گەنەرال-مايور.
قورعانىس ىستەرى جونىندەگى دەپارتامەنت وكىلدەرىنىڭ ايتۋىنشا, اسكەري قىزمەتتىڭ بەدەلىن ارتتىرۋ ماقساتىندا مۇنداي ءىس-شارانى ۇيىمداستىرۋ الداعى ۋاقىتتا داستۇرگە اينالماق.
