وندىرىستىك قۇرال-جابدىعى ابدەن توزىپ, توبەسىنەن سۋ سورعالاعان ەكىباستۇزداعى جىلۋ-ەلەكتر ورتالىعىنىڭ الداعى قىستا قالانى جىلۋمەن قامتۋى ۇلكەن ماسەلەگە اينالاتىنى تۋرالى گازەت بەتىندە بىرنەشە مارتە جازعان ەدىك. كاسىپورىن يەلەرى شىعىنى باستان اسىپ كەتكەن ورتالىقتى ساقتاپ قالۋدىڭ جالعىز جولى رەتىندە ونى مەملەكەت بالانسىنا باسى ءبۇتىن تەگىن بەرە سالۋعا دايار ەكەنىن دە مالىمدەگەن. دەي تۇرعانمەن وبلىس بيلىگى ونى كوممۋنالدىق مەنشىككە قابىلداۋدان باس تارتتى. اكتسيونەرلەردى قىسپاققا الىپ, اقىر-سوڭى تامىز ايىنىڭ سوڭىن الا ستانسادا جوندەۋ جۇمىستارى قولعا الىنعان ەدى.
«ەكىباستۇزجىلۋەنەرگو» جشس-نىڭ باسشىسى پاۆەل مەلنيچۋك قىسقا ازىرلىك ساپاسى وتكەن جىلعا قاراعاندا ايتارلىقتاي تومەن بولارىن مويىنداپ وتىر. سەبەبى جوندەۋ جۇمىستارى وتە كەش باستالدى. «پاۆلودارەنەرگو» اق-نىڭ ەكىباستۇزدىق ەنشىلەس كومپانياعا اسا جاناشىرلىق تانىتپاي وتىرعانى دا ايقىن.
وڭىرلىك ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى ەرجان سالحانوۆ «ەكىباستۇزجىلۋەنەرگو» جشس-ىندا ۇكىمەت نۇسقاۋىمەن قۇرىلعان ارنايى جۇمىس توبى ارەكەت ەتىپ جاتقانىن, ونىڭ ناتيجەسىندە قورىتىندىلار شىعارىلىپ, ءوندىرىس نىسانىن جاڭارتۋدىڭ ناقتى شارالارى قولعا الىناتىنىن اتاپ ءوتتى.
– قازىرگى ساتتە ەكىباستۇزداعى جىلۋ ورتالىعى قالانى جىلۋمەن تولىق قامتىپ تۇر. جىلۋعا قوسۋعا قاتىستى بارلىق جۇمىس ۋاقىتىندا اياقتالدى. ەندى جىلۋ بەرۋ ماۋسىمىنىڭ ناعىز شارىقتاۋ شەگىنە دايىندىق جۇمىستارى پىسىقتالۋدا. نەگىزگى جۇكتەمە قاڭتار ايىنا تۇسەتىنى ءمالىم. «پاۆلودارەنەرگو» اق بۇل بويىنشا مىندەتتى دايىندىعىن جۇرگىزۋدە, – دەيدى ول.
اكتسيونەرلىك قوعامنىڭ باس ديرەكتورىنىڭ مىندەتىن اتقارۋشى ۆاديم لەسين №14 قازاندىقتا سوڭعى جوندەۋ جۇمىستارى اياقتالىپ قالعانىن ايتادى. قازىر پەشتى وقشاۋلاۋ شارالارى جۇزەگە اسۋدا. قوسىمشا جابدىقتاردىڭ بارلىعى قىسقى كەزەڭگە دايىن تۇر. بۇگىندە جىلۋ ورتالىعىنىڭ شاتىرى دا بۇتىندەلۋدە. مەردىگەر فيرما اياز تۇسكەنشە وزىنە جۇكتەلگەن جۇمىستى اياقتاپ شىعۋعا تىرىسادى.
– ءوڭىردىڭ ەلەكترمەن جابدىقتاۋ سالاسىندا ماماندار تاپشىلىعى ايقىن سەزىلۋدە. مىسالى, پاۆلودار قالاسىنداعى كاسىپورنىمىزدا جۇمىس شتاتتارىنىڭ 15 پايىزى, ەكىباستۇزدا 25 پايىزى بوس تۇر. قىزمەتكەرلەرىمىز ەڭبەكاقىنىڭ از ەكەنىنە ءجيى شاعىمدانادى. سوندىقتان بۇل تىعىرىقتان شىعۋدىڭ جولى رەتىندە جاڭا تاريفتىك باعالاردى ۋاكىلەتتى ورگانعا ۇسىندىق. ءبىزدىڭ ۇسىنىسىمىز ازىرشە قاراستىرىلىپ جاتىر. قانداي باعا ۇسىنىپ وتىرعانىمىزدى ايتا المايمىن, ناقتى تاريفتىك جۇيەنى مەملەكەتتىك جاۋاپتى ورگاندار بەلگىلەيتىن بولادى. ەگەر تاريفتىك ساياسات ءبىزدىڭ كوڭىلىمىزدەن شىعاتىنداي رەتپەن قابىلدانسا, كاسىپورىنداعى الەۋمەتتىك احۋالدى كوتەرىپ, ەڭبەكاقىنى وسىرەمىز. سايكەسىنشە كادرلار ماسەلەسىن شەشەمىز, – دەيدى ۆ.لەسين.
جالپى, قازىرگى كۇنى پاۆلودار وبلىسىنىڭ اۋماعىندا 14 ەنەرگوبلوك, 20 قازاندىق پەن 13 تۋربينا ىسكە كىرىسكەن. بۇل ۇلكەن شاھارلارداعى جىلۋمەن جابدىقتاۋ نىساندارىنداعى جاعداي. تاعى 9 قازاندىق پەن 1 تۋربينا رەزەرۆتە تۇر. ەنەرگيا ورتالىقتارىندا
1 ملن 443,6 مىڭ توننا كومىر مەن 15 مىڭ توننا مازۋت ساقتاۋلى. وسىنشاما كولەمدەگى وتىن قورى ستراتەگيالىق جىلۋ نىساندارىنىڭ 10 تاۋلىك بويى كىدىرىسسىز جۇمىس ىستەۋىنە جەتكىلىكتى ەكەن.
– بۇگىندە وڭىردە تۇرمىستىق كومىرمەن قامتۋ شارالارى دا ويداعىداي جۇرگىزىلىپ جاتقانىن اتاپ وتۋگە بولادى. الداعى كەزەڭدە ءوڭىر حالقىنا 430 مىڭ توننا كومىر قاجەت. قازىرگە دەيىن 360 مىڭ تونناسى ۇيلەرگە دەيىن جەتكىزىلگەن. بيۋدجەتتىك ۇيىمداردى قاتتى وتىنمەن قامتاماسىز ەتۋ 96 پايىزعا ورىندالدى. «بوگاتىر كومىر», «مايكوبەن-ۆەست» سەكىلدى كومىر كەنىشتەرىمەن, تەمىرجول تۇيىقتارىندا ورنالاسقان «ەليت kz», «ا ۆەست-پاۆلودار», «Daman Group» جانە «Ihsan Group Kz» سەرىكتەستىكتەرىمەن باعانى ۇستاپ تۇرۋ بويىنشا مەموراندۋم جاسالدى, – دەيدى ەرجان سالحانوۆ.
كەرەكۋدىڭ تەمىرجول تۇيىقتارىنداعى بولشەكتىك باعا كومىردىڭ تونناسى ءۇشىن شامامەن 9 مىڭ تەڭگەدەن 20 مىڭ تەڭگەگە دەيىن جەتىپ تۇر. قازىرگى كۇنى «مايكوبە» كەنىشىنەن تۇرعىندار كومىردىڭ تونناسىن 7 500 تەڭگەدەن ساتىپ الا الادى. كومىر «سارىكول» كەنىشىندە – 6 500, «بوگاتىر كومىردە» 3 040 تەڭگەدەن بوساتىلۋدا. بۇدان بولەك كوپشىلىك «قاراجىرا» كومىرىنىڭ تونناسىن 8 300, «شۇباركولدىكىن» 5 501 تەڭگەدەن الىپ جاتقانى بايقالادى.
ايتپاقشى كوممۋنالدىق-تۇرمىستىق كومىردى Halykbank ۇسىنعان «halykmarket» قوسىمشاسى ارقىلى 24 ايعا ءبولىپ تولەۋمەن ساتىپ الۋعا بولادى. قىسقى وتىندى نەسيەگە نەمەسە ءبولىپ ساتىپ الۋ كەزىندە كومىر تيەۋ تۇيىعىنان جەتكىزۋ قاراستىرىلماعان. سەبەبى ساتىپ الۋشى ءونىمدى الاتىنىن راستاۋ ءۇشىن, سونىمەن قاتار تاۋاردىڭ ساپاسىنا تولىق كوز جەتكىزۋ ماقساتىندا نەسيەنى راسىمدەگەن كومىر بازاسىنا, ياعني ساتۋشىعا كەلۋگە ءتيىس. سايكەسىنشە, جەتكىزۋ باعاسى مەجەلى پۋنكتتىڭ قاشىقتىعىنا بايلانىستى ەسەپتەلەدى. ماسەلەن, پاۆلودار قالاسى بويىنشا ورتاشا جەتكىزۋ قۇنى 5 مىڭ تەڭگەدەن باستالادى. ازىرگە ءوڭىر بويىنشا ماركەتپلەيس ارقىلى كومىر ساتىپ العاندار تىركەلگەن جوق.
پاۆلودار وبلىسى
