جاپون تەكتى 100 000-نان استام ادام ءوز ۇيلەرىنەن قۋىلىپ, قاڭىراپ بوس قالعان تۇرمەگە قامالادى. وقيعا وسى تۇستان ءارى قاراي ءوربيدى. سولاردىڭ ىشىندە تۇرمە لاگەرىنە قامالعان ون ءتورت دوستىڭ جانە ولاردىڭ وتباسىلارىنىڭ باسىنان كەشكەن وقيعالارى كوزبەن كورگەندەي شىنايى باياندالادى. كىتاپتىڭ ءار تاراۋى ءارتۇرلى جاسوسپىرىمدەردىڭ كوزقاراسىن سيپاتتايدى, ولاردىڭ جاسى وسكەن سايىن, ۋاقىت العا جىلجىعان سايىن وقيعا حرونولوگيالىق تۇردە دامىپ وتىرادى. جازۋشى كەيبىر وقيعانىڭ ءبىر بولىگىن ايتۋ ارقىلى وزىندىك ەرەكشە ءادىس تابا بىلگەن. بۇل شىعارما New Yor Times-تىڭ بەستسەللەر كىتاپتارىنىڭ تىزىمىندە تۇر.
روماننىڭ ءبىرىنشى بولىمىندە جاسوسپىرىمدەر سان-فرانتسيسكوداعى جاپانتاۋننىڭ ءبىر اۋدانىندا تۇرادى. كەيبىرەۋلەرىن اق ناسىلدىلەر قۋدالاپ, «ەلىڭە قايت» دەپ كەۋدەسىنەن يتەرەدى, ساتقىنسىڭدار دەپ ايىپتايدى. بۇل شىن مانىندە, باتىس قوعامىنداعى ەميگرانتتاردىڭ باسىنان وتكىزگەن سان ءتۇرلى وقيعالارىنىڭ ءبىر پاراسى عانا دەرسىز.
الدىنان نەبىر قيىندىقتار كەزدەسسە دە, ارمانشىل جاستار كەرى قايتپايدى. العا جۇرە بەرەدى, ءومىردى ءارى قاراي جالعاستىرادى. ءتىپتى ەشتەڭەدەن تايسالماي, كەيدە كوڭىل كوتەرۋ ءۇشىن سوفتبول جانە بەيسبول كوماندالارىن قۇرادى, جاقىن ماڭداعى قاۋىمداس كوماندالارمەن قارسى ويىندار وينادى. قالاي بولسا دا, ولاردىڭ ءىس-ارەكەتتەرىنەن امەريكاعا دەگەن ادالدىق مەنمۇندالايدى.
شىعارمانىڭ شىنايى دا نانىمدى سۋرەتتەلۋىنىڭ ءبىر سەبەبى اۆتور ترەيسي ءچيدىڭ كەي تۋىستارى دا سول لاگەردە قامالۋى بولسا كەرەك. شىندىقتان تىسقارى ەشتەڭە جوق. ءبىز وتكەن داۋىردەگى تاريحي وقيعالاردى بۇرمالايتىن اق قاعازعا تۇسىرسەك, سونىڭ ءوزى تاريح ءۇشىن ۇلكەن جەتىستىك بولماق. ولاي بولماسا, وندا تاريحتىڭ قايتالانۋ زاڭدىلىقتارىن ءتۇسىنۋ قابىلەتىمىزدى جوعالتامىز. بىراق شىندىق پەن تاريح قاتار جۇرسە, كوركەم شىعارمانىڭ وزەگى دە, وقىرمانعا بەرەرى دە مول بولارى داۋسىز. ميننوۋ – وسى رومانداعى باستى كەيىپكەر. ول اينالاسىنداعى ءتۇرلى قوعامدىق قۇبىلىستارعا نازار سالىپ, ەرتەرەك ەسەيۋدى ويلايدى. بۇل امەريكا تاريحىنداعى قايعىلى كەزەڭنىڭ اسەرلى وقيعاسى.
ءبىر سوزبەن ايتقاندا, بۇل رومان توزىمدىلىك تۋرالى اڭگىمەلەردىڭ جيىنتىعى. ادام بالاسىنىڭ مىنا ومىردە مىڭداعان, ميلليونداعان كۇرەستەردە جەڭىپ بارىپ ازاتتىققا, ەركىن ومىرگە, ءبارىمىز ىزدەپ جۇرگەن باقىتقا قول جەتكىزەتىنىن ايتقىسى كەلگەن تاماشا تۋىندىنىڭ ءبىرى دە وسى.
كىتاپتىڭ سوڭىندا اۆتور وسى شىعارماسى تۋرالى: «1942 جىلى پەرل-حاربور بومبالانعاننان كەيىن امەريكا قۇراما شتاتتارىندا جاپوندارعا قارسى باسقاشا كوڭىل كۇي پايدا بولدى, مەنىڭ اتا-اجەم ۇيىنەن قۋىلىپ, ءجۇز مىڭنان استام جاپوندىقتار قامالعان تۇرمە لاگەرىندە وتىرۋعا ءماجبۇر بولدى. ءاۋ باستان بۇل وقيعا مەنىڭ وتباسىما قاتىستى ەكەنىن ءبىلدىم, ويتكەنى بۇل تاريح – مەنىڭ تاريحىم», دەپ جازادى. جازۋشىنىڭ وسى سوزىنەن كەيىن ءبىز بۇل كىتاپتاعى وقيعانىڭ شىنايى ومىردە بولعانىن, اۆتور ءوز وتباسىنىڭ باسىنان وتكەن اۋىر تاعدىردى رومان ەتىپ جازعانىن تۇسىندىك. ول بۇل رومانىن جازۋ ارقىلى اقش-تاعى جاپوندىقتاردىڭ قانداي قيىن كۇندەردى وتكىزگەنىن جاڭا ۇرپاققا تۇسىندىرگىسى كەلگەن سياقتى.
