iJan تەرمينالدارى ارقىلى FlyArystan تۇتىنۋشىلارى جىلدام ءارى جايلى قىزمەتتەر ءتۇرىن الا الادى. اتاپ ايتقاندا, سەرۆيس رەيسكە تىركەۋ, جۇكتى وتكىزۋ جانە ولشەۋ قىزمەتتەرىن جۇزەگە اسىرادى. جولاۋشىلارعا ىڭعايلى جاعداي جاساۋ ماقساتىندا «نۇرسۇلتان نازارباەۆ حالىقارالىق اۋەجايىندا» 8 تەرمينال ورناتىلدى. قازىرگى كەزەڭدە iJan تەرمينالدارى ءوز بەتىمەن تىركەۋدى تەك ىشكى رەيستەرگە ۇسىنادى. ال كەيىننەن حالىقارالىق رەيستەر قوسىلماق.
FlyArystan-نىڭ باسقارۋشى ديرەكتورى ەدريان حاميلتون-ماننستىڭ ايتۋىنشا, وسى تاقىلەتتەس تەرمينالدار الماتى اۋەجايىندا 21 قازاننان باستاپ ىسكە قوسىلدى. 10 كۇننىڭ ىشىندە iJan سەرۆيسىنىڭ قىزمەتىن 2,5 مىڭنان استام ادام پايدالانعان. سونداي-اق ول الداعى ۋاقىتتا اتالعان تەرمينالدار ەلىمىزدىڭ بارلىق اۋەجايىندا ورناتىلاتىنىن جەتكىزدى.
«بۇكىل الەمدەگىدەي قازاقستاندا اۋە كولىگى جولاۋشىلار لەگىنىڭ قارقىندى ءوسۋى بايقالادى. وسىعان وراي اۋەجايداعى قىزمەت كورسەتۋ ۋاقتىلى جانە جىلدام ءوتۋى اسا ماڭىزدى. قازىرگى ۋاقىتتا FlyArystan اۋەكومپانياسى ەلىمىزدىڭ 13 اۋەجايىنان 26 ىشكى اۋە باعىتى بويىنشا اپتاسىنا 207 رەيس ورىندايدى. سوندىقتان لوۋكوستەر ىشكى نارىقتاعى تاسىمالداۋ كولەمى مەن باعدارلار جەلىسى بويىنشا كوشباسشى بولىپ سانالادى. ال iJan تەرمينالدارىنىڭ ىسكە قوسىلۋى جولاۋشىلارعا كەزەكسىز, وزىندىك جانە تەز تىركەلۋگە مۇمكىندىك بەرەدى», دەپ اتاپ ءوتتى ازاماتتىق اۆياتسيا كوميتەتىنىڭ توراعاسى تالعات لاستاەۆ استانا اۋەجايىندا تەرمينالداردى ىسكە قوسۋ راسىمىندە.
«نۇرسۇلتان نازارباەۆ حالىقارالىق اۋەجايى» اق باسقارما توراعاسى داۋلەت ءحامزيننىڭ ايتۋىنشا, iJan سەرۆيسىنىڭ كومەگىنە بارلىق جولاۋشى جۇگىنە الادى. تىركەۋدەن بولەك, مۇندا جۇكتى ولشەۋ, ارنايى تاڭبالانعان قاعازدار الۋ سياقتى جۇمىستار ىسكە اسىرىلادى. مۇنىڭ بارلىعى كەزەكسىز ورىندالادى. بۇل جاڭاشىلدىق جولاۋشىلاردىڭ اۋەجايعا دەر كەزىندە كەلۋىنە, تىركەۋدى وزدىگىنەن وتۋىنە مۇمكىندىك بەرمەك. iJan – قازاقستاندىق اۆياتسيا سالاسىن تسيفرلاندىرۋداعى ەلەۋلى جاڭالىق دەپ ايتۋعا تولىق نەگىز بار. «ەلوردا اۋەجايىندا العاش بولىپ وسىنداي يننوۆاتسيالىق تاجىريبەنىڭ ەنگىزىلگەنى ءبىز ءۇشىن ايتارلىقتاي وقيعا», دەدى ول.
لوۋكوستەر ءوز جولاۋشىلارىنا تانىسۋ مەن بەيىمدەلۋگە ۋاقىت كەرەك ەكەنىن ەسكەرە وتىرىپ, ولارعا 2023 جىلدىڭ قاڭتار ايىنا دەيىن تەرمينالدى قولدانۋعا اقىسىز بونۋس كەزەڭىن ۇسىنادى. ال ودان كەيىن تىركەۋ اۋەجاي مەن iJan تەرمينالى ارقىلى اقىلى بولادى.
وسى ورايدا ايتا كەتەرلىگى, جولاۋشىلار FlyArystan موبيلدىك قوسىمشاسىندا نەمەسە Flyاrystan.com سايتىندا تىركەۋدى تەگىن الدىن الا وتە الادى.
