ءوندىرىستى ولكەدەگى تىڭ باستاما

جاقىندا يندۋستريا­لان­دىرۋ كارتاسى اياسىندا «قازپرومبەزوپاسنوست-پۆ» جشس جوعارى قىسىمدى ىدىستار، جىلۋ الماسۋ اپپاراتتارى مەن مەتالل قۇراس­تىر­ما­لارىن شىعاراتىن جاڭا ينۆەس­تيتسيالىق جوبانى ىسكە قوس­تى. سونىڭ ناتيجەسىندە سەرىك­تەستىكتە قوسىمشا 15 جۇ­مىس ور­نى اشىلدى. ءوندىرىس باسشىسى ەرجان ءحامزيننىڭ ايتۋىنشا، جاڭا جوبالارعا جالپى سوماسى 200 ملن تەڭگە جەكە ينۆەستيتسيا تارتىلعان.

– ءبىزدىڭ كاسىپورنىمىز جاڭا­دان قۇرىلىپ جاتىر. قازىرگى كۇنى اۋامەن سالقىنداتقىش، جىلۋ الماستىرعىش اپپاراتتارىن، ف-ءتسيليندرلى بۇيىمدارىن، جەلىلىك جىلىتقىشتاردى، ارنايى ىدىستار مەن ءتۇرلى اۋقىم­داعى مەتالل قۇراستىرمالارىن ازىرلەيمىز. تەك قانا مەتالل قۇراستىرمالار بويىنشا جىلىنا 500 توننا بۇيىمدار جاساپ شىعۋعا مۇمكىندىگىمىز بار، – دەيدى كاسىپورىن ديرەكتورى.

جازدا وبلىس ورتالىعىندا مۇناي-حيميا ونىمدەرىن ازىر­لەيتىن تولىق تسيكلدى كاسىپورىن جۇمىسقا كىرىسكەنى دە ءمالىم. ەكسپورتقا باعىتتالعان ءوندىرىس ورنى جىل سايىن 30 مىڭ توننا رەاگەنتتەر مەن قوسپالار جاساپ شىعارۋعا مۇمكىندىك بەرەدى. وسىلايشا، «قازمۇنايحيم» جشس قازاقستاندا مۇناي-حيميا ونىمدەرىن تولىق تسيكل­مەن وندىرەتىن العاشقى كاسىپ­ورىن اتانىپ وتىر. وتاندىق مۇناي ءوندىرۋشى جانە مۇناي وڭدەۋشى كاسىپورىندارىن 60%-عا قامتاماسىز ەتىپ، تمد، ەۋرو­پالىق وداق، تاياۋ شىعىس جانە اقش ەلدەرىنە جەتكىزەدى. كاسىپ­ورىننىڭ ديرەكتورى الەن كەنجەباەۆ جالپى جوبا ءۇش كەزەڭ بويىنشا جۇزەگە اسىرىلاتى­نىن ايتادى. ينۆەستيتسيالار­د­ىڭ جالپى كولەمى – 1 ملرد تەڭ­گە. قازىرگى كەزدىڭ وزىندە مۇن­دا 40 تۇراقتى جۇمىس ورىندارى قۇرىلعان. جىلدىڭ سوڭىنا تامان كۇردەلى مۇناي-حيميا ونىمدەرىن دايىنداۋعا مۇمكىن­دىك بەرەتىن جوعارى تەمپەراتۋرالى سينتەز قوندىرعىسى­نىڭ قۇرىلىسىن باستاۋ جوسپارلانىپ وتىر. جالپى، پاۆلودار وبلىسىندا جۇزەگە اسىرى­لىپ جاتقان بۇل تەحنولوگيا­لىق ۇدەرىس زاماناۋي الەمدىك ەكو­نو­ميكا جاعدايىنداعى نارىقتىڭ سۇرانىسىنا جا­ۋاپ بەرەدى. كاسىپورىن مەملەكەت، بيزنەس جانە عىلىمنىڭ ءوزارا ارەكەتتەستىگىن ءىس جۇزىندە دا­لەل­دەپ وتىر.

«ستەكلومير» سەرىكتەستىگىندە ومىرشەڭ ەتىلگەن تاباق شىنى، ياعني بىرنەشە قاباتتى تەرەزەلەر دايىندايتىن جوبا دا ءوزىنىڭ ەرەكشەلىگىمەن تانىلىپ وتىر. جىلىنا 120 مىڭ شارشى مەتر تەرەزە شىنىسىن شىعارۋعا قابىلەتتى كاسىپورىن جاڭا جوباعا 3 ملرد تەڭگە ينۆەستيتسيا قۇيعان. جاڭا تسەحتا جاڭادان 15 جۇمىس ورنى قۇ­رىلىپ، كاسىپورىننىڭ ءونىم ءون­دىرۋ كورسەتكىشتەرى ارتا ءتۇستى. تەك ءبىر اۋىسىمدا مۇنداعى جۇ­مىس­كەرلەر 7 مىڭ شارشى مەتر تەرەزە دايىندايدى. كاسىپ­ورىن­نىڭ بۇيىمدارى ءوز ەلى­مىز­بەن قاتار، وزبەكستان، تاجىك­ستان، قىرعىزستان، رەسەي مەم­لە­كەت­تەرىنىڭ نارىعىنا شى­عارىلادى.

جالپى، «ستەكلومير» جشس «بيزنەستىڭ جول كارتاسى-2025» اياسىندا 2 ملرد تەڭگەدەن استام پايىزدىق مولشەرلەمەنى سۋبسيديالاۋ تۇرىندە مەملەكەتتىك قولداۋعا يە بولعان. بىلتىر «قاراپايىم زاتتار ەكونوميكاسى» باعدارلاماسى اياسىندا كاسىپورىننىڭ 3،7 ملرد تەڭگە سوماعا كرەديتتىك پورتفەل جوباسى قارجىلاندىرىلدى. كاسىپورىننىڭ ەڭبەك ۇجىمى جىل سايىن ءوسىپ كەلەدى. ەكى جىل بۇ­رىن مۇندا  270 ادام جۇمىس ىس­تەسە، قازىر 468 قىزمەتكەر ەڭ­بەك ەتەدى. زاۋىت ديرەكتورى ۆلا­دي­مير ۆىسوتسكي بىلىكتى جۇمىس­شىلار جەتىسپەيتىنىن جەتكىزدى.

ال وڭىردەگى مۇناي-حيميا سالاسىنداعى ءىرى كاسىپورىن­داردىڭ ءبىرى «كومپانيا نەف­تەحيم LTD» جشس الداعى جەل­توقسان ايىندا ەكپوكسيدتى قوسىلىس (كومپاۋند) تسەحىن اشۋدى جوسپارلاپ وتىر. جىلىنا 10 مىڭ توننا ءونىم وندىرەدى دەپ بول­جانعان جاڭا وندىرىسكە 1،5 ملرد تەڭگە ينۆەستيتسيا قۇيىل­عان. مۇندا قوسىمشا 37 جۇمىس ورنى پايدا بولىپ، بيۋدجەتكە جاڭا كىرىس كوزدەرى اشىلادى.

پاۆلودار وبلىسى اكىمى ءباسپاسوز قىزمەتىنىڭ دەرەگىنە سۇيەنسەك، ايماقتا جىل باسىنان جالپى سوماسى 44،5 ملرد تەڭگەنى قۇرايتىن 70-كە جۋىق ينۆەستيتسيالىق جوبا جۇزەگە اسىرىلىپ جاتىر.

پاۆلودار وبلىسى