بازاردا مىڭ كىسى بار, اركىم تانىعانىنا سالەم بەرەدى. الەمدىك نارىقتى بازار دەپ الىپ قاراساق, جاڭا قۇرىلعان تاۋەلسىز ەل رەتىندە وندا ءوز ورنىمىزدى سايلاۋ ءۇشىن دە ۇلتتىق اقشامىزدىڭ بولۋى زاڭدىلىق ءارى قاجەتتىلىك ەدى. وسىدان وتىز جىلعا جۋىق ۋاقىت بۇرىن ەرىكسىز رۋبل ايماعىندا قالعان ەلىمىز ءوزىنىڭ ءتول ۆاليۋتاسىن قىسقا مەرزىمدە جاساپ, باسىپ شىعارعانى بەلگىلى.
التىن بازارىندا باعالى. ءتول ۆاليۋتامىز – تەڭگەنىڭ دە ەلىمىزدە, الەمدىك قوعامداستىقتا وسى وتىز جىلعا جۋىق ۋاقىتتا وزىندىك باعامى قالىپتاستى. البەتتە, پۇلسىز بەرىپ, قۇنسىز الاتىن دۇنيە جوق نارىقتا نارقىن جوعالتپاۋدىڭ ءوزى وتە ۇلكەن جەتىستىك. «كىلەم ساتساڭ, اۋىلداسىڭا سات, ءبىر شەتىندە ءوزىڭ وتىراسىڭ» دەيتىن ۋاقىت ەمەس, جيىلەي تۇسكەن جاھاندىق رەتسەسسيا وتاندىق ەكونوميكاعا دا ءوز سالقىنىن تيگىزبەي تۇرمايدى. جاسىراتىنى جوق, «جارلىنىڭ اقشاسىن جامان تاۋار قۇرتادى» دەگەندەي, دايىن ءونىم تۇرعىسىنان يمپورتقا يەك ارتقان ەلىمىزدە ءتول ۆاليۋتامىزدىڭ سىناققا تۇسكەن كەزى كوپ بولدى. جالپى, بۇيىعى جاتار نارىق بولمايدى, سوندىقتان تەڭگە ءۇشىن كۇرەس ءالى الدا.
سوڭعى جىلدارى كۇللى دۇنيەنى كەرى كەتىرگەن پاندەميا مەن بيىلعى گەوساياسي احۋال دا حالىقارالىق نارىقتىڭ قالىپتاسقان جەلىلەرىن بىرت-بىرت ءۇزىپ, الەم ءارى-ءسارى كۇي كەشىپ تۇر. مۇنىڭ ءبارى قارجى قۇرالدارىنا, ۇلتتىق ۆاليۋتالارعا وڭ اسەر ەتە قويماعانى دا انىق. مىنە, وسىنداي سىندارلى كەزەڭدە ۇلتتىق ەكونوميكامىزدىڭ تىرەگى بولار تەڭگەنىڭ وزگە ەلدەردىڭ ۆاليۋتالارىمەن تەڭ, ءتىپتى ءباسى باسىم بولۋىن تىلەيمىز. ءبىر تەڭگە بيە بولاتىن, ەكى تەڭگە تۇيە بولاتىن كەزەڭگە جەتۋ ءۇشىن ەل ەكونوميكاسىنا ءار وتانداسىمىزدىڭ ۇزدىكسىز ۇلەس قوسۋى ماڭىزدى بولىپ قالا بەرمەك.
