تالقىلاۋ كەزىندە مينيستر يتبالىقتاردىڭ ءولىمى 7 قاراشادا بايقالعانىن اتاپ ءوتتى. بۇگىندە ولگەن يتبالىقتاردىڭ سانى 141-گە جەتتى. ءمينيستردىڭ ايتۋىنشا, بۇل ماسەلە بويىنشا شارالار قابىلدانىپ, مەملەكەتتىك كوميسسيا قۇرىلدى.
ونىڭ ايتۋىنشا, ماماندار ءتيىستى زەرتتەۋ جۇمىستارىن جۇرگىزگەن. ولار يتبالىقتار كۇكىرتتى سۋتەكتىڭ شىعارىلۋىنا بايلانىستى قىرىلدى دەگەن بولجام جاساپ وتىر.
«يتبالىقتار وتتەگىن الۋ ءۇشىن سۋ بەتىنە شىعىپ, سۋ استىنا قايتا جۇزەدى. جالپى سۋدا عانا ەمەس, جەر بەتى مەن اۋاداعى قانداي دا ءبىر زياندى وزگەرىستەر يتبالىقتارعا دا, باسقا بالىقتارعا دا اسەر ەتەدى. ءبىزدىڭ مالىمەتتەرىمىز بويىنشا, كاسپيدە 300 مىڭنان استام يتبالىق بار. قازىرگى ۋاقىتتا ۆەدومستۆو كاسپي جانە بيوالۋانتۇرلىلىك ماسەلەلەرى جونىندەگى مەملەكەتتىك ينستيتۋتتى قۇرۋ بويىنشا جۇمىس جۇرگىزىپ جاتىر», دەپ تۇيىندەدى سەرىكقالي برەكەشەۆ.
ايتا كەتسەك, كاسپي تەڭىزىنىڭ جاعاسىندا باۋتينو اۋىلى مەن فورت-شەۆچەنكو قالاسى اراسىندا يتبالىقتاردىڭ 100-دەن استام ولەكسەسى تابىلعان.
قۇقىق قورعاۋ ورگاندارى يتبالىقتاردىڭ جاپپاي قىرىلۋ فاكتىسى بويىنشا قىلمىستىق ءىس قوزعادى.
