ءمينيستردىڭ ايتۋىنشا, بيىل قۇقىق بۇزۋشىلاردى قىلمىستىق جاۋاپكەرشىلىككە تارتۋ جاعدايلارى كوبەيگەن. 2020 جىلى - 54, 2021 جىلى - 67, 2022 جىلدىڭ 9 ايىندا - 53 ادام جازالاندى.
«براكونەرلىكتى ازايتۋ ءۇشىن ازىرلەنىپ جاتقان اكىمشىلىك قۇقىق بۇزۋشىلىقتار تۋرالى كودەكس جوباسى اياسىندا جاۋاپكەرشىلىكتى كۇشەيتۋدى ۇسىنامىز. اتاپ ايتقاندا, بۇل - تىيىم سالىنعان قۇرالدارمەن بالىق اۋلاعانى ءۇشىن ايىپپۇلدى 20-دان 50 اەك-كە دەيىن ارتتىرۋ جانە ءبىر جىل ىشىندە قايتالاپ بۇزعانى ءۇشىن 15 تاۋلىككە اكىمشىلىك قاماۋعا الۋ», دەدى ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ.
ول الداعى ءۇش جىلدا ينسپەكتسيالاردى تولىق جابدىقتاۋ ءۇشىن قوسىمشا 8 ميلليارد تەڭگە قاجەت ەكەنىن ايتتى. ونىڭ ايتۋىنشا, بۇل براكونەرلىك قۇقىق بۇزۋشىلىق تۋرالى العاشقى دەرەكتەردى جىلدام ءارى ساپالى تولتىرۋعا جانە وعان قارسى كۇرەستىڭ تيىمدىلىگىن ارتتىرۋعا مۇمكىندىك بەرەدى.
سونداي-اق مينيستر بالىقتىڭ ۋىلدىرىق شاشۋ كەزەڭىندە قولايلى جاعدايلاردى قامتاماسىز ەتۋگە ەرەكشە نازار اۋدارىلاتىنىن ايتتى. ماسەلەن, اتىراۋ, ماڭعىستاۋ جانە باتىس قازاقستان وبلىستارىندا مۇددەلى مەملەكەتتىك ورگانداردىڭ بىرلەسكەن بۇيرىعى اياسىندا جىل سايىن «بەكىرە» بالىق قورعاۋ اكتسياسى وتكىزىلەدى. ال باسقا وڭىرلەردە كوكتەمگى كەزەڭدە «ۋىلدىرىق شاشۋ» اكتسياسى ۇيىمداستىرىلادى.
