ەلورداداعى «استانا ارەنا» ستاديونىندا وتكەن «ورداباسى» مەن «اقجايىق» كلۋبتارى اراسىنداعى فينالدىق ماتچ ءتورت تايمعا جالعاسىپ, اسا تارتىستى باسەكەدە فۋتبولشىلار 9 گول سوقتى. نەگىزگى ۋاقىتتا كوماندالار 4:4 ەسەبىمەن تەڭ ءتۇسىپ, شىمكەنتتىك كلۋب سوڭعى مينۋتتاردا جەڭىستى ج ۇلىپ الدى. دەگەنمەن ماتچتىڭ العاشقى 15 مينۋتىن ورالدىق ۇجىم ءساتتى باستاعان ەدى. جەتىنشى مينۋتتا زاۆەن بادويان ەسەپتى اشسا, توم تاباتادزە 11-مينۋتتا باسىمدىقتى ارتتىردى. ءبىرىنشى تايم بەلورتاسىنان اسقاندا «ورداباسى» ويىنشىسى سامات ءشامشى ەسەپ ايىرماسىن قىسقارتتى.
ال ەكىنشى تايمنىڭ باسىندا ۆسەۆولود سادوۆسكي (51) تارازى باسىن تەڭەستىردى. الايدا «اقجايىق» كوپ ۇزاماي تاعى ەكى گول سوعىپ, ەسەپتە العا شىعىپ الدى. گولدىڭ اۆتورلارى – تاباتادزە مەن يليا كوۆالەنكو. سوڭعى مينۋتقا دەيىن ويناعان «ورداباسى» ماكسيم فەدين مەن لۋيس گۋەدەستىڭ گولدارى ارقاسىندا تاعى دا ەسەپتى تەڭەستىرىپ كەتتى. ال قوسىمشا تايمنىڭ ەكىنشى 15 مينۋتىندا ەلحان استانوۆ پەنالتيدەن گول سوعىپ, «ورداباسىنا» جەڭىس سىيلادى. شىمكەنتتىكتەر 2011 جىلى دا قازاقستان كۋبوگىن جەڭىپ العان ەدى.
