جان-جانۋار الەمىنىڭ جاناشىرى

سۋرەتتەردى تۇسىرگەن ەرلان ومار، «EQ»

كورمەنىڭ اتى «National Geographic Photo Ark» دەپ اتالدى. اڭىزدا ايتىلاتىن جەر جاھاندى توپان سۋ باسقاندا نۇح پايعامباردىڭ ءار جانۋاردىڭ ءبىر ءتۇرىن ساقتاپ قالۋ ماقساتىندا كەمەسىنە شىعارىپ، امان الىپ قالعان وقيعاسى ادامزاتتىڭ ەسىندە بولسا كەرەك. اپپاراتىن قۇشاقتاپ، الەمدى كەزگەن دجوۋل ءسارتوريدىڭ بۇل جوباسى دا نۇحتىڭ وزىق ويىن جالعاستىرعانمەن بىردەي. ول تۇسىرگەن سۋرەتتەر جاي عانا فوتو ەمەس، جەر بەتىنەن مۇلدەم جويىلىپ كەتۋدىڭ الدىندا تۇرعان تىرشىلىك يەسىنىڭ سوڭعى بەينەسى دەۋگە دە تولىق نەگىز بار. ولاردىڭ عاجايىپ سۇلۋلىعى، تىرشىلىك ءداستۇرى، ءتىپتى جان دۇنيەسى دە سول الاقانداي اپپاراتتىڭ كوزىندە ساقتالىپ قالماق. سيرەك كەزدەسەتىن قۇستاردى، بالىقتار مەن سۇتقورەكتىلەردى، باۋىرىمەن جورعالاۋشىلاردى، قوسمەكەندىلەر مەن ومىرتقاسىزداردى قوسقاندا، 20 000 ءتۇردىڭ پورترەتىن قامتىعان جوبا ادامزاتقا وي سالماي قوي­مايدى. 

اتالعان كورمەنىڭ اشىلۋ سالتاناتىنا قاتىسقان ءماجىلىس دەپۋتاتى دارحان مىڭباي:«بۇگىن Kazmedia Holding كومپانياسى ۇيىمداستىرىپ وتىرعان وسى «National Geographic Photo Ark» كورمەسىنە اسىعىپ جەتتىك. ويتكەنى بۇل كورمەنىڭ ميسسياسىنىڭ ءوزى ءبىزدىڭ ۇلتتىق داستۇرىمىزبەن ۇندەس. قورشاعان ورتاعا، جان-جانۋارلارعا قۇرمەتپەن قاراۋ حالقىمىزدىڭ بولمىسىندا بار. كورمەنىڭ اتاۋىنىڭ ءوزى قازاقتىڭ «اراشا» دەگەنىن بىلدىرەدى. ياعني عاسىردىڭ اياعىنا دەيىن جوعالىپ كەتۋ قاۋپى بار جان-جانۋارلاردىڭ فوتوسۋرەتتەرىن جۇرت نازارىنا ۇسىنىپ، اراشا ءتۇسىپ وتىر»، دەگەن ريزاشىلىعىن ءبىلدىردى. سونىمەن بىرگە ول «National Geographic» جۋرنالىنىڭ 6 جىلدان بەرى قازاق تىلىندە جارىق كورىپ، وقىرماندارعا وي سالارلىق دۇنيەلەر جاريالاپ كە­لە جاتقانىنا العىسىن ايتتى.  

ال عىلىم جانە جوعارى ءبى­لىم ءمينيسترى ساياسات نۇربەك دجوۋل ءسارتوريدىڭ جوباسىنىڭ ماڭىزدىلىعى مەن قۇندىلىعى تۋرالى ايتا كەلە:«كورمەنىڭ، جوبانىڭ اتى وتە قىزىق، Photo Ark، مۇنداعى Ark دەگەنىمىز – نۇح پايعامباردىڭ كەمەسى. بۇل جوبا ءبىزدىڭ بولاشاق ۇرپاقتارىمىز ءۇشىن اللانىڭ جاراتقان وسى جان-جانۋارلار دۇنيەسىندەگى الۋان ءتۇردى ساقتاپ قالۋعا باعىتتالعان. ويتكەنى قازىرگى تاڭدا ەكونوميكانىڭ شيكىزاتتىق دامۋ مودەلى ءوزىنىڭ شىرقاۋ شەگىنە جەتكەن سياقتى. ءبىزدىڭ ماقساتىمىز ءىشىپ-جەۋ عانا ما؟ الدە وسى الەمدەگى كەرەمەت سۇيكىمدى، عاجايىپ، الۋان ءتۇرلى جاراتىلىس يەلەرىن ساقتاپ، ۇيلەسىمدە ءومىر ءسۇرۋ مە؟  ءبىر ساتكە توقتاپ، ويلانۋىمىز كەرەك. دجوۋل ءسارتوريدىڭ جوباسى – «National Geographic Photo Ark» كورمەسى وسى تۇرعىدان اسا ماڭىزدى»، دەدى مينيستر.

مەديا-مەنەدجەر، 31-ارنا جانە بىرقاتار اقپارات قۇرالىنىڭ  نەگىزىن قالاۋشى كاسىبي جۋرناليست ارمانجان مەرەكە ۇلى ءوز سوزىندە: «باق-تىڭ تاعى ءبىر وتە ماڭىزدى ميسسياسى بار، ول – قۇتقارۋ، ساقتاۋ، قورعاۋ. «National Geographic» جۋرنالىنىڭ اۋەلدەن-اق ميسسياسى – پلانەتامىزدى ساقتاۋ، بولاشاق ۇرپاققا قالدىرۋ. مەن وسى جۋرنالدى ەركىن جاقىپوۆ باستاعان كوماندا قازاق تىلىندە شىعارا باستاعاندا قاتتى قۋاندىم. سىزدەر ۇرپاق ءۇشىن اسا ۇلكەن ءىس اتقارىپ وتىرسىزدار جانە ونى شىن مانىندە كەلەر بۋىن وتە جوعارى باعالايتىن بولادى دەپ ويلايمىن. سوندىقتان بۇگىن ەلىمىزگە اكەلگەن الەمدىك  «National Geographic Photo Ark»  كورمەسىنىڭ ماڭىزى تىپتەن زور»، دەدى.

بۇل جوبا بولاشاق ۇرپاقتىڭ ءبىلىمدى بولىپ وسۋىنە، اينالاداعى زاتتاردى، قۇبىلىستى تانىپ-بىلۋىنە قوزعاۋشى كۇش بولارى انىق. «National Geographic» جۋرنالىنىڭ باس رەداكتورى ەركىن جاقىپوۆ اتالعان كورمەنى وتكىزۋدەگى ماقسات جاس بۋىندى، وقۋشىلاردى، جۋرناليستەر مەن فوتوتىلشىلەردى جەرىمىزدىڭ عاجايىپ بايلىعىن ساقتاۋعا جانە وسى سياقتى اۋقىمدى جوبالاردى قولداپ-قۋاتتاۋعا شاقىرۋ ەكەنىن ايتتى.

ەلىمىزدە تۇڭعىش رەت ءوتىپ جاتقان بۇل جوبا وسىعان دەيىن اقش-تىڭ بىرنەشە قالاسىندا، سونىڭ ىشىندە لوس-انجەلەستەگى Annenberg Space for Photography-دە، ەۋروپادا – يسپانيانىڭ مادريدتەگى ۇلتتىق مۋزەيىندە جانە ازيادا – وڭتۇستىك كو­رەيانىڭ سەۋل عىلىمي ورتالى­عىندا تانىستىرىلعان. كورمە استاناداعى ۇلتتىق مۋزەيدە 11 قاراشادان 4 جەلتوقسانعا دەيىن جالعاسادى.